ថៃចាប់បើកទ្វារទទួលភ្ញៀវទេសចរ ដោយគ្មានការដាក់កំហិតឲ្យធ្វើចត្តាឡីស័ក
ថ្ងៃចន្ទ ទី១ វិច្ឆិកាគឺជាថ្ងៃដែលប្រទេសថៃចាប់ផ្តើមបើកទ្វារទទួលទេសចរបរទេសដែលបានចាក់វ៉ាក់សាំងរួចដោយគ្មានការដាក់កំហិតឲ្យធ្វើចត្តាឡីស័កឡើយ។ នៅថ្ងៃចន្ទនេះដែរ គេឃើញភ្ញៀវទេសចរបរទេសជាច្រើនបានចាប់ផ្តើមធ្វើដំណើរទៅកាន់ទីក្រុងបាងកក និងភូកេតដែលជាកោះទេសចរណ៍ដ៏ល្បាញល្បីមួយរបស់ថៃ។
ចុះផ្សាយនៅថ្ងៃ៖
ស្តាប់ - ០២:២៥
ប្រទេសថៃបានចាប់ផ្តើមបើកដំណើរការឧស្សាហកម្មទេសចរណ៍របស់ខ្លួនឡើងវិញ បន្ទាប់ពីជាប់គាំងដោយសារតែវិធានការទប់ស្កាត់កូវីដរយៈពេលប្រមាណជា ១៨ ខែរួចមក។ ជំងឺកូវីដ១៩ បានបង្កជាផលប៉ះពាល់យ៉ាងខ្លាំងដល់វិស័យទេសចរណ៍ដែលជាសង្ហើមសេដ្ឋកិច្ចរបស់ថៃ។ កាលពីឆ្នាំមុន វិស័យទេសចរណ៍ថៃបានធ្លាក់ចុះខ្លាំងមិនធ្លាប់មានរហូតដល់ជាង ៨០% ចាប់តាំងពីវិបត្តិហិរញ្ញវត្ថុអាស៊ីឆ្នាំ១៩៩៧មក។
ដើម្បីស្រោចស្រង់សេដ្ឋកិច្ចក៏ដូចជាវិស័យទេសចរណ៍ អាជ្ងាធរថៃបានប្រកាសផ្តល់ភ្លើងខៀវអនុញ្ញាតឲ្យភ្ញៀវទេសចរដែលបានចាក់វ៉ាក់សាំងរួចមកពីប្រទេសមានហានិភ័យទាបចំនួនជាង ៦០ ឲ្យអាចចូលប្រទេសថៃបានដោយមិនចាំបាច់ត្រូវធ្វើចត្តាឡីស័កឬនៅដាច់ដោយឡែកពីគេក្នុងសណ្ឋាគារទៀតឡើយ។
អាកាសយានដ្ឋានសុវណ្ណភូមិរបស់ទីក្រុងបាងកក និងច្រកព្រលានអន្តរជាតិនៃកោះភូកេតគឺជាកន្លែងដំបូងគេបង្អស់ដែលទទួលភ្ញៀវទេសចរនៅព្រឹកថ្ងៃចន្ទនេះ។ គេសង្កេតឃើញថាដែរថាភាគច្រើននៃអ្នកទេសចរគឺជាភ្ញៀវដែលមកពីអឺរ៉ុបនិងត្រូវបានទទួលស្វាគមន៍យ៉ាងរាក់ទាក់។
ទេសចរបរទេសបានសម្តែងនូវក្តីរីករាយជាខ្លាំងដែលពួកគេអាចធ្វើដំណើរចូលប្រទេសថៃ ដោយមិនចាំបាច់ត្រូវជាប់កាតព្វកិច្ចធ្វើចត្តាឡីស័ក។ ជាក់ស្តែង ភ្ញៀវទេសចរមកពីអាល្លឺម៉ង់ម្នាក់វ័យ ៥៥ឆ្នាំ ឈ្មោះ Andre Winkler បានប្រាប់ទីភ្នាក់ងារព័ត៌មាន AFP ថាលោកពិតជាសប្បាយចិត្តមែនទែន ដែលលោកនិងភរិយាអាចមកលេងនៅទីក្រុងបាងកកវិញទៀតបាន។
អ្នកទេសចររូបនេះបានឲ្យដឹងដែរថាមុនផ្ទុះជំងឺកូវីដ ក្នុងពេលរដូវរងារ លោកនិងភរិយាតែងមកស្នាក់នៅប្រទេសថៃរយៈពេល ៦ ខែជារៀងរាល់ឆ្នាំដោយហេតុថានៅប្រទេសអាល្លឺម៉ង់អាកាសធាតុរងារខ្លាំង។
គួរបញ្ជាក់ថា ថៃរំពឹងថាព្រលានយន្តហោះសុវណ្ណភូមិរបស់ខ្លួននឹងទទួលបានអ្នកដំណើរចំនួនប្រមាណ ៣ ម៉ឺននាក់នៅថ្ងៃចន្ទនេះ។ រាល់អ្នកដំណើរត្រូវបានតម្រូវឲ្យធ្វើតេស្តរកកូវីដនៅពេលចូលដល់ក្នុងទឹកដីថៃ ហើយពួកគេត្រូវចំណាយពេលមួយយប់ស្នាក់នៅ សណ្ឋាគារដែលរៀបចំដោយរដ្ឋាភិបាលថៃដើម្បីរង់ចាំលទ្ធផល មុនពេលត្រូវបានអនុញ្ញាតឲ្យធ្វើដំណើរដោយសេរីនៅទូទាំងប្រទេសអាស៊ីមួយនេះ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ