រដ្ឋមន្រ្តីការពារជាតិអាមេរិកចង់ពង្រឹងសម្ព័ន្ធមិត្តនៅអាស៊ីដើម្បីទប់នឹងឥទ្ធិពលរបស់ចិន
នៅសហរដ្ឋអាមេរិក រដ្ឋមន្រ្តីការពារជាតិលោកឡយដ៍ អូស្ទីនដែលបានចូលកាន់តំណែងក្នុងថ្ងៃទី២២ មករាបានជ្រើសយកតំបន់អាស៊ីដើម្បីបំពេញទស្សនកិច្ចលើកទី១ នៅបរទេសសម្រាប់រយៈពេលមួយសប្តាហ៍។ កម្មវត្ថុនៃទស្សនកិច្ចត្រូវបានលោកឡយដ៍ អូស្ទីនបញ្ជាក់ច្បាស់ៗដោយមិនលាក់លៀមថា គឺចរចាជាមួយក្រុមប្រទេសសម្ព័ន្ធមិត្តរបស់អាមេរិកពីមធ្យោបាយដើម្បីពង្រឹងកិច្ចសហប្រតិបត្តិការយោធានៅក្នុងតំបន់ក្នុងគោលដៅទប់នឹងឥទ្ធិពលរបស់ចិន។
ចុះផ្សាយនៅថ្ងៃ៖
ស្តាប់ - ០២:១៨
មានប្រទេសអាស៊ីចំនួន ៣ គឺជប៉ុន កូរ៉េខាងត្បូង និងឥណ្ឌាដែលរដ្ឋមន្រ្តីការពារជាតិអាមេរិកលោកឡយដ៍ អូស្ទីនទៅបំពេញទស្សនកិច្ច។ តែមុននឹងទៅដល់ប្រទេសអាស៊ីទាំង ៣ លោកឡយដ៍ អូស្ទីនបានធ្វើដំណើរទៅកាន់រដ្ឋហាវ៉ៃដែលនៅទីនោះមានដាក់តាំងនូវទីស្នាក់ការនៃបញ្ជាការដ្ឋានកងទ័ពអាមេរិកសម្រាប់តំបន់ឥណ្ឌូប៉ាស៊ីហ្វិក។ « គឺជាបញ្ហាសម្ព័ន្ធភាព និងភាពជាដៃគូ ហើយក៏ជាការពង្រឹងសមត្ថភាពរបស់យើងដែរ »នេះជាការថ្លែងរបស់លោកឡយដ៍ អូស្ទីនទៅកាន់ក្រុមអ្នកកាសែតដែលរួមដំណើរជាមួយលោក។
ប្រមុខការពារជាតិអាមេរិករូបនេះដដែលបានឆ្លៀតរម្លឹកដោយមិនលាក់លៀមថា ក្នុងពេលដែលអាមេរិកកំពុងរវល់ជាប់ដៃប្រយុទ្ធប្រឆាំងនឹងពួកជីហាតនៅក្នុងតំបន់មជ្ឈិមបូព៌ា ចិនបានធ្វើទំនើបកម្មយោធារបស់ខ្លួនក្នុងល្បឿនយ៉ាងលឿន។ តែលោកឡយដ៍ អូស្ទីនបានកត់សម្គាល់ឃើញថា អាមេរិកនៅតែមានប្រៀប ហើយអាមេរិកនឹងធ្វើការពង្រឹងបន្ថែមទៀត។ តាមលោកឡយដ៍ អូស្ទីន កម្មវត្ថុរបស់អាមេរិកគឺដើម្បីធានាថា អាមេរិកមានសមត្ថភាព មានផែនការ និងមានគំនិតប្រតិបត្តិដើម្បីអាចទប់នឹងឥទ្ធិពលរបស់ចិន ឬអ្នកណាក៏ដោយដែលចង់វាយប្រហារលើអាមេរិក។
ដោយឡែក ប្រមុខការទូតអាមេរិកលោកអង់តូនី ប្ល៊ីងកិនក៏នឹងមានវត្តមានជាមួយលោកឡយដ៍ អូស្ទីននាដំណើរទស្សនកិច្ចទៅកាន់ប្រទេសជប៉ុន និងកូរ៉េខាងត្បូងដែរ។ « អ្វីដែលលោកអង់តូនី ប៊្លីងកិន និងរូបខ្ញុំចង់ធ្វើជាមួយសមភាគីជប៉ុន និងកូរ៉េខាងត្បូង គឺចាប់ផ្តើមពង្រឹងសម្ព័ន្ធភាព ស្តាប់ រៀនសូត្រ និងស្វែងយល់ពីការយល់ឃើញរបស់ពួកគេក្នុងគោលដៅរួមសហការជាមួយពួកគេដើម្បីពង្រឹងស្ថិរភាពនៅក្នុងតំបន់ »នេះជាការបញ្ជាក់របស់លោកឡយដ៍ អូស្ទីន។
គួររម្លឹកថាក្នុងរយៈពេលចុងក្រោយនេះ រដ្ឋបាលអាមេរិករបស់ប្រធានាធិបតីលោកបៃដិនបានបង្កើនគំនាបកាន់តែខ្លាំងលើចិន។ ដំណើរទស្សនកិច្ចរបស់ប្រមុខការពារជាតិ និងប្រមុខការទូតអាមេរិកនៅអាស៊ីធ្វើឡើង ក្រោយពីមានជំនួបកំពូលចតុភាគីតាមអនឡាញរវាងអាមេរិក ជប៉ុន ឥណ្ឌា និងអូស្រា្តលី។ គឺជាសម្ព័ន្ធភាពចតុភាគីមួយដែលបានបង្កើតឡើងក្នុងទសវត្ស ២០០០ ដើម្បីទប់នឹងឥទ្ធិពលរបស់ចិននៅក្នុងតំបន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ