ចិនបរិហារអាមេរិក ដែលធ្វើពហិការកីឡាអូឡាំពិករដូវរងារ នៅក្រុងប៉េកាំង
កាលពីថ្ងៃចន្ទ ទី៦ធ្នូ សេតវិមានអាមេរិក បានប្រកាសថា គឺនឹងមិនបញ្ជូនមន្ត្រីទូត តំណាងរដ្ឋាភិបាលអាមេរិក ឲ្យទៅចូលរួមជាផ្លូវការ នៅក្នុងការប្រកួតកីឡាអូឡាំពិករដូវរងា នៅទីក្រុងប៉េកាំង នាខែកុម្ភៈខាងមុខនេះទេ។ ការសម្រេចនេះ គឺដោយឈរលើមូលហេតុ នៃការរំលោភសិទ្ធិមនុស្សធ្ងន់ធ្ងរ ធ្វើឡើងដោយរដ្ឋាភិបាលកុម្មុយនីស្តចិន ទៅលើប្រជាជនអ៊ុយហ្គួរ នៅខេត្តស៊ីនជាំង។ ចិនបានឆ្លើយតបមកវិញ ដោយបរិហារថា អាមេរិកកំពុងតែបំពានលក្ខណៈអព្យាក្រិត្យ នៃវិស័យកីឡាហើយ។
ចុះផ្សាយនៅថ្ងៃ៖
ស្តាប់ - ០២:៣៤
ថ្លែងទៅកាន់អ្នកកាសែត លោក Ned Price អ្នកនាំពាក្យសេតវិមានអាមេរិក បានបញ្ជាក់ថា នៅក្នុងឱកាស ការប្រកួតកីឡាអូឡាំពិករដូវរវាង នៅក្រុងប៉េកាំង សហរដ្ឋអាមេរិក នឹងបញ្ជូនតែកីឡាករទៅចូលរួមប្រកួតតែប៉ុណ្ណោះ។ ចំណែក គណៈប្រតិភូអង្គទូត តំណាងរដ្ឋាភិបាល នឹងមិនទៅចូលរួមទេ។ ដោយឡែក ក្រុមកីឡាករអាមេរិកទាំងអស់ នឹងត្រូវអមដំណើរទៅ ដោយមន្ត្រីជំនាញរបស់រដ្ឋាភិបាល តែគឺដើម្បីធានារៀបចំដំណើរការប្រព្រិត្តិឲ្យបានល្អ នៃការចូលរួមប្រកួតតែប៉ុណ្ណោះ។
លោកស្រី Jen Psaki អ្នកនាំពាក្យម្នាក់ទៀត នៃសតវិមានអាមេរិក បានពន្យល់ថា បើសហរដ្ឋអាមេរិកបញ្ជូនតំណាងអង្គទូត និងរដ្ឋាភិបាលទៅចូលរួមជាផ្លូវការក្នុងកម្មវិធីនេះ វាហាក់ដូចជា សហរដ្ឋអាមេរិក មិនខ្វាយខ្វល់ ឬបិទភ្នែកធ្វើមិនឃើញ នូវអំពើរំលោភសិទ្ធិមនុស្សដ៏ធ្ងន់ធ្ងរ ដែលចិនបានធ្វើទៅលើប្រជាជនអ៊ុយហ្គួរ នៅខេត្តស៊ីនជាំង។
ក្រោយការប្រកាសធ្វើពហិការ ពីសំណាក់រដ្ឋាភិបាលអាមេរិកនេះ វិមានអេលីហ្សេបារាំង បានបញ្ជាក់ឲ្យដឹង នៅព្រឹកថ្ងៃអង្គារទី៧ធ្នូថា គេកំពុងតែពិចារណាលើរឿងនេះ ដោយត្រូវស្វែងរកគោលជំហររួមមួយ ក្នុងក្របខណ្ឌសហភាពអឺរ៉ុបតែម្តង។ តំណាងរដ្ឋាភិបាលបារាំង អះអាងថា រឿងរំលោភសិទ្ធិមនុស្សនៅចិន គឺជាបញ្ហាដែលបារាំង តាមដានយកចិត្តទុកដាក់បំផុត។
ដោយឡែក រដ្ឋាភិបាលណូវែលហ្សេឡង់ បានប្រកាសថា គេក៏នឹងមិនបញ្ជូន មន្ត្រីទូតតំណាងរដ្ឋាភិបាលផ្លូវការ ទៅចូលរួមនៅក្នុងឱកាសការប្រកួតកីឡាអូឡាំពិក នៅក្រុងប៉េកាំងដែរ។ លោក Grant Robertson ឧបនាយករដ្ឋមន្ត្រីណូវែលហ្សេឡង់ បានបញ្ជាក់ថា ការសម្រេចនេះ គឺមិនមានអ្វីពាក់ព័ន្ធនឹងសហរដ្ឋអាមេរិកទេ។ ណូវែលហ្សេឡង់ បានសម្រេចចិត្ត និងបានជូនដំណឹងទៅភាគីចិន តាំងតែពីខែតុលាម្លេះ ដោយយោងលើហេតុផលជំងឺឆ្លងកូវីដ១៩។
បន្ទាប់ពីដឹងការប្រកាសធ្វើពហិការ ពីសំណាក់សហរដ្ឋអាមេរិក លោក Zhao Lijian អ្នកនាំពាក្យក្រសួងការបរទេសចិន បានបរិហារថា សហរដ្ឋកំពុងតែបំពានលើគោលការណ៍ អព្យាក្រិត្យភាព នៃវិស័យកីឡាហើយ។ វិស័យកីឡា គឺត្រូវនៅដាច់ដោយឡែកពីបញ្ហានយោបាយ។ អ្នកនាំពាក្យចិនរូបនេះ បានបន្ថែមថា ចេតនារបស់អាមេរិក ដែលមករំខានដំណើរការល្អនៃកីឡាអូឡាំពិករដូវរងារនៅក្រុងប៉េកាំង គឺដោយឈរលើអំណះអំណាងភូតកុហក និងការវិនិច្ឆ័យបែបមនោគមវិជ្ជា ដោយគ្មានភស្តុតាង។
ដោយឡែក គណកម្មាធិការអូឡាំពិកអន្តរជាតិ បានបញ្ជាក់ប្រាប់អ្នកកាសែតថា គេគោរព និងគាំទ្រចំពោះការសម្រេចចិត្ត ដែលមានលក្ខណៈនយោបាយ របស់រដ្ឋាភិបាលអាមេរិក។ អ្វីដែលសំខាន់ គឺការសម្រេចចិត្តនេះ វាមិនបានប៉ះពាល់ ទៅដល់ការបញ្ជូនកីឡាករ ឲ្យទៅចូលរួមប្រកួតនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ