កូរ៉េខាងត្បូងយកលុយបង្កករបស់អ៊ីរ៉ង់បង់ទៅឲ្យអង្គការសហប្រជាជាតិ
កូរ៉េខាងត្បូងបានប្រើលុយអ៊ីរ៉ង់ដែលខ្លួនបានបង្កកទុកចំនួន ១៨លានដុល្លារ ដើម្បីបង់ទៅឲ្យអង្គការសហប្រជាជាតិដែលអ៊ីរ៉ង់បានជំពាក់។ ចំណាត់ការរបស់កូរ៉េខាងត្បូងនេះនឹងជួយឲ្យអ៊ីរ៉ង់ ទទួលបានសិទ្ធិបោះឆ្នោតជាថ្មីនៅមហាសន្និបាតអង្គការសហប្រជាជាតិ។
ចុះផ្សាយនៅថ្ងៃ៖
ស្តាប់ - ០១:៥៥
ការបង់ប្រាក់ខាងលើនេះត្រូវបានធ្វើឡើងកាលពីថ្ងៃសុក្រ ក្នុងកិច្ចសហប្រតិបត្តិការជាមួយសហរដ្ឋអាមេរិកនិងអង្គការសហប្រជាជាតិ បន្ទាប់ពីប្រទេសអ៊ីរ៉ង់បានស្នើជាបន្ទាន់សុំឲ្យកូរ៉េខាងត្បូងជួយបង់ប្រាក់ដែលខ្លួនជំពាក់អង្គការសហប្រជាជាតិ។
ក្រសួងការបរទេសកូរ៉េខាងត្បូងបាននិយាយនៅថ្ងៃអាទិត្យនេះពីក្តីរំពឹងរបស់ខ្លួនថាសិទ្ធិបោះឆ្នោតរបស់អ៊ីរ៉ង់នៅអង្គការសហប្រជាជាតិនឹងមានសុពលភាពឡើងវិញភ្លាមៗ បន្ទាប់ពីត្រូវបានព្យួរកាលពីដើមខែនេះដោយសារបញ្ហានៃការទូទាត់បង់ប្រាក់។
សូមបញ្ជាក់ជូនថា មានថវិការបស់អ៊ីរ៉ង់ចំនួនជាង ៧ ពាន់លានដុល្លារដែលត្រូវបានបង្កកនៅធនាគារកូរ៉េខាងត្បូងចំនួនពីរដោយសារតែការដាក់ទណ្ឌកម្មរបស់អាមេរិក។ នៅមជ្ឈិមបូព៌ា សាធារណរដ្ឋឥស្លាមគឺជាដៃគូពាណិជ្ជកម្មធំជាងគេទី៣របស់កូរ៉េខាងត្បូង មុនពេលដែលសហរដ្ឋអាមេរិក បានដកខ្លួនជាឯកតោភាគីចេញពីកិច្ចព្រមព្រៀងនុយក្លេអ៊ែរឆ្នាំ២០១៥ រវាងទីក្រុងតេហេរ៉ង់ និងប្រទេសមហាអំណាចពិភពលោក និងបន្ទាប់មកទៀតបានដាក់ទណ្ឌកម្មយ៉ាងធ្ងន់ធ្ងរលើអ៊ីរ៉ង់រួមទាំងការហាមឃាត់ជាលើការនាំចេញប្រេងរបស់អ៊ីរ៉ង់ផង។
គួររំឭកជូនដែរថា អ៊ីរ៉ង់បានបាត់បង់បង់សិទ្ធិបោះឆ្នោតរបស់ខ្លួនម្តងហើយដែរកាលពីឆ្នាំមុន ដោយសារតែមិនអាចបង់ប្រាក់ដែលខ្លួនជំពាក់ទៅឲ្យអង្គការសហប្រជាជាតិតាមកាលកំណត់។ ទីក្រុងតេហេរ៉ងកាលណោះនិយាយថាខ្លួនមិនអាចបង់លុយសូម្បីតែក្នុងចំនួនអប្បបរមាព្រោះតែទណ្ឌកម្មសេដ្ឋកិច្ចរបស់សហរដ្ឋអាមេរិក។
យ៉ាងណាក៏ដោយ ក្រោយការចរចាជាច្រើនខែ អ៊ីរ៉ង់ត្រូវបានផ្តល់ការលើកលែងដោយទទួលបានការអនុញ្ញាតឲ្យប្រើប្រាស់លុយដែលត្រូវបានបង្កកដោយរតនាគារអាមេរិក និងទទួលបានសិទ្ធិបោះឆ្នោតឡើងវិញនៅក្នុងខែមិថុនា សម្រាប់ការបោះឆ្នោតជ្រើសរើសសមាជិកថ្មីនៃក្រុមប្រឹក្សាសន្តិសុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ