ចិនចេញមុខរិះគន់សាជាថ្មីទណ្ឌកម្មអាមេរិកទៅលើអ៊ីរ៉ង់
ចិនបានបញ្ជាក់សាជាថ្មី ជំហរប្រឆាំងរបស់ខ្លួនទៅនឹងការដាក់ទណ្ឌកម្មឯកតោភាគីរបស់អាមេរិកទៅលើអ៊ីរ៉ង់។ នេះជាការអះអាងរបស់រដ្ឋមន្រ្តីការបរទេសចិន វ៉ាង យី នៅក្នុងជំនួបទ្វេភាគីជាមួយរដ្ឋមន្រ្តីការបរទេសអ៊ីរ៉ង់ កាលពីសុក្រទី ១៤មករា។ ជំនួបរវាងប្រមុខការបរទេសចិន និងអ៊ីរ៉ង់ ធ្វើឡើង នៅក្នុងឱកាសសម្ពោធ ដាក់ឲ្យដំណើរការគម្រោងសហប្រតិបត្តិការសំដៅពង្រឹងចំណងសេដ្ឋកិច្ច និងនយោបាយរវាងប្រទេសទាំងពីរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
នៅក្នុងជំនួបប្រជុំជាមួយសមភាគីអ៊ីរ៉ង់ រដ្ឋមន្រ្តីការបរទេសចិន លោកវ៉ាង យីបាននិយាយបន្ទោសអាមេរិកថា ជាអ្នកទទួលខុសត្រូវសំខាន់លើបញ្ហាលំបាករបស់អ៊ីរ៉ង់សព្វថ្ងៃ ព្រោះអាមេរិកជាអ្នកដកខ្លួនដោយឯកតោភាគី ពីកិច្ចព្រមព្រៀងនុយក្លេអ៊ែរ នៅឆ្នាំ ២០១៨។
ទៅតាមកិច្ចព្រមព្រៀងនុយក្លេអ៊ែរឆ្នាំ ២០១៥ អ៊ីរ៉ង់ត្រូវសន្យាមិនអនុវត្តកម្មវិធីនុយក្លេអ៊ែរយោធា ជាថ្នូរនឹងការដកទណ្ឌកម្មសេដ្ឋកិច្ចអន្តរជាតិ។ ប៉ុន្តែ នៅក្រោយអាមេរិកក្រោមរដ្ឋបាលលោកដូណាល់ ត្រាំ ដកខ្លួនដោយឯកតោភាគី និងបានត្រលប់ទៅដាក់ទណ្ឌកម្មសេដ្ឋកិច្ចសាជាថ្មីលើអ៊ីរ៉ង់ អ៊ីរ៉ង់ក៏ចាប់ផ្តើមរំលោភកិច្ចសន្យាដែលមាននៅក្នុងកិច្ចព្រមព្រៀង ដូចជាត្រលប់ទៅចម្រើនសារធាតុអ៊ុយរ៉ាញ៉ូមក្នុងកម្រិតខ្ពស់ និងច្រើនជាងមុន។
ចិន និងអ៊ីរ៉ង់សុទ្ធតែជាប់រងទណ្ឌកម្មសេដ្ឋកិច្ចរបស់អាមេរិកដូចគ្នា។ នៅចំពោះមុខរដ្ឋមន្រ្តីការបរទេសអ៊ីរ៉ង់ ប្រមុខការបរទេសចិនបានអះអាងថា ចិនដែលជាហត្ថលេខីមួយនៃកិច្ចព្រមព្រៀងនុយក្លេអ៊ែរអ៊ីរ៉ង់ ប្រឆាំងដាច់ខាត ការដាក់ទណ្ឌកម្មខុសច្បាប់ ដោយឯកតោភាគី លើអ៊ីរ៉ង់ ដោយយកបញ្ហារំលោភសិទ្ធិមនុស្សមកធ្វើជាលេស។ ចិនប្រឆាំងដាច់ខាតការលូកដៃក្នុងកិច្ចការរបស់អ៊ីរ៉ង់ និង ប្រទេសផ្សេងទៀតនៅក្នុងតំបន់។ នេះជាប្រសាសន៍របស់ប្រមុខការបរទេសចិន លោកវ៉ាង យី។
នៅថ្ងៃសុក្រលោកវ៉ាងយី បានទទួលជួបរដ្ឋមន្រ្តីការបរទេសអ៊ីរ៉ង់ នៅខេត្តធៀនស៊ូ នៅក្នុងឱកាសបើកសម្ពោធដាក់ឲ្យដំណើរការជាផ្លូវការគម្រោងសហប្រតិបត្តិការសេដ្ឋកិច្ច ដែលប្រទេសទាំងពីរបានចុះហត្ថលេខារួមគ្នា កាលពីខែមីនាឆ្នាំមុន។
ទៅតាមកិច្ចព្រមព្រៀងរយៈពេល២៥ឆ្នាំដែលនឹងធ្វើឲ្យអ៊ីរ៉ង់ក្លាយជាប្រទេសដៃគូមួយទៀត នៅក្នុងគម្រោងផ្លូវមួយ ខ្សែក្រវ៉ាត់របស់ចិន សហប្រតិបត្តិការចិន អ៊ីរ៉ង់នឹងផ្តោតសំខាន់លើផ្នែកថាមពល ហេដ្ឋារចនាសម្ព័ន្ធ កសិកម្ម សុខភាព និងសន្តិសុខព័ត៌មានវិទ្យាជាដើម។ នៅក្នុងផ្នែកថាមពល ចិនជាអតិថិជនទិញនាំចូលប្រេងធំជាងគេរបស់អ៊ីរ៉ង់ នៅក្នុងខណៈពេលដែលវិស័យនាំចេញប្រេងរបស់អ៊ីរ៉ង់ត្រូវរឹតត្បិតមិនអាចនាំចេញទៅលក់នៅបរទេស ដោយសារគំនាបទណ្ឌកម្មសេដ្ឋកិច្ចរបស់អាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ