ឥណ្ឌូណេស៊ីព្រមទទួលជនភៀសខ្លួនរ៉ូហ៊ីងយ៉ាក្រោយផ្ទុះការតវ៉ាខ្លាំង
ប្រទេសឥណ្ឌូណេស៊ីបានប្រកាសនៅថ្ងៃពុធ ទី២៩ ធ្នូថានឹងអនុញ្ញាតឲ្យទូកដឹកជនភៀសខ្លួនរ៉ូហ៊ីងយ៉ាជាង១០០នាក់ចូលចតលើដីច្រាំងរបស់ខ្លួន។ សេចក្តីប្រកាសនេះធ្លាក់មកបន្ទាប់ពីមានការតវ៉ាជាច្រើនពីប្រជាជនក្នុងស្រុកនិងពីសហគមន៍អន្តរជាតិ ចំពោះផែនការរបស់អាជ្ញាធរឥណ្ឌូណេស៊ី ដែលជំរុញឲ្យជនភៀសខ្លួនរ៉ូហ៊ីងយ៉ាធ្វើដំណើរតាមទូកទៅកាន់ដែនទឹកម៉ាឡេស៊ីវិញ។
ចុះផ្សាយនៅថ្ងៃ៖
ស្តាប់ - ០២:២១
ក្រោយជួបប្រជុំគ្នាពេញមួយថ្ងៃពុធម្សិលមិញ មន្ត្រីឥណ្ឌូណេស៊ីនៅក្រុងឆ្នេរប៊ីរឿន (Bireun) នៃខេត្តអាឆេបានសម្រេចផ្លាស់ប្តូរចិត្តបែរមកអនុញ្ញាតឲ្យទូកដឹកជនភៀសខ្លួនរ៉ូហ៊ីងយ៉ាចូលចតច្រាំងក្រោមហេតុផលមនុស្សធម៌។
លោក អាម៉េដ វីចាយ៉ា (Armed Wijaya) ប្រធានក្រុមការងារជាតិឥណ្ឌូណេស៊ីទទួលបន្ទុកជនភៀសខ្លួននិយាយថាការសម្រេចថ្មីនេះធ្វើឡើងបន្ទាប់ពីបានពិចារណាពីស្ថានភាពដែលត្រូវការជំនួយសង្គ្រោះបន្ទាន់របស់ជនភៀសខ្លួននៅលើទូកឈើនោះ។
ទូកជនជាតិរ៉ូហ៊ីងយ៉ា ឥឡូវនេះស្ថិតនៅចម្ងាយប្រមាណជា ៨០គីឡូម៉ែត្រពីក្រុងប៊ីរឿនហើយនឹងត្រូវសង្គ្រោះឲ្យឡើងលើច្រាំង។ បើតាមមន្ត្រីឥណ្ឌូណេស៊ីដដែល ដោយសារពេលនេះស្ថិតក្នុងកាលៈទេសៈកូវីដ ជនភៀសខ្លួនទាំងអស់នឹងទទួលការពិនិត្យសុខភាពហើយក្រុមការងារឥណ្ឌូណេស៊ីនឹងធ្វើការសម្របសម្រួលជាមួយភាគីពាក់ព័ន្ធដើម្បីផ្តល់ទីជម្រក និងជំនួយផ្គត់ផ្គង់សម្រាប់ពួកគេ។
គួរបញ្ជាក់ថា អាជ្ញាធរឥណ្ឌូណេស៊ីបានប្រទះឃើញទូកឈើដឹកជនភៀសខ្លួនរ៉ូហ៊ីងយ៉ាដំបូងកាលពីដើមសប្តាហ៍នេះ។ ក្រោយមានបញ្ហាម៉ាស៊ីន ទូកជនភៀសខ្លួនរ៉ូហ៊ីងយ៉ាបានជាប់គាំងនៅចម្ងាយប្រមាណ ១២៩គីឡូម៉ែតពីឆ្នេរសមុទ្រឥណ្ឌូណេស៊ី។
កាលពីថ្ងៃអង្គារ អាជ្ញាធរឥណ្ឌូណេស៊ីមិនអនុញ្ញាតឲ្យទូករបស់ជនភៀសចូលចតនោះទេ ហើយក្រោយពីបានផ្តល់ជំនួយផ្គត់ផ្គង់ សម្លៀកបំពាក់ ប្រេងឥន្ធនៈ និងក្រោយបានជួយជួសជុលទូកដែលខូចរួចមក ឥណ្ឌូណេស៊ីបានព្យាយាមជំរុញក្រុមជនភៀសខ្លួនរ៉ូហ៊ីងយ៉ាឲ្យធ្វើដំណើរចូលទៅដែនទឹកប្រទេសជិតខាងម៉ាឡេស៊ីវិញ។
យ៉ាងណាក៏ដោយក្រោយមានការតវ៉ាផ្ទុះឡើងទាំងពីប្រជាជនក្នុងស្រុកនិងពីសហគមន៍អន្តរជាតិផងនោះ រដ្ឋអំណាចឥណ្ឌូណេស៊ីក៏សម្រេចព្រមទទួលយកជនភៀសខ្ឡួនរ៉ូហ៊ីយ៉ាងសរុបប្រមាណ ១២០នាក់ដែលភាគច្រើនជាស្ត្រីនិងកុមារ។ ប្រជាជនខេត្តអាឆេម្នាក់បានប្រាប់ទីភ្នាក់ងារព័ត៌មាន AFP ថាប្រជាជនខេត្តអាឆេនេះធ្លាប់ឆ្លងកាត់បទពិសោធន៍ដូចគ្នានឹងជនជាតិរ៉ូហ៊ីងយ៉ាដែរ។ ក្នុងពេលស្រុកទេសមានជម្លោះ ពួកគេបានប្រថុយប្រថានជីវិតរត់ភៀសខ្លួនឆ្លងកាត់សមុទ្រដ៏ធំល្វឹងល្វើយ ហើយត្រូវបានជួយដោយមនុស្សមកពីប្រទេសផ្សេងៗដូចជាម៉ាឡេស៊ី និងអូស្ត្រាលី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ