អ៊ីរ៉ង់បង្ហោះកាំជ្រួចអវកាស ចំពេលកំពុងផ្តើមបើកកិច្ចចរចានុយក្លេអ៊ែរឡើងវិញ
អ៊ីរ៉ង់បានប្រកាសជូនដំណឹង នៅថ្ងៃព្រហស្បតិ៍ទី ៣០ធ្នូ ២០២១នេះ ស្តីពីការបាញ់បង្ហោះរ៉ុកកែត ពាំកាំជ្រួចស្រាវជ្រាវ ចំនួនបីគ្រឿង ទៅក្នុងអវកាស។ គម្រោងស្រាវជ្រាវអវកាសនេះច្បាស់ជានឹងធ្វើឱ្យសហគមន៍លោកខាងលិច ដែលទើបបើកកិច្ចចរចានុយក្លេអ៊ែរអ៊ីរ៉ង់ឡើងវិញ ខឹង និងថ្កោលទោសក្រុងតេហេរ៉ង់ ជាក់ជាពុំខាន។
ចុះផ្សាយនៅថ្ងៃ៖
ស្តាប់ - ០២:២៧
ការបាញ់រ៉ុកកែតបង្ហោះផ្កាយរណបSimorgh បានពាំម៉ាស៊ីនស្រាវជ្រាវអវកាសចំនួនបីគ្រឿង នៅក្នុងលំហអាកាស។ នេះបើតាមសេចក្តីជូនដំណឹងរបស់អ្នកនាំពាក្យស្ថាប័នអវកាសនៃក្រសួងការពារជាតិអ៊ីរ៉ង់ លោក Ahmad Hosseini ដែលបានបញ្ជាក់ទៀតថា គម្រោងការស្រាវជ្រាវអវកាសអ៊ីរ៉ង់ បានសម្រេចកម្មវត្ថុរបស់ខ្លួនហើយ។
ដោយមិនផ្តល់ព័ត៌មានលម្អិត លោក Hosseini បានអះអាងថា នេះជាការបាញ់សាកល្បងទេ ហើយប្រតិបត្តិការមែនទែននឹងប្រព្រឹត្តទៅនៅក្នុងពេលអនាគតដ៏ឆាប់ៗនេះ។ សារព័ត៌មានអ៊ីរ៉ង់ក្នុងស្រុក មិនបានបញ្ជាក់ថាតើកាំជ្រួចនេះបាញ់ចេញពីទីណាទេ។ ទូរទស្សន៍ជាតិ បានត្រឹមបង្ហាញរូបភាពខ្លីមួយ នៃការបាញ់រ៉ុកកែតចេញពីទីវាលខ្សាច់ដាច់កន្ទុយភ្នែក ជាមួយសារអបអរកោតសរសើរស្នាដៃថ្មីមួយទៀតរបស់ក្រុមអ្នកវិទ្យាសាស្ត្រអ៊ីរ៉ង់តែប៉ុណ្ណោះ។
បើតាមសារព័ត៌មានអាមេរិក ចេញផ្សាយកាលពីដើមខែធ្នូ ដោយមានសម្រង់សំដីរបស់អ្នកជំនាញនិងរូបភាពផ្កាយរណបជាសំអាង សាធារណរដ្ឋអ៊ីស្លាមអ៊ីរ៉ង់ បានត្រៀមលក្ខណៈបាញ់កាំជ្រួចចេញពីមជ្ឈមណ្ឌលអវកាសSemnan ដែលស្ថិតនៅភាគខាងកើតចម្ងាយប្រមាណ៣០០គីឡូម៉ែត្រពីរដ្ឋធានីតេហេរ៉ង់។
ប៉ុន្តែអ្វីជាការគួរឱ្យកត់សម្គាល់ខ្លាំង ការបាញ់បង្ហោះផ្កាយរណបសាកល្បងអ៊ីរ៉ង់នេះ ប្រព្រឹត្តទៅក្នុងខណៈដែលអ៊ីរ៉ង់និងក្រុមប្រទេសមហាអំណាច បារាំង អង់គ្លេស អាល្លឺម៉ង់ រុស្ស៊ី ចិន កំពុងចាប់ផ្តើមជួបប្រជុំគ្នា ដើម្បីស្តារកិច្ចព្រមព្រៀងនុយក្លេអ៊ែរអ៊ីរ៉ង់សម្រេចបានកាលពីឆ្នាំ២០១៥ បន្ទាប់ពីជាប់គាំងអស់ជាច្រើនខែ។ ការចរចាឡើងវិញ ដោយមានសហរដ្ឋអាមេរិកចូលរួមដោយប្រយោល ដែលបើតាមភាគីអ៊ីរ៉ង់ផ្ទាល់ កំពុងទទួលលទ្ធផលគួរជាគាប់ចិត្ត អាចនឹងត្រូវជួបភាពរអាក់រអួលជាថ្មី ដោយសារការបាញ់បង្ហោះកាំជ្រួចថ្ងៃនេះ។ បស្ចឹមលោកច្បាស់ជានឹងខឹងសម្បារ ហើយធ្វើការថ្កោលទោស អ៊ីរ៉ង់ថាបានរំលោភកិច្ចព្រមព្រៀងអន្តរជាតិដែលអ៊ីរ៉ង់សន្យាបញ្ឈប់រាល់គ្រប់សកម្មភាពនុយក្លេអ៊ែរ មីស៊ីលបាលីស្ទិក រាប់ទាំងការបាញ់សាកល្បងដោយប្រើបច្ចេកវិទ្យាមីស៊ីលបាលីស្ទីកផង។
សូមបញ្ជាក់ថា តាំងពីឆ្នាំ២០២០មក អ៊ីរ៉ង់បានបង្កើនសកម្មភាពអវកាស ដោយបានបាញ់បង្ហោះផ្កាយរណបយោធា ស៊ីវិលជាច្រើនលើកសាតែមិនបានជោគជ័យ។ បស្ចឹមលោកក៏ដូចជាសហរដ្ឋអាមេរិក សង្ស័យថា អ៊ីរ៉ង់កំពុងតែសាកល្បងអភិវឌ្ឍបច្ចេកវិទ្យាអវកាស ដើម្បីឈានទៅសម្រេចបច្ចេកវិទ្យាបាញ់មីស៊ីលបាលីស្ទិករយៈឆ្ងាយមានពាំអាវុធនុយក្លេអ៊ែរបាន មិនមែនត្រឹមដើម្បីទាញប្រយោជន៍ពាណិជ្ជកម្មទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ