ជប៉ុនសម្រេចមិនបញ្ជូនតំណាងរដ្ឋាភិបាលទៅចូលរួមកីឡាអូឡាំពិករដូវរងារនៅចិន
ដើម្បីឆ្លើយតបនឹងអំពើរំលោភសិទ្ធិមនុស្សរបស់ចិន ប្រទេសជប៉ុនបានសម្រេចថានឹងមិនបញ្ជូនគណៈប្រតិភូតំណាងរដ្ឋាភិបាលរបស់ខ្លួនទៅចូលរួមក្នុងព្រឹត្តិការណ៍កីឡាអូឡាំពិករដូវរងារឆ្នាំ២០២២ នៅទីក្រុងប៉េកាំងក្នុងខែកុម្ភៈខាងមុខនោះទេ។ វិធានការនេះទំនងជានឹងធ្វើឲ្យទំនាក់ទំនងរវាងជប៉ុនជាមួយចិនកាន់តែតានតឹងថែមមួយកម្រិតទៀត។
ចុះផ្សាយនៅថ្ងៃ៖
ស្តាប់ - ០២:០៧
រដ្ឋាភិបាលជប៉ុនមិនបានបកស្រាយប្រាប់នោះទេថាតើការសម្រេចចិត្តថ្មីនេះគឺជាការធ្វើពហិការការទូតឬក៏អត់។ ប៉ុន្តែការសម្រេចចិត្តរបស់ទីក្រុងតូក្យូធ្វើឡើងបន្ទាប់ពីការធ្វើពហិការការទូតមួយដឹកនាំដោយសហរដ្ឋអាមេរិកក្នុងកម្មវិធីកីឡាអូឡាំពិករដូវរងារ ដោយហេតុតែព្រួយបារម្ភអំពីបញ្ហាសិទ្ធិមនុស្សនៅក្នុងប្រទេសចិន។
អ្នកនាំពាក្យរដ្ឋាភិបាលជប៉ុន លោក Hirokazu Matsuno និយាយថាជប៉ុនគ្មានផែនការបញ្ជូនមន្ត្រីរបស់ខ្លួនឲ្យទៅចូលរួមក្នុងព្រឹត្តិការណ៍កីឡាអូឡាំពិករដូវរងានៅទីក្រុងប៉េកាំង នាខែកុម្ភៈខាងមុខនេះទេ។ ហើយក៏ដូចសហគមន៍អន្តរជាតិដែរជប៉ុនជឿថាវាជារឿងមានសារៈសំខាន់ដែលចិនត្រូវគោរពសិទ្ធិមនុស្ស។
បើតាមអ្នកនាំពាក្យរដ្ឋាភិបាលជប៉ុនដដែលនេះ ការសម្រេចចិត្តមិនបញ្ជូនតំណាងឲ្យទៅចូលរួមក្នុងកម្មវិធីកីឡាអូឡាំពិករដូវរងារត្រូវបានធ្វើឡើងក្រោមការពិចារណាច្បាស់លាស់គ្រប់ជ្រុងជ្រោយ និងក្រោយជប៉ុនបានពិភាក្សាគ្នាផងដែរជាមួយភាគីចិនលើបញ្ហាសិទ្ធិមនុស្ស។
យ៉ាងណាក៏ដោយក្នុងស្មារតីកីឡានិងដើម្បីជាការគោរពដល់អត្តពលិក ប្រធានរៀបចំកីឡាអូឡាំពិកតូក្យូឆ្នាំ ២០២០ អ្នកស្រីសៃកូ ហាស្ហីម៉ូតុ (Seiko Hashimoto) និងប្រធានគណៈកម្មាធិការអូឡាំពិកជប៉ុនលោក Yasuhiro Yamashita នឹងអញ្ជើញទៅចូលរួមព្រឹត្តិការណ៍កីឡាអូឡាំពិករដូវរងានៅក្នុងរដ្ឋធានីរបស់ប្រទេសចិន។
គួររំឭកថានាពេលថ្មីៗនេះ សហរដ្ឋអាមេរិក អង់គ្លេស អូស្ត្រាលី និងកាណាដាបានប្រកាសធ្វើពហិការពោះកីឡាអូឡាំពិករដូវរងារនៅក្រុងប៉េកាំងដើម្បីជាការឆ្លើយតបនឹងការរំលោភសិទ្ធិមនុស្សធ្ងន់ធ្ងរធ្វើឡើងដោយរដ្ឋាភិបាលកុម្មុយនីស្តចិនទៅលើជនជាតិអ៊ុយហ្គួរនៅតំបន់ស៊ីនជាំង។ ការប្រកាសរបស់អាមេរិកនិងសម្ព័នមិត្តកាលណោះ បានបញ្ឆេះកំហឹងចិនជាខ្លាំង។
ស្រដៀងគ្នានេះដែរ គេជឿថាចិននឹងខឹងក្តៅស្លឹកត្រចៀកជាថ្មីចំពោះការសម្រេចរបស់ជប៉ុនមិនបញ្ជូនតំណាងរដ្ឋាភិបាលទៅចូលរួមកីឡាអូឡាំពិករដូវរងារ ហើយទំនាក់ទំនងរវាងប្រទេសទាំងពីរដែលតានតឹងនឹងគ្នាស្រាប់នឹងកាន់តែតានតឹងឡើងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ