ពលរដ្ឋតៃវ៉ាន់ច្រាលចោលសំណើទាំង ៤ ដែលស្នើនៅក្នុងការបោះឆ្នោតប្រជាមតិ
នៅថ្ងៃសៅរ៍ ទី១៨ ធ្នូ រដ្ឋាភិបាលតៃវ៉ាន់បានដាក់សំណើចំនួន ៤ ឲ្យពលរដ្ឋបោះឆ្នោតនៅក្នុងការបោះឆ្នោតប្រជាមតិ។ តែទីបំផុត ពលរដ្ឋតៃវ៉ាន់បានបោះឆ្នោតមិនទទួលយកសំណើទាំង ៤ របស់រដ្ឋាភិបាល។ ការបោះឆ្នោតឆ្លើយ « ទេ » របស់ពលរដ្ឋពេលនេះជាជោគជ័យរបស់រដ្ឋាភិបាល និងជាបរាជ័យរបស់គណបក្សប្រឆាំងដែលចង់ប្រើយន្តការបោះឆ្នោតប្រជាមតិពេលនេះជាភស្តុតាងនៃការមិនទុកចិត្តរបស់ពលរដ្ឋចំពោះរដ្ឋាភិបាលសព្វថ្ងៃដែលមាននិន្នាការប្រឆាំងចិនដីគោក៕
ចុះផ្សាយនៅថ្ងៃ៖
ស្តាប់ - ០២:១៤
នៅក្នុងការបោះឆ្នោតប្រជាមតិលើកនេះ មានសំណើចំនួន ៤ ដែលរដ្ឋាភិបាលក្រុងតៃប៉ិកចង់បានចម្លើយពីពលរដ្ឋ ក្នុងនោះមាន ៣សំខាន់។ សំណើទី១ គឺទាក់ទងនឹងការហាមការនាំចូលសាច់ជ្រូកដែលមានផ្ទុកសារធាតុរ៉ាក់តូប៉ាមីន (ractopamine)។ សារធាតុមួយនេះត្រូវបានប្រើច្រើននៅសហរដ្ឋអាមេរិកក្នុងការលាយជាមួយចំណីសត្វដើម្បីជួយពន្លឿនការរីកធំធាត់របស់សត្វ។ ក្នុងឆ្នាំ ២០២០ រដ្ឋអំណាចតៃវ៉ាន់បានអនុញ្ញាតឲ្យនាំចូលសាច់ជ្រូកប្រភេទនេះក្នុងគោលដៅជំរុញឲ្យមានកិច្ចព្រមព្រៀងដោះដូរសេរីជាមួយសហរដ្ឋអាមេរិក។ តែគណបក្សប្រឆាំងចង់ឲ្យមានការហាមឃាត់ការនាំចូលសាច់ជ្រូកប្រភេទនេះ។ ទីបំផុត ពលរដ្ឋបានបោះឆ្នោតគាំទ្ររដ្ឋាភិបាល។
សំណើទី២ គឺទាក់ទងនឹងការប្តូរទីតាំងសាងសង់មជ្ឈមណ្ឌលឧស្ម័នហ្គាសដែលជាការចង់បានរបស់រដ្ឋាភិបាលដើម្បីប្រយោជន៍បរិស្ថាន និងដែលគណបក្សប្រឆាំងមិនចង់ឲ្យមានការប្តូរទីតាំងនោះទេ។ ទីបំផុត ពលរដ្ឋតៃវ៉ាន់បានបោះឆ្នោតគាំទ្រឲ្យមានការប្តូរតាមការចង់បានរបស់រដ្ឋាភិបាល។ សំណើទី៣ ដែលជាសំណើសំខានចុងក្រោយទាក់ទងនឹងការដាក់ឲ្យដំណើរការឡើងវិញនូវមជ្ឈមណ្ឌលនុយក្លែអ៊ែរមួយ ខណៈដែលរដ្ឋាភិបាលបានសន្យាបញ្ឈប់ការប្រើភ្លើងអគ្គិសនីបានពីនុយក្លេអ៊ែរ។ សំណើនេះក៏ត្រូវបានពលរដ្ឋបោះឆ្នោតគាំទ្ររដ្ឋាភិបាលដោយមិនយល់ព្រមដាក់ឲ្យដំណើរការឡើងវិញនូវមជ្ឈមណ្ឌលនុយក្លេអ៊ែរ។
សរុបមក ពលរដ្ឋបានបោះឆ្នោតច្រានចោលសំណើទាំង ៤ ដូចដែលរដ្ឋាភិបាលចង់បាន។ តែគេបានសង្កេតឃើញពីអត្រាអ្នកចូលរួមបោះឆ្នោតតិចតួច ព្រោះដើម្បីឲ្យសេចក្តីសម្រេចមួយអាចទទួលយកបានពីការបោះឆ្នោតប្រជាមតិ គឺត្រូវបានសំឡេងចូលរួមយ៉ាងតិច ២៥% ពោលស្មើនឹងការចូលរួមរបស់អ្នកបោះឆ្នោតប្រមាណជា ៥លាននាក់។ តែទីបំផុត ចំនួនអ្នកបោះឆ្នោតប្រឆាំងមានប្រមាណជា ៤លាននាក់ ពោលច្រើនជាងឆ្ងាយអ្នកបោះឆ្នោតគាំទ្រ។ នេះជាបរាជ័យរបស់គណបក្សប្រឆាំងកូមីនតង់ដែលចង់ប្រើយន្តការបោះឆ្នោតប្រជាមតិពេលនេះជាភស្តុតាងនៃការមិនទុកចិត្តរបស់ពលរដ្ឋចំពោះរដ្ឋាភិបាលសព្វថ្ងៃដែលមាននិន្នាការប្រឆាំងនឹងចិនដីគោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ