កូវីដ១៩ ៖ ថៃគ្រោងយកពន្ធ ពីទេសចរបរទេស ចាប់ពីខែមេសាទៅ
៣០០បាត (៩ដុល្លារ) នេះជាតម្លៃពន្ធ ដែលរដ្ឋាភិបាលថៃគ្រោងនឹងតម្រូវឱ្យទេសចរបរទេសបង់ បន្ថែមនៅពេលទិញសំបុត្រយន្តហោះចូលមកលេងថៃ។ បើតាមមន្ត្រីជាន់ខ្ពស់របស់រដ្ឋាភិបាល ថៃចាប់យកពន្ធថ្មីនេះ ចាប់ពីខែមេសា២០២២តទៅ និងដោយមានកម្មវត្ថុចម្បងពីរ គឺ ទុកសម្រាប់ចំណាយលើការអភិវឌ្ឍមណ្ឌលទេសចរណ៍តាមមូលដ្ឋាន និងទុកសម្រាប់ជួយចេញថ្លៃព្យាបាលជំងឺទេសចរបរទេសដែលគ្មានបណ្ណធានារ៉ាប់រង។
ចុះផ្សាយនៅថ្ងៃ៖
ប្រាក់ពន្ធប្រមូលបានពីទេសចរនឹងក្លាយទៅជាមូលនិធិ សម្រាប់ជួយព្យាបាលទេសចរ និងសម្រាប់យកទៅចំណាយក្នុងការអភិវឌ្ឍហេដ្ឋារចនាសម្ព័ន្ធទេសចរណ៍ក្នុងស្រុក។ មានករណីទេសចរបរទេសច្រើន ធ្លាក់ខ្លួនឈឺ តែគ្មានបណ្ណធានារ៉ាប់រង និងក្លាយជាបន្ទុកដ៏ធ្ងន់ សម្រាប់រដ្ឋាភិបាលក្នុងការព្យាបាលសង្គ្រោះពួកគេ។ ហេតុដូច្នេះហើយបានជារដ្ឋាភិបាល សម្រេច យកពន្ធថ្មី មួយបន្ថែមទៀតពីអ្នកទេសចរ នេះឡើង។ នេះបើតាមការរៀបរាប់របស់មន្ត្រីជាន់ខ្ពស់នៃអាជ្ញាធរទេសចរណ៍ថៃ ដោយពន្យល់លម្អិតថា ការយកតពន្ធ ជាផ្នែកមួយនៃផែនការអភិវឌ្ឍវិស័យទេសចរណ៍យូរអង្វែង។
ចាប់ពីខែមេសាទៅ ពន្ធថ្មី ដែលមានតម្លៃ៣០០បាត ឬត្រូវជាប្រមាណ ៩ដុល្លារសហរដ្ឋអាមេរិក នឹងក្លាយជាកាតព្វកិច្ចថ្មី បន្ថែមពីលើវិធានការមួយជម្លៀសធំដែលរដ្ឋាភិបាលដាក់តម្រូវលើអ្នកទេសចរបរទេស។ តាំងពីផ្ទុះកូវីដ១៩មក ថៃតម្រូវឱ្យទេសចរបរទេសទាំងអស់ ដែលចង់មកទស្សនាប្រទេសថៃ បង់ប្រាក់ជាមុន សម្រាប់ថ្លៃធ្វើតេស្តរកកូវីដ ថ្លៃស្នាក់នៅក្នុងសណ្ឋាគារ ឬថ្លៃ កន្លែងជាប់ចត្តាឡីស័ក និងត្រូវមានបណ្ណធានារ៉ាប់រង ដែលអាចសងថ្លៃព្យាបាលជំងឺយ៉ាងហោចត្រឹម៥ម៉ឺនដុល្លារ។
ទេសចរបរទេសត្រូវបង់ពន្ធថ្មី នៅពេលទិញសំបុត្រយន្តហោះ។ ជាមួយនឹងវិធានការថ្មី តម្រូវឱ្យបង់ពន្ធថ្មីបន្ថែមមួយទៀតនេះ រដ្ឋាភិបាលថៃនឹងប្រមូលបានប្រាក់ចូលហិបមូលនិធិចំនួន ៨០០ពាន់លានបាត (២៤ពាន់លានដុល្លារ) ព្រោះរដ្ឋាភិបាលសង្ឃឹមថានឹងមានទេសចរបរទេសពី៥ទៅ១៥លាននាក់ មកលេងថៃនៅឆ្នាំ២០២២។
ថៃជាទិសដៅទេសចរណ៍ដ៏ចំបងជាងគេនៅអាស៊ី និងធ្លាប់ទទួលភ្ញៀវទេសចរបរទេសដល់ទៅ ៤០លាននាក់ ក្នុងមួយឆ្នាំ កាលពីឆ្នាំ២០១៩។ ប៉ុន្តែជំងឺរាតត្បាតកូវីដ១៩ បានវាយប្រហារវិស័យទេសចរណ៍ ដែលជាសរសរទ្រូងសេដ្ឋកិច្ចជាតិដ៏សំខាន់ យ៉ាងដំណំ។ ចំនួនអ្នកមកទស្សនាប្រទេសថៃបានធ្លាក់ចុះមកនៅត្រឹមតែប្រមាណ២សែននាក់ប៉ុណ្ណោះ កាលពីឆ្នាំ២០២១។ មេរោគកូវីដបំប្លែងខ្លួនថ្មី អូមីក្រុង ដ៏មហាឆ្លង និងឆ្លងមហាលឿននៅលើពិភពលោក បានមកបង្អាក់កិច្ចខិតខំប្រឹងប្រែងចុងក្រោយរបស់រដ្ឋាភិបាលទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ