ពលរដ្ឋជប៉ុន ប្តឹងតុលាការឱ្យទទួលស្គាល់ថាធាតុវិទ្យុសកម្មហ្វូគូស្ហ៊ីម៉ានាំឱ្យមានជំងឺមហារីក
ពលរដ្ឋជប៉ុន ចំនួន៦នាក់ អាយុពី ១៧ ទៅ២៧ឆ្នាំ បានដាក់ពាក្យបណ្តឹងជាសមូហភាព ទៅតុលាការ ឱ្យទទួលស្គាល់ថាការធ្លាយសារធាតុវិទ្យុសកម្ម ពេលមានគ្រោះថ្នាក់នុយក្លេអ៊ែរនៅហ្វូគូស្ហ៊ីម៉ា កាលពី២០១១ អាចបង្កឱ្យមានជំងឺមហារីក។ បើតាមដើមបណ្តឹង ពួកគេមានជំងឺមហារីកក្រពេញ Thyroïde ដោយហេតុតែបានប្រឈមនឹងសារធាតុវិទ្យុសកម្មធ្លាយចេញពីហ្វូគូស្ហ៊ីម៉ានោះឯង។
ចុះផ្សាយនៅថ្ងៃ៖
ស្តាប់ - ០២:៣៣
ដើមបណ្តឹងទាំង៦រូប ដែលក្នុងពេលមានគ្រោះថ្នាក់នុយក្លេអ៊ែរ នៅជាកុមារ និងជាក្មេងជំទង់ រស់នៅក្នុងតំបន់ហ្វូគូស្ហ៊ីម៉ា បានធ្លាក់ខ្លួនឈឺមានជំងឺមហារីកក្រពេញTyroïde នៅចន្លោះពីឆ្នាំ ២០១២-២០១៨។ អ្នកជំងឺមហារីកបួននាក់បានទទួលការព្យាបាលដោយវះកាត់យកក្រពេញThyroïdeចេញទាំងស្រុង ដែលតម្រូវឱ្យពួកគេលេបថ្នាំអ័រមូនអស់មួយជីវិត។ ពីរនាក់ទៀត រងការវះកាត់ក្រពេញចេញមួយផ្នែក។ ដោយសារអាការៈជំងឺនេះ ពួកគេមិនអាចមានជីវិតធម្មតាដូចក្មេងដទៃ មិនអាចរៀនសូត្រនិងរកការងារធ្វើបានតាមក្តីស្រមៃទេ។
ហេតុដូច្នេះហើយបានជាពួកគេដាក់បណ្តឹងទៅតុលាការឱ្យទទួលស្គាល់ថាជំងឺមហារីកនេះកើតឡើងដោយសារធាតុវិទ្យុសកម្ម និងទារសំណងជំងឺចិត្ត ចំនួន៤,៨លានអឺរ៉ូ ពីក្រុមហ៊ុន Tepco តិបកូ ដែលម្ចាស់មជ្ឈមណ្ឌលនុយក្លេអ៊ែរ Fukushima Daiichi ។
អាជ្ញាធរជប៉ុន មិនទទួលស្គាល់ជាផ្លូវការថាការប្រឈមនឹងធាតុវិទ្យុសកម្មធ្លាយចេញពីរោងចក្រនុយក្លេអ៊ែរហ្វូគូស្ហ៊ីម៉ា នឹងបង្កឱ្យមានជំងឺមហារីកThyroideទេ។ របាយការណ៍អង្គការសហប្រជាជាតិចេញផ្សាយកាលពីឆ្នាំទៅ ក៏បានបញ្ជាក់ដូចគ្នាថា គ្មានរកឃើញឥទ្ធិពលអាក្រក់ប៉ះពាល់ដល់សុខភាពពីការធ្លាយសារធាតុវិទ្យុសកម្មហ្វូគូស្ហ៊ីម៉ាទេ។ ប៉ុន្តែបើតាមមេធាវីរបស់ដើមបណ្តឹងទាំង៦រូប ជំងឺមហារីករបស់កូនក្តី មិនមែនជាជំងឺតពូជទេ គឺទំនងខ្លាំងជាបណ្តាលមកពីការប្រឈមនឹងជាតិវិទ្យុសកម្មនេះម្តង។
នៅថ្ងៃព្រហស្បតិ៍ទី ២៧មករានេះ មេធាវីបាននាំបណ្តឹងទៅតុលាការក្រុងតូក្យូ។ ទីដែលសកម្មជន រាប់សិបនាក់ បានមកប្រមូលផ្តុំគ្នា ដើម្បីបញ្ចេញសកម្មភាពរួម គាំទ្រនិងការពារអ្នកជំងឺមហារីកទៀរ៉ូអ៊ីតបង្កឡើងដោយវិទ្យុសកម្ម។ នេះជាលើកទីមួយហើយប្រជាពលរដ្ឋជប៉ុនប្រមូលផ្តុំគ្នាធ្វើបាតុកម្មបែបនេះ។ ក្រុមហ៊ុនតិបកូបានសន្យាផ្តល់ចម្លើយដ៏ស្មោះសបំផុតនៅចំពោះមុខតុលាការ និងបានសុំទោសប្រជាពលរដ្ឋដែលរស់រងផលវិបាកពីគ្រោះហ្វូគូស្ហ៊ីម៉ាទាំងអស់។
សូមបញ្ជាក់ថា គ្រោះមហន្តរាយ រញ្ជួយដី រលកយក្សស៊ូណាមី និងគ្រោះថា្នក់នុយក្លេអ៊ែរ នៅថ្ងៃទី ១១មីនា២០១១ បានសម្លាប់ជីវិតមនុស្សអស់យ៉ាងហោច១៩០០០នាក់ និង ១០ម៉ឺននាក់ បានបង្ខំចិត្តចាកចោលលំនៅដ្ឋាន។ ក្រោយមក ផលវិបាកនៃគ្រោះមហន្តរាយ បានធ្វើឱ្យមនុស្សជាង២៣០០នាក់ ស្លាប់។ នេះបើតាមការអង្កេតផ្លូវការ។ រដ្ឋាភិបាលជប៉ុនបានទទួលស្គាល់ ជំងឺមហារីកជាគ្រោះថ្នាក់ក្នុងការងារ សម្រាប់បុគ្គលិកក្រុមហ៊ុនតិបកូ។
តាំងពីគ្រោះមហន្តរាយនុយក្លេអ៊ែរនោះមក អាជ្ញាធរខេត្តហ្វូគូស្ហ៊ីម៉ា បានធ្វើតេស្តលើប្រជាពលរដ្ឋអាយុ១៨ឆ្នាំ និងក្រោម១៨ឆ្នាំចំនួន ៣៨ម៉ឺននាក់ ដោយរកឃើញ២៦៦នាក់ មានសង្ស័យកើតជំងឺមហារីកក្រពេញThyroïde គិតត្រឹមខែមិថុនាឆ្នាំ២០២១។ នៅក្នុងរបាយការណ៍ចេញផ្សាយកាលពីដើមឆ្នាំ២០២១ គណៈកម្មការអង្គការសហប្រជាជាតិខាងសិក្សាឥទ្ធិពលវិទ្យុសកម្ម បានកត់សម្គាល់ឃើញមានកំណើនករណីសង្ស័យច្រើនខ្លាំងនៅហ្វូគូស្ហ៊ីម៉ាដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ