កូវីដ១៩ ៖ ឥណ្ឌូណេស៊ី ប្រកាសធ្វើការសាកល្បងថ្នាំបង្ការ « Made In Indonesia »
បន្ទាប់ពីបានទទួលការអនុញ្ញាតពីអាជ្ញាធរសុខាភិបាលជាតិ ឥណ្ឌូណេស៊ីបានប្រកាសនៅថ្ងៃពុធទី ៩ កុម្ភៈ២០២២នេះ ចាប់ផ្តើមធ្វើការសាកល្បងថ្នាំបង្ការប្រឆាំងកូវីដ១៩ លើមនុស្ស។ តាមរដ្ឋមន្ត្រីក្រសួងសុខាភិបាលឥណ្ឌូណេស៊ី សង្ឃឹមថាថ្នាំបង្ការនឹងធ្វើចរាចរណ៍ ជាទូទៅបាននៅពាក់កណ្តាលឆ្នាំនេះ។
ចុះផ្សាយនៅថ្ងៃ៖
ស្តាប់ - ០២:០៨
"Merah Putih" ថ្នាំក្រហមស ជាឈ្មោះថ្នាំបង្ការកូវីដតំណាងពណ៌ទង់ជាតិឥណ្ឌូណេស៊ី ចូលដល់ដំណាក់កាលសាកល្បងលើមនុស្ស ចាប់ពីថ្ងៃពុធទី ៩កុម្ភៈទៅ។ គឺសកលវិទ្យាល័យ Airlangga និងមន្ទីរពិសោធន៍ជាតិឥណ្ឌូណេស៊ី Biotis Pharmaceuticals Indonesia ជាអ្នកដឹកនាំធ្វើតេស្តសាកល្បងថ្នាំបង្ការកូវីដ។ ការសាកល្បងលើមនុស្ស ប្រព្រឹត្តទៅជាពីរដំណាក់កាល ដោយមួយដំណាក់កាលៗ ឥណ្ឌូណេស៊ីគ្រោងនឹងចាក់ថ្នាំលើមនុស្សចំនួន ៩០នាក់ នៅដំណាក់កាលទីមួយ និង៤០៥នាក់នៅដំណាក់កាលទីពីរ។
ប្រសិនបើការសាកល្បងបានទទួលលទ្ធផលដូចការរំពឹងទុក ថ្នាំបង្ការកូវីដរបស់ឥណ្ឌូណេស៊ី អាចនឹងទទួលបានការអនុញ្ញាតឱ្យធ្វើចរាចរណ៍នៅក្នុងស្រុក នៅពាក់កណ្តាលឆ្នាំនេះតែម្តង។ នេះបើតាមការគូសបញ្ជាក់របស់លោក Budi Gunadi Sadikin រដ្ឋមន្ត្រីក្រសួងសុខាភិបាល ដោយព្រលយទៀតថា ឥណ្ឌូណេស៊ីក៏មានគម្រោងចែកចាយថ្នាំ បង្ការ ទៅឱ្យបណ្តាប្រទេសផ្សេងទៀតដែលត្រូវការ។ លោករដ្ឋមន្ត្រីបានពិភាក្សានិងបានទទួលការព្រមព្រៀងពីប្រធានាធិបតីឥណ្ឌូណេស៊ីរួចហើយដែរ។
ជាងនេះទៅទៀត Marah Putih ជាថ្នាំបង្ការ Halal ព្រោះមានការបញ្ជាក់និងការទទួលស្គាល់ពីក្រុមប្រឹក្សាជាតិអ៊ូឡេម៉ាឥណ្ឌូណេស៊ី ដែលជាស្ថាប័នសាសនាកំពូលនៅប្រទេសឥស្លាមដ៏ធំជាងគេនៅលើពិភពលោក។ នេះបើតាមសាកលវិទ្យាធិការនៃ សាកលវិទ្យាល័យ AirlanggaលោកMohammad Nasih។
សូមបញ្ជាក់ថា កាលពីខែកក្កដាកន្លងទៅ រលកចម្លងរាតត្បាតកូវីដយ៉ាងខ្លាំងក្លា បានធ្វើឱ្យប្រព័ន្ធសុខាភិបាលឥណ្ឌូណេស៊ីរងសម្ពាធយ៉ាងខ្លាំង មន្ទីរពេទ្យចាល់ណែន ខ្វះសព្វខ្វះគ្រប់ ជាពិសេសគឺខ្វះខ្យល់អុកស៊ីហ្សែនតែម្តង ដែលអ្នកជំងឺខ្លះត្រូវបង្ខំចិត្តស្វែងរកបំពង់អុកស៊ីហ្សែននិងព្យាបាលដោយខ្លួនឯងនៅតាមផ្ទះ។
ជាសរុបឥណ្ឌូណេស៊ីរាប់ឃើញមានអ្នកស្លាប់ដោយកូវីដ១៩សរុបចំនួន ជាង១៤៥០០០នាក់ ហើយមេរោគកូវីដបំប្លែងខ្លួនថ្មី អូមីក្រុងកំពុងបន្តចម្លងក្នុងស្រុក ដោយមានអ្នកឆ្លងថ្មី ប្រមាណ៣ម៉ឺននាក់ ក្នុងមួយថ្ងៃៗ។
មានប្រជាជនច្រើនជាងគេលំដាប់ទី៤ពិភពលោក ឥណ្ឌូណេស៊ីមិនអាចទទួលបានថ្នាំវ៉ាក់សាំងគ្រប់គ្រាន់សម្រាប់ចាក់ជូនប្រជាពលរដ្ឋជាង២៧០លាននាក់ទេ។ រហូតមកទល់ពេលនេះ មានពលរដ្ឋឥណ្ឌូណេស៊ីតែ៤៨%ប៉ុណ្ណោះបានទទួលវ៉ាក់សាំង បាន២ដូស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ