ហ្វីលីពីន៖ខ្យល់ព្យុះទីហ្វុងបានបង្ខំប្រជាជនជាច្រើនពាន់នាក់ឲ្យរត់ចោលផ្ទះសម្បែង
នៅក្នុងប្រទេសហ្វីលីពីន ខ្យល់ព្យុះទីហ្វុងឈ្មោះវ៉ុងហ្វុងបានជំរុញប្រជាជនជាច្រើនពាន់នាក់ឲ្យរត់ចោលផ្ទះសម្បែងទៅកាន់ទីជម្រកបន្ទាន់រៀបចំដោយរដ្ឋអំណាច។ កោះសាម៉ារស្ថិតប៉ែកកណ្តាលប្រទេសជាអ្នកដែលបានទទួលឥទ្ធិពលវ៉ុងហ្វុងមុនគេកាលពីថ្ងៃព្រហស្បតិ៍ ទី១៤ ឧសភាដោយបានបំផ្លាញផ្ទះប្រជាជន សាលារៀន កន្លែងសម្រាប់ដាក់អ្នកជំងឺកូវីដ-១៩ និងកន្លែងសម្រាប់ក្រុងមនុស្សដើម្បីតាមដានរោគសញ្ញាជំងឺកូវីដ-១៩។ បន្ទាប់មកក្នុងថ្ងៃសុក្រ ទី១៥ ឧសភា ខ្យល់ព្យុះទីហ្វុងដដែលនេះបានប្រែខ្លួនជាខ្យល់ព្យុះសង្ឃរាដោយបន្តដំណើរទៅកាន់ទីក្រុងម៉ានីលប៉ែកខាងជើង។ គ្រោះថ្នាក់ធម្មជាតិមួយនេះបានបង្កការលំបាកដល់រដ្ឋាភិបាលនៅក្នុងយុទ្ធនាការប្រឆាំងនឹងការឆ្លងរាលដាលនៃជំងឺកូវីដ-១៩។
ចុះផ្សាយនៅថ្ងៃ៖
ស្តាប់ - ០២:២៣
វត្តមានខ្យល់ព្យុះវ៉ុងហ្វុងដែលមានល្បឿនដល់ទៅ ១៩០គីឡូម៉ែត្រក្នុងមួយម៉ោងជាមួយភ្លៀងធ្លាក់យ៉ាងច្រើនបានកើតមានឡើង ខណៈដែលមានពលរដ្ឋហ្វីលីពីនជាច្រើនលាននាក់ត្រូវស្ថិតក្នុងផ្ទះដោយសារវិបត្តិជំងឺកូវីដ-១៩។ តែឥទ្ធិពលវ៉ុងហ្វុងក្នុងថ្ងៃព្រហស្បតិ៍ ទី១៤ ឧសភាបានបង្ខំឲ្យប្រជាជនជាង ១៤០ ០០០នាក់រស់ក្នុងតំបន់ប៊ីកុលរត់ចេញពីផ្ទះទៅជ្រកកោនកន្លែងផ្សេង។ តែរដ្ឋអំណាចផ្នែកគ្រប់គ្រងគ្រោះមហន្តរាយបានប្រកាសថា ប្រជាជនរស់ក្នុងតំបន់ប៊ីកុលបានវិលទៅផ្ទះសម្បែងរបស់ពួកគេវិញនៅថ្ងៃសុក្រ ទី១៥ ឧសភាដោយសារតែពួកគេបានរងផលប៉ះពាល់តិចជាងប្រជាជនរស់នៅកោះសាម៉ារ។
ប៉ូលិសហ្វីលីពីនបានប្រាប់ AFP ពីការលំបាកក្នុងការគ្រប់គ្រងស្ថានការណ៍ ពិសេសត្រូវប្រាប់ប្រជាជនឲ្យពាក់ម៉ាស និងឲ្យគោរពគម្លាតសុវត្ថិដើម្បីការពារការឆ្លងជំងឺកូវីដ-១៩។ រដ្ឋអំណាចបានចែកម៉ាសឲ្យអ្នកដែលគ្មានម៉ាស និងចៀសវាងមិនបំបែកសមាជិកក្នុងគ្រួសារតែមួយឲ្យនៅដាច់ពីគ្នា។ ការលំបាកមួយទៀត គឺកង្វះជម្រកសម្រាប់ដាក់អ្នករងគ្រោះដោយខ្យល់ព្យុះ ព្រោះជម្រកដែលគ្រោងពីមុនត្រូវបានរដ្ឋអំណាចប្រែក្លាយជាកន្លែងសម្រាប់ព្យាបាលអ្នកជំងឺកូវីដ-១៩ ឬសម្រាប់ក្រុងមនុស្សដើម្បីតាមដានរោគសញ្ញាកូវីដ-១៩។ តើនឹងត្រូវធ្វើដូចម្តេច តើគេត្រូវប្តូរពីកន្លែងសម្រាប់ព្យាបាលអ្នកជំងឺកូវីដ-១៩ ទៅជាជម្រកសម្រាប់អ្នករងគ្រោះដោយខ្យល់ព្យុះវិញ ឬ ? នេះជាការចោទសួររបស់ចៅហ្វាយខេត្តសាម៉ារខាងកើត។
គួរបញ្ជាក់ថា ប៉ែកកណ្តាលប្រទេសដែលកំពុងរងគ្រោះដោយខ្យល់ព្យុះវ៉ុងហ្វុងពេលនេះមិនសូវរងផលប៉ះពាល់ខ្លាំងដោយជំងឺកូវីដ-១៩ ទេ។ គិតត្រឹមថ្ងៃសុក្រ ទី១៥ ឧសភា ហ្វីលីពីនមានអ្នកឈឺជាង ១២ ០៩១នាក់ និងស្លាប់ ៨០៦នាក់។ ជំងឺផ្លូវដង្ហើមមួយនេះកំពុងប្រមូលផ្តុំខ្លាំងនៅក្នុងទីក្រុងម៉ានីលដែលមានមនុស្សរស់នៅច្រើន និងបានរងឥទ្ធិពលខ្យល់ព្យុះវ៉ុងហ្វុងក្នុងថ្ងៃសុក្រ ទី១៥ ឧសភា។ រដ្ឋអំណាចបានព្រមានប្រាប់អ្នកក្រុងម៉ានីលពីការទៅដល់របស់វ៉ុងហ្វុង តែមិនបានបញ្ជាឲ្យចាកចេញពីផ្ទះសម្បែងឡើយ។ នៅមិនទាន់មានព័ត៌មានស្តីពីអ្នកស្លាប់ទេ។ គួររម្លឹកថាជាមធ្យមក្នុង១ឆ្នាំៗ ហ្វីលីពីនបានរងការវាយប្រហារដោយខ្យល់ព្យុះទីហ្វុងប្រមាណជា ២០ដង ដោយបានសម្លាប់មនុស្ស និងបំផ្លាញទ្រព្យសម្បត្តិយ៉ាងច្រើន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ