ជំនួយការនាយករដ្ឋមន្ត្រីថៃស្វះស្វែងបណ្តេញអង្គការAmnesty Internationalចេញពីប្រទេស
ជំនួយការម្នាក់របស់នាយករដ្ឋមន្រ្ដីថៃ បាននិយាយកាលពីថ្ងៃសុក ទី១១ កុម្ភៈម្សិលមិញថា លោកកំពុងស្វះស្វែងបណ្តេញអង្គការ Amnesty International ចេញពីប្រទេស។ ជាការគួរឲ្យកត់សម្គាល់ ផែនការនេះបានកើតឡើងនៅក្រោយពេលដែលក្រុមអ្នករាជានិយមជ្រុលថៃ ចោទអង្គការAmnesty ថាបានធ្វើសកម្មភាពដែលប៉ះពាល់ដល់សន្តិសុខជាតិ។
ចុះផ្សាយនៅថ្ងៃ៖
ស្តាប់ - ០២:១៦
លោក សេកសាកុល អាតថាវ៉ុង (Seksakol Atthawong) ដែលមានតួនាទីជាអនុរដ្ឋមន្ត្រីនៅការិយាល័យរបស់លោកនាយករដ្ឋមន្ត្រី ប្រាយុទ្ធ ចាន់អូចា ឲ្យដឹងថាញត្តិប្រឆាំងនឹងវត្តមានរបស់អង្គការ Amnesty នៅក្នុងប្រទេសថៃទទួលបានហត្ថលេខាគាំទ្រចំនួន ១,២លានហត្ថលេខា ហើយនឹងត្រូវដាក់ជូនក្រុមប្រឹក្សាសន្តិសុខជាតិនិងក្រសួងមហាផ្ទៃនាសប្តាហ៍ក្រោយ។
ក្រុមអ្នករាជានិយមជ្រុលថៃបានចោទប្រកាន់អង្គការ Amnesty ដែលមានមូលដ្ឋាននៅទីក្រុងឡុងដ៍ប្រទេសអង់គ្លេសថាបានបញ្ឆេះបង្កចលាចល ដោយអំពាវនាវឲ្យបញ្ឈប់នូវការប្តឹងបទឧក្រិដ្ឋ ប្រឆាំងទៅនឹងបុគ្គលដែលជំរុញឲ្យមានការធ្វើកំណែទម្រង់របបរាជានិយមដែលជាស្ថាបន័គោរពដោយប្រជាជនថៃជាច្រើន។ ប្រជាជនថៃជាច្រើនដែលជាអ្នករាជានិយម បានចាត់ទុករបបនេះជារបបដ៏ពិសិដ្ឋ ហើយចាត់ទុកការប្រឈមណាមួយចំពោះរាជាធិបតេយ្យជាការគំរាមកំហែងដល់សង្គម។
គួររំឭកជូនថា ការប្រឆាំងតវ៉ាដ៏ធំដែលដឹកនាំដោយយុវជនថៃប្រឆាំងនឹងរដ្ឋាភិបាលរបស់លោកប្រាយុទ្ធបានកើតឡើងកាលពីចុងឆ្នាំ ២០២០។ កាលណោះ ក្រុមបាតុករគាំទ្រលទ្ធិប្រជាធិបតេយ្យ ក៏បានធ្វើការអំពាវនាវដែលមិនធ្លាប់មានពីមុនមក ឲ្យធ្វើកំណែទម្រង់របបរាជាធិបតេយ្យរហូតបង្កឲ្យមានការបង្ក្រាបដោយអាជ្ញាធរ។ តុលាការថៃ ក្រោយមកបានសម្រេចថាការទាមទារឲ្យធ្វើកំណែទម្រង់របបរាជានិយម គឺខុសច្បាប់។
មានសកម្មជនប្រជាធិបតេយ្យជាង ១ ៧០០នាក់ប្រឈមនឹងការចោទប្រកាន់ទាក់ទិននឹងរឿងសន្តិសុខ ក្នុងនោះមានមនុស្សយ៉ាងតិច ១៦៩ នាក់រងការចោទប្រកាន់ក្រោមច្បាប់ស្តីពីការជេរប្រមាថព្រះមហាក្សត្រយ៉ាងតឹងរ៉ឺងដែលអាចមានទោសជាប់ពន្ធនាគាររហូតដល់ ១៥ ឆ្នាំ។
ចំណែកចំណាត់ការថ្មីប្រឆាំងនឹងអង្គការ Amnesty International បានធ្លាក់មកស្របពេលដែលរដ្ឋាភិបាលថៃកំពុងតែងខ្នះខ្នែងអនុម័តច្បាប់គ្រប់គ្រងអង្គការ (មិនស្វែងរកប្រាក់ចំណេញ) ផងដែរ។ ក្រុមអង្គការក្នុងស្រុកនិងអន្តរជាតិជាង ១ ០០០ បានប្រឆាំងជំទាស់ទៅនឹងច្បាប់នេះ ដោយលើកឡើងថាវាគំរាមកំហែងដល់សង្គមស៊ីវិល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ