ប៉េកាំងបង្ហាញឈ្មោះមេដឹកនាំបរទេសដែលមានវត្តមាននៅក្នុងការប្រកួតកីឡាអូឡាំពិករដូវរងា
នៅមួយសប្តាហ៍មុន ការប្រកួតកីឡាអូឡាំពិក រដូវរងា ដែលត្រូវរៀបចំពីថ្ងសទី ៤ ដល់ទី ២០កុម្ភៈ ប៉េកាំងបានបង្ហាញបញ្ជីឈ្មោះមេដឹកនាំបរទេសដែលនឹងមានវត្តមាននៅក្នុងកម្មវិធីបើកសម្ពោធកីឡាអូឡាំពិក។ ដោយសារពហិការរបស់ប្រទេសលោកខាងលិច នាំមុខដោយអាមេរិក បញ្ជីឈ្មោះមេដឹកនាំបរទេស ដែលមានវត្តមាននៅទីក្រុងប៉េកាំង មិនសូវវែង ចំណែកមេដឹកនាំ បរទេសភាគច្រើនមកពីបណ្តាប្រទេស ដែលកំពុងរងការចោទប្រកាន់ថា ក្នុងរឿងរំលោភសិទ្ធិមនុស្ស។
ចុះផ្សាយនៅថ្ងៃ៖
ស្តាប់ - ០២:២៣
ប្រទេសលោកខាងលិច ដែលមានអាមេរិកនាំមុខ បានធ្វើពហិកា ការទូត ដោយមិនទៅចូលរួមក្នុងកម្មវិធីបើកសម្ពោធការប្រកួតកីឡាអូឡាំពិក រដូវរងា ដើម្បីបរិហាររិះគន់ការរំលោភសិទ្ធិជនជាតិអ៊ុយហ្គួរ នៅខេត្តស៊ីនជាំង។
ទៅតាមពហិកាការទូត អាមេរិក និងប្រទេសអឺរ៉ុបជាច្រើននឹងមិនបញ្ជូនមន្រ្តីផ្លូវការទៅចូលរួមក្នុងព្រឹត្តិការណ៍កីឡាអូឡាំពិកនោះទេ ប៉ុន្តែ ក្រុមកីឡាករ ជម្រើសជាតិរបស់ពួកគេនៅតែអាចទៅចូលរួមក្នុងការប្រកួតដូចធម្មតា។
ដោយសារតែពហិការរបស់ប្រទេសលោកខាងលិច រដ្ឋាភិបាលចិន ងាកបែរ ទៅរកបណ្តាប្រទេសមិត្ត របស់ចិន សម្រាប់បំពេញវេទិកាមេដឹកនាំបរទេស នៅថ្ងៃបើកសម្ពោធការប្រកួតកីឡាអូឡាំពិករដូវរងា ដែលត្រូវចាប់ផ្តើមពីថ្ងៃទី ៤ដល់ថ្ងៃទី ២០កុម្ភៈ នៅទីក្រុងប៉េកាំង។
តាមបញ្ជីដែលអាជា្ញធរចិនបានបង្ហាញជាផ្លូវការនៅថ្ងៃ សុក្រម្សិលមិញ គេឃើញមានឈ្មោះមេដឹកនាំបរទេសមួយចំនួន ដែលកំពុងមានទំនាក់ទំនងល្អក់កករ ជាមួយ ប្រទេសលោកខាងលិច ដូចជាលោកប្រធានាធិបតីរុស្ស៊ី វ្លាឌីមៀរ ពូទីន ដែលក្នុងសំណុំរឿងអ៊ុយក្រែន។
ប្រធានាធិបតី រុស្ស៊ី អាចមានវត្តមាន នៅទីក្រុងប៉េកាំង ដោយមកពីមានការអញ្ជើញពិសេស ផ្ទាល់ពីរដ្ឋាភិបាលចិន ព្រោះថា ទៅតាមការសម្រេចរបស់គណៈកម្មការអូឡាំពិកអន្តរជាតិ រាល់កីឡាករ និងមន្រ្តីរដ្ឋាភិបាលរុស្ស៊ី ដែលនៅក្នុងនោះ មានផងដែរ លោកប្រធានាធិបតីពូទីន នឹងត្រូវហាមឃាត់មិនឲ្យមានវត្តមាន ក្នុងការប្រកួតអន្តរជាតិកីឡាអូឡាំពិករហូតដល់ចុងឆ្នាំ២០២២ ដោយសាររឿងអាស្រូវកីឡាករលួចប្រើថ្នាំបំប៉នកម្លាំង នៅក្នុងពេលការប្រកួតកន្លងមក។ នៅក្នុងការប្រកួតកីឡាអូឡាំពិកនៅប៉េកាំង ឆ្នាំ ២០២២ កីឡាកររុស្ស៊ី ដែលស្អាតស្អំ គ្មានជាប់ពាក់ព័ន្ធនឹងរឿងអាស្រូវ អាចចូលរួមប្រកួតបាន ប៉ុន្តែ នៅក្រោម ស្លាកឈ្មោះ អព្យាក្រិត្យ ពោលគឺមិនមែនតំណាងឲ្យក្រុមកីឡាកររុស្ស៊ីនោះទេ។
ក្រៅពីប្រធានាធិបតីរុស្ស៊ី គេឃើញមាន ឈ្មោះ ប្រធានាធិបតីអេហ្ស៊ីប និងប្រធានាធិបតីកាហ្សាក់ស្ថាន ដែលរងការចោទប្រកាន់ថា បានរំលោភសិទ្ធិមនុស្ស និងបើកការបង្រ្កាបដ៏ហិង្សា ទៅលើបាតុករកាលពីពេលថ្មីៗនេះ។ ចំណែកប្រធានាធិបតីប៉ូឡូញ ជាមេដឹកនាំអឺរ៉ុបដ៏កម្រ ដែលបានយល់ព្រមទទួលលិខិតអញ្ជើញរបស់ប៉េកាំង សម្រាប់កីឡាអូឡាំពិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ