ឥណ្ឌូណេស៊ីស្រង់ជនភៀសខ្លួនបានជិត៥០០នាក់
ជនភៀសខ្លួនរត់តាមទូកប្រមាណជិត៥០០នាក់ មកពីភូមា និងបង់ក្លាដែស បានធ្វើដំណើរមកដល់ដែនសមុទ្ទឥណ្ឌូណេស៊ី និងត្រូវបានអាជ្ញាធរសង្គ្រោះទាន់ពេលវេលា។ នេះបើតាមការប្រកាសរបស់អ្នកទទួលខុសត្រូវឥណ្ឌូណេស៊ី ដែលបានទទួលដំណឹងពីក្រុមអ្នកនេសាទ ពេលឃើញមានទូកអណ្តែតឃ្លេងឃ្លោងកណ្តាលសមុទ្ទ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
ខ្លះជាជនជាតិរ៉ូហ៊ីងយ៉ា ខ្លះជាជនជាតិបង់ក្លាដែស ប៉ុន្តែសម្រាប់ឥណ្ឌូណេស៊ី គឺឈ្មោះតែមួយដូចគ្នា។ មានប្រុស មានស្រីនិងក្មេងៗ ក្រុមជនភៀសខ្លួនតាមទូកទាំងអស់នេះ ត្រូវបានអាជ្ញាធរឥណ្ឌូណេស៊ី បញ្ជូនទៅកាន់មណ្ឌលឃុំឃាំង របស់ខេត្តអាឆេ ដើម្បីឱ្យប៉ូលិស និងភ្នាក់ងារអន្តោប្រវេសន៍ សិក្សាសំណុំឯកសារ និងមូលហេតុនៃការរត់ភៀសខ្លួន។ ក្នុងចំណោមនោះមានស្ត្រី៨៣នាក់និងកុមារ ៤១នាក់ ដែលភាគច្រើន មានសុខភាពមិនល្អ ត្រូវការជាចាំបាច់ការព្យាបាល។
ទូកដឹកជនភៀសខ្លួនមួយក្រុមនេះ មានទិសដៅនាំទៅកាន់ម៉ាឡេស៊ី។ ប៉ុន្តែនៅពេលឃើញឆ្នេរលឹមៗ មេខ្យល់គិតស្មានថាបានដល់ទីកំណត់ហើយ ទើបបញ្ជាឱ្យជនភៀសខ្លួន ហែលទឹកទៅរកឆ្នេរ ខ្លះក៏ធ្វើតាម តែតាមការពិតគឺជាឆ្នេរឥណ្ឌូណេស៊ីសោះ។ នេះបើតាមការរៀបរាប់របស់ក្រុមអ្នកសង្គ្រោះ និងជនភៀសខ្លួនម្នាក់ ដែលចេះភាសាម៉ាឡេស៊ី។
ក្នុងមួយឆ្នាំៗ មានជនភៀសខ្លួនជាច្រើនពាន់នាក់ នាំគ្នាសាកល្បងរត់ភៀសខ្លួនចេញពីតំបន់ព្រំដែនភូមា និងបង់ក្លាដែស ដើម្បីគេចពីភាពក្រីក្រ និងការគាបសង្កត់ ចំពោះករណីជនជាតិរ៉ូហ៊ីងយ៉ាងនៅភូមា។ ជាទូទៅ ពួកឈ្មួញតែងនាំឆ្លងកាត់ភាគខាងត្បូងប្រទេសថៃ មុននឹងទៅដល់ម៉ាឡេស៊ី ឬឥណ្ឌូណេស៊ី។ របាយការណ៍របស់ឧត្តមស្នងការទទួលបន្ទុកជនភៀសខ្លួននៅក្រុងបាងកក បានបង្ហាញថា មានជនជាតិរ៉ូហ៊ីងយ៉ា និងបង់ក្លាដែស ប្រមាណ២៥០០០នាក់ តាមរយៈមេខ្យល់ បានសម្រេចចិត្តធ្វើដំណើរផ្សងព្រេងតាមសមុទ្ទ នៅរវាងពីខែមករា ដល់ខែមីនា ឆ្នាំ២០១៥នេះ ពោលគឺកើនឡើងស្ទើរទ្វេមួយជាពីរ។
ការជួយសង្គ្រោះជនភៀសខ្លួនតាមទូក ធ្លាក់មកជួនចំពេលដែលអាជ្ញាធរសឹកក្រុងបាងកក ទើបតែស្នើសុំរៀបចំកិច្ចប្រជុំត្រីភាគីថៃម៉ាឡេស៊ីនិងភូមា ដើម្បីទប់ស្កាត់ការជួញដូរមនុស្សក្នុងតំបន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ