លោកចូ បៃដិន ពិចារណាធ្វើពហិការការទូត សម្រាប់កីឡាអូឡាំពិករដូវត្រជាក់នៅប៉េកាំង
ប្រធានាធិបតីអាមេរិក លោកចូ បៃដិន បាននិយាយប្រាប់អ្នកកាសែត នៅថ្ងៃព្រហស្បតិ៍ទី ១៨ វិច្ឆិកាថា លោកកំពុងពិចារណាធ្វើពហិការការទូត សម្រាប់ការប្រកួតកីឡាអូឡាំពិករដូវត្រជាក់ ដែលត្រូវប្រព្រឹត្តទៅ នៅឆ្នាំ ២០២២ នៅទីក្រុងប៉េកាំង។ នៅថ្ងៃសុក្រនេះ អ្នកនាំពាក្យរបស់ក្រសួងការបរទេសចិន បានទាត់ចោលការគំរាមផ្នែកការទូតរបស់ភាគីអាមេរិក ដោយថា ការលាយឡំគ្នារវាងកីឡា និងរឿងនយោបាយ គឺជាការផ្ទុយ នឹងស្មារតីកីឡាអូឡាំពិក។
ចុះផ្សាយនៅថ្ងៃ៖
ស្តាប់ - ០២:៥៣
រងការដាក់សម្ពាធពីអ្នកនយោបាយក្នុងស្រុក និងការសួរដេញដោលរបស់អ្នកកាសែត ប្រធានាធិបតីអាមេរិក លោកចូ បៃដិនបាននិយាយកាលពីថ្ងៃព្រហស្បតិ៍ថា លោកកំពុងពិចារណា ធ្វើពហិការការទូត សម្រាប់ការប្រកួតកីឡាអូឡាំពិករដូវត្រជាក់ នៅទីក្រុងប៉េកាំង។
ដោយចោទប្រកាន់រដ្ឋអំណាចប៉េកាំងថា បានរំលោភសិទ្ធិមនុស្សធ្ងន់ធ្ងរ ជាពិសេសធ្វើបាប គាបសង្កត់ ជនជាតិអ៊ុយហ្គួរនៅខេត្តស៊ីនជាំង អង្គការការពារសិទ្ធិមនុស្សអន្តរជាតិ ជាច្រើនបានអំពាវនាវឲ្យគេធ្វើពហិការ មិនទៅចូលរួមក្នុងការប្រកួតកីឡាអូឡាំពិក រដូវត្រជាក់ ដែលត្រូវប្រព្រឹត្តទៅពីថ្ងៃទី ៤ ដល់ថ្ងៃទី២០កុម្ភៈ ឆ្នាំ២០២២។
រហូតមក ប្រធានាធិបតីអាមេរិកនៅរារែក មិនទាន់បញ្ជាក់ជំហរណាមួយ ដោយអះអាងថា លោកចង់ពិភាក្សា ជាមួយប្រទេសសម្ព័ន្ធមិត្ត ដើម្បីដាក់សម្ពាធរួមគ្នាលើទីក្រុងប៉េកាំង ដែលប្រទេសលោកខាងលិចចោទប្រកាន់រំលោភសិទ្ធិមនុស្ស និងសម្លាប់ប្រល័យពូជសាសន៍លើជនជាតិអ៊ុយហ្គួរ នៅខេត្តស៊ីនជាំង។
ប៉ុន្តែ នៅពេលការប្រកួតកីឡាអូឡាំពិករដូវត្រជាក់ ដែលខិតចូលមកដល់ គេរំពឹងថា លោកចូ បៃដិន នឹងសម្រេចចិត្ត ក្នុងពេលឆាប់ៗខាងមុខ។ កាសែតWashington Post បានចុះផ្សាយនៅថ្ងៃអង្គារកន្លងទៅថា លោកចូ បៃដិន នឹងអាចសម្រេចចិត្ត នៅចុងខែវិច្ឆិកានេះថា តើធ្វើពហិការការទូត ទៅតាមការស្នើរបស់ទីប្រឹក្សារបស់លោកដែរឬទេ។
ពហិការការទូតមានន័យថា អាមេរិកនឹងមិនបញ្ជូនមន្រ្តីរដ្ឋាភិបាលឲ្យទៅតំណាងអាមេរិក នៅក្នុងការប្រកួតកីឡាអូឡាំពិក ប៉ុន្តែ កីឡាករអាមេរិកនៅតែអាចចូលរួមបានធម្មតា។
ពហិការការទូតក្នុងការប្រកួតកីឡាអូឡាំពិកនៅទីក្រុងប៉េកាំងត្រូវបានប្រធានសភាអ្នកតំណាងរាស្រ្តអាមេរិក លោកស្រី ណាន់ស៊ី ប៉េឡូស៊ីស្នើឡើងតាំងពីខែឧសភាមកម្ល៉េះ។ សមាជិកព្រឹទ្ធសភាមកពីគណបក្សសាធារណរដ្ឋវិញ បានទាមទារឲ្យអាមេរិកដកខ្លួនទាំងស្រុង ពីការប្រកួតកីឡាអូឡាំពិករដូវត្រជាក់នៅទីក្រុងប៉េកាំង។ អ្នកតំណាងរាស្រ្តលោកMike Waltz នៅបានរិះគន់ គណៈកម្មការអូឡាំពិកអន្តរជាតិ ដែលស្ពឹកស្រពន់ គ្មានចាត់វិធានការអ្វី បន្ទាប់ពីកីឡាការនី តេនីសចិន Peng Shuai បានបាត់ខ្លួន នៅក្រោយ ចេញមុខចោទប្រកាន់អតីតឧបនាយករដ្ឋមន្រ្តីចិន ពីបទរំលោភផ្លូវភេទ។
ពីទីក្រុងប៉េកាំង ក្រសួងការបរទេសចិនបានប្រតិកម្មខ្លាំងទៅនឹងការគំរាមធ្វើពហិការការទូត របស់អាមេរិក។ សម្រាប់អ្នកនាំពាក្យរបស់ក្រសួងការបរទេសចិន ការយករឿងនយោបាយមកលាយឡំជាមួយកីឡា គឺខុសផ្ទុយនឹងស្មារតី កីឡាអូឡាំពិក។ មួយវិញទៀត ការចោទប្រកាន់របស់អាមេរិកដែលថា ចិនបានរំលោភសិទ្ធមនុស្ស គឺធ្វើឡើងដោយគ្មានមូលដ្ឋាន អ្វីទាំងអស់។ ប៉េកាំងបានអះអាងថា បានបង្កើតមណ្ឌលសម្រាប់បណ្តុះបណ្តាលវិជ្ជាជីវៈដល់ជនជាតិអ៊ុយហ្គួរ ប៉ុន្តែ មិនមែនកន្លែងឃុំឃាំងធ្វើបាប គាបសង្កត់ជនជាតិអ៊ុយហ្គួរ ដូចការចោទប្រកាន់របស់ប្រទេសលោកខាងលិចនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ