ចិនបង្កើនការឃ្លាំមើលបណ្តាញសង្គម និងសកម្មជនសិទ្ធមនុស្ស ពេលកីឡាអូឡាំពិក
នៅថ្ងៃសុក្រ ទី ៤ កុម្ភៈ ស្អែក ជាថ្ងៃបើកកីឡាអូឡាំពិកប៉េកាំងជាផ្លូវការ។ ជាម្ចាស់កម្មវិធី ចិនបានរឹតបន្តឹងសុវត្ថិភាពសុខាភិបាលប្រឆាំងនឹងជំងឺរាតត្បាតកូវីដ១៩ផង និងសុវត្ថិភាពសន្តិសុខសាធារណៈយ៉ាងខ្លាំងបំផុតផង។ អាជ្ញាធរបានបង្កើនការឃ្លាំមើល បណ្តាញសង្គម និងបង្កើនការបង្ឃាំងសកម្មជនគាំទ្រសេរីភាព ក្នុងគេហដ្ឋាន។
ចុះផ្សាយនៅថ្ងៃ៖
ស្តាប់ - ០២:១០
អ្នកបំរើការក្នុងកីឡាអូឡាំពិកប៉េកាំង២០២២គ្រប់រូបតាំងពីចុងភៅដល់ភ្នាក់ងារសន្តិសុខ ត្រូវឆ្លងកាត់ការធ្វើតេស្តកូវីដ១៩ យ៉ាងទៀតទាត់ ពេញមួយអំឡុងពេលប្រកួតកីឡា។
សុវត្ថិភាពកូវីដ១៩ ជាពិសេសសន្តិសុខសាធារណៈ ត្រូវបានរឹតបន្តឹងយ៉ាងខ្លាំង។ នៅលើដងរុក្ខវិថីនាំទៅមណ្ឌលអ្នកសារព័ត៌មាន ចិនបានដាក់បញ្ឈរកាមេរ៉ា តាមបង្គោលភ្លើងផង កាមេរ៉ាចល័តផង ព្រមទាំងកងស្ម័គ្រចិត្តក្នុងឯកសណ្ឋានអាវរងារក្រហម ពាក់ម៉ាស់ “ជយោចិន”ផង ចាំឃ្លាំមើលរហូត ដើម្បីរក្សាសុវត្ថិភាពព្រឹត្តិការណ៍កីឡា។
គ្រប់អាកប្បកិរិយា និងសំដី ដែលផ្ទុយនឹងស្មារតីកីឡា ឬផ្ទុយនឹងច្បាប់ ផ្ទុយនឹងវិធានជាតិ នឹងត្រូវទទួលទណ្ឌកម្មទាំងអស់ ! នេះបើតាមការព្រមានរបស់លោកនាយករងគណៈកម្មការអូឡាំពិកប៉េកាំង។ អាជ្ញាធរថែមទាំងតាមដាននិងឃ្លាំមើល មិនដាច់ពីភ្នែកទេ នូវរាល់ពាក្យស្លោក សរសេរនៅលើអាវអត្តពលិកទាំងអស់ ក្រែងមានន័យសម្តែងសាមគ្គីភាពគាំទ្រកីឡាការិនី ផីង ស្ហយ ដែលបានបាត់ខ្លួនដោយចម្លែកក្រោយពីបានចោទអ្នកទទួលខុសត្រូវចិនម្នាក់ពីបទបំពារបំពានផ្លូវភេទ ឬមានលក្ខណៈគាំទ្រដល់ជនជាតិភាគតិចអ៊ុយហ្គួរ ប្រជាធិបតេយ្យនៅហុងកុង ឬបញ្ហាសិទ្ធិមនុស្សជាទូទៅនៅចិន។
ក្នុងខណៈដែលគ្រប់ចក្ខុកំពុងផ្តោចតម្រង់ទៅចិន អាជ្ញាធរចិនបានចាត់និងដំឡើងវិធានការបិទខ្ទប់រាល់គ្រប់សំឡេងប្រឆាំង នៅគ្រប់ទិសទីទាំងអស់។ សកម្មជនសិទ្ធិមនុស្សម្នាក់បានរៀបរាប់ថា ប៉ូលិសបានមកឃ្លាំមើល មិនឱ្យចេញពីផ្ទះតាំងពីជាច្រើនសប្តាហ៍មកហើយ។ គណនីបណ្តាញសង្គមរបស់អតីតអ្នកកាសែតម្នាក់ត្រូវបានព្យួរ។ មេធាវី ក៏រងការព្រមានមិនឱ្យចេញស្តីក្នុងអំឡុងកីឡាអូឡាំពិកនេះដែរ។
នេះជាវិធានការតែមួយដែលចិនធ្លាប់ប្រើក្នុងសម័យប្រកួតកីឡាអូឡាំពិករដូវក្តៅឆ្នាំ២០០៨ និងរាល់ពេលមានព្រឹត្តិការណ៍សំខាន់ៗផ្សេង។ ស្ថានភាពសិទ្ធិមនុស្សនៅចិនពេលនេះអាក្រក់ជាងកាលពីឆ្នាំ២០០៨ទៅទៀត ព្រោះបើតាមមេធាវីចិនម្នាក់ដែលនិរទេសទៅសហរដ្ឋអាមេរិក ពេលនេះ ចិនមានអំណាចខ្លាំង រហូតលែងខ្លាចសម្ពាធអន្តរជាតិ។
ក្រុមប្រតិភូកីឡាអូឡាំពិកតែអាចមានប្រព័ន្ធWIFIប្រើប្រាស់ ក្នុងភូមិអូឡាំពិក និង បណ្តាញអ៊ីនធ័រនែត ប្រព័ន្ធសង្គម ហ្វេសប៊ុក ទ្វីតទ័រ ... បានភ្ជាប់ទាល់តែមាន VPNចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ