ប្រជាជនហ្វីលីពីន ជាង ៩ម៉ឺននាក់ ត្រូវជម្លៀសចេញពីផ្ទះសម្បែង ដោយសារព្យុះសង្ឃរា Rai
នៅហ្វីលីពីន ខ្យល់ព្យុះកំណាច Rai បានបង្ខំឲ្យគេជម្លៀសប្រជាជនជាង ៩ម៉ឺននាក់ចេញពីផ្ទះសម្បែង។ តាមទីភ្នាក់ងារឧតុនិយម ហ្វីលីពីន ខ្យល់ព្យុះទីហ្វុង Rai ដែលបក់ក្នុងល្បឿន ១៩៥គីឡូម៉ែត្រក្នុងមួយម៉ោង បានមកដល់ដីហ្វីលីពីន នៅមុនការព្យាករទុករបស់ទីភ្នាក់ងារឧតុនិយមហ្វីលីពីន។ បក់មកដល់កោះ Siargao ភាគកណ្តាលហ្វីលីពីន តាំងពីព្រឹកថ្ងៃព្រហស្បតិ៍ ព្យុះសង្ឃរា ត្រូវបានអង្គការកាកបាទក្រហម ព្រមានទុកមុនថា ជាខ្យល់ព្យុះកំណាច ដ៏គួរឲ្យភ័យខ្លាច។
ចុះផ្សាយនៅថ្ងៃ៖
ស្តាប់ - ០១:៤២
Rai ជាខ្យល់ព្យុះទីហ្វុងដ៏មានកម្លាំងខ្លាំង ដែលទីភ្នាក់ងារឧតុនិយមហ្វីលីពីន បានប្រៀបប្រដូចទៅនឹងខ្យល់ព្យុះ អូរ៉ាហ្កង់ កម្រិតលេខ ៥នៅអាមេរិក។ នៅព្រឹកថ្ងៃព្រហស្បតិ៍នេះ ខ្យល់ព្យុះដ៏កំណាចដែលកើតមានតែ ៥ដងប៉ុណ្ណោះ នៅក្នុងពិភពលោក បានបក់មកដល់តំបន់ភាគកណ្តាលរបស់ហ្វីលីពីន។
ហ្វីលីពីនដែលប្រឈមខ្លាំងនឹងការឡើងកំដៅផែនដី ឧស្សាហ៍រងគ្រោះដោយសារខ្យល់ព្យុះសង្ឃរា យ៉ាងតិច ២០ដង ក្នុងមួយឆ្នាំៗ។ ខ្យល់ព្យុះទីហ្វុង បានបំផ្លាញជំរក ផ្ទះសម្បែង កសិកម្ម ហេដ្ឋារចនាសម្ព័ន្ធនៅតាមតំបន់ជាច្រើនរបស់ហ្វីលីពីន ដែលកំពុងជួបការលំបាករួចហើយ ដោយសារភាពក្រីក្រ។
ទីភ្នាក់ងារឧតុនិយមហ្វីលីពីនបានព្រមានពីគ្រោះថ្នាក់របស់ខ្យល់ព្យុះទីហ្វុង Rai ដែលមានកម្លាំងខ្លាំងមហិមារអាចបំប៉ើង រំលើង ដើមឈើ បំផ្លាញ អគារ ហេដ្ឋារចនាសម្ព័ន្ធ ដែលស្ថិតនៅលើផ្លូវឆ្លងកាត់របស់វា។ ទីភ្នាក់ងារឧតុនិយមហ្វីលីពីនបានទាញសញ្ញាអាសន្នផងដែរពីគ្រោះថ្នាក់បាក់រលំដី និងទឹកជំនន់ ទឹកភ្លៀង ដែលអាចបង្កគ្រោះថ្នាក់ដល់ជីវិតមនុស្សនៅតាមឆ្នេរសមុទ្រ។
តាមទីភ្នាក់ងារជាតិបង្ការគ្រោះមហន្តរាយ ប្រជាជនហ្វីលីពីនជាង ៩ម៉ឺននាក់ ត្រូវបានអាជ្ញាធរជម្លៀស យកទៅដាក់នៅមណ្ឌលកីឡាដ្ឋាន នៅព្រឹកថ្ងៃព្រហស្បតិ៍។
តាមការពន្យល់ ទីភ្នាក់ងារឧតុនិយមហ្វីលីពីន ខ្យល់ព្យុះទីហ្វុង Rai បានកើតឡើង យ៉ាងយឺតចម្លែកព្រោះថា រដូវខ្យល់ព្យុះ នៅមហាសមុទ្រប៉ាស៊ីហ្វិក ត្រូវចប់តាំងពីខែតុលាម្ល៉េះ។ លើកនេះ ខ្យល់ព្យុះទីហ្វុងដែលបក់ពីកើតទៅលិច នឹងបក់ឆ្លងកាត់កោះមីនដាណាវ មុននឹងទៅដល់សមុទ្រចិន និងសំដៅប្រទេសវៀតណាមនៅថ្ងៃសៅរ៍ចុងសប្តាហ៍នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ