ពីរឆ្នាំក្រោយកូវីដ១៩ អូស្ត្រាលីចាប់បើកព្រំដែនទទួលទេសចរវ៉ាក់សាំង
បន្ទាប់ពីបិទខ្ទប់ប្រទេស យ៉ាងជិតឈឹង និងចាត់វិធានការទប់ស្កាត់ការរាតត្បាតកូវីដដ៏តឹងតែងជាងគេបំផុតនៅលើពិភពលោក អស់រយៈពេលជិតពេញពីរឆ្នាំមក អូស្ត្រាលីបានបើកព្រំដែនទទួលស្វាគមន៍ទេសចរបរទេសឡើងវិញ ចាប់ពីថ្ងៃចន្ទទី ២១កុម្ភៈនេះតទៅ។ ជើងហោះហើរអន្តរជាតិ អ្នកដំណើរមកពីអាមេរិក ជប៉ុន សិង្ហបុរី កាណាដា បានមកចុះថតលើអាកាសយានដ្ឋានអូស្ត្រាលី ជាបណ្តើរៗ តាំងពីព្រលឹមអុល។
ចុះផ្សាយនៅថ្ងៃ៖
ស្តាប់ - ០២:០៦
គ្មានអ្វីត្រូវរង់ចាំទៀតទេ ! សូមអញ្ជើញរៀបវ៉ាលីមកលេងអូស្ត្រាលីចុះ! នេះជាប្រសាសន៍របស់លោកនាយករដ្ឋមន្ត្រីអូស្ត្រាលី Scott Morrison ក្នុងសន្និសីទកាសែត។
ក្នុងរយៈពេល២៤ម៉ោងនៃថ្ងៃបើកព្រំដែនដំបូងឡើងវិញនេះ អូស្ត្រាលី ទទួលយន្តហោះអន្តរជាតិតែ៥៦ជើងប៉ុណ្ណោះ ពោលគឺទាបជាងសម័យមុនកូវីដឆ្ងាយណាស់ ប៉ុន្តែលោកនាយករដ្ឋមន្ត្រីមានជំនឿជាក់ថា ការហោះហើរអន្តរជាតិនឹងកើនឡើងជាលំដាប់នាថ្ងៃខាងមុខ។ ចំណែករដ្ឋមន្ត្រីក្រសួងទេសចរណ៍ លោកDan Tehan ដែលមានពាក់អាវយឺត សរសេរពាក្យ “សូមស្វាគមន៍” ក៏មានសុទិដ្ឋនិយមដូចគ្នាថាវិស័យទេសចរណ៍អូស្រ្តាលីនឹងសន្ទុះឡើងវិញ និងជាសន្ទុះដ៏ខ្លាំងក្លា។
រដ្ឋាភិបាលអូស្ត្រាលីបានចំណាយថវិកា៤០លានដុល្លារអូស្ត្រាលីដើម្បីផ្សាយពាណិជ្ជកម្ម ទាក់ទាញទេសចរ។ តែបើតាមក្រុមប្រឹក្សាអូស្ត្រាលីទទួលបន្ទុកទេសចរណ៍អន្តរជាតិ ដោយហេតុតែវិធានការទប់ស្កាត់តឹងតែងខ្លាំងពេក ភ្ញៀវបរទេសទំនងរអារខ្លាំង មិនងាយចង់ធ្វើដំណើរមកលេងអូស្ត្រាលីភ្លាមទេ។
សូមរំលឹកថា តាំងពីខែមីនា២០២០មក អូស្ត្រាលីបានបិទព្រំដែនជិតឈឹង ដើម្បីការពារខ្លួនពីកូវីដ១៩។ អាជ្ញាធរអនុញ្ញាតឱ្យពលរដ្ឋខ្លះអាចចាកចេញពីប្រទេសបាន តែទទួលឱ្យអ្នកដំណើរចូលប្រទេសតែក្នុងករណីពិសេសប៉ុណ្ណោះ។ វិធានការដ៏តឹងរឹង រហូតជាប់ឈ្មោះជាប្រទេសដាំបន្ទាយ បានជួយអូស្ត្រាលីមិនឱ្យរងការរាតត្បាត ក្នុងរយៈពេលដំបូង ប៉ុន្តែក្រោយមក ជាមួយអូមីក្រុង អូស្ត្រាលីបានធ្លាក់ក្នុងភាពយ៉ាប់យឺនខ្លាំង ដោយមានអ្នកស្លាប់រាប់សិបនាក់ និងអ្នកឆ្លងរាប់ម៉ឺននាក់ក្នុងមួយថ្ងៃៗ។
ជាសរុបក្នុងរយៈពេលជិតពីរឆ្នាំកន្លងមកនេះ កូវីដបានផ្តាច់ជីវិតជនអូស្ត្រាលីអស់៤៩១៣នាក់។ វិជ្ជមាន១៥២៩៨នាក់់ក្នុងថ្ងៃអាទិត្យម្សិលមិញ តែខ្លាំងបំផុតគឺនៅថ្ងៃទី ៣០មករា២០២២ ដោយមានករណីវិជ្ជមានដល់ទៅ ២៧៧៦១៩នាក់ក្នុងរយៈពេលតែ២៤ម៉ោង។
ជាផ្លូវការអូស្ត្រាលីចាប់បើកព្រំដែននៅថ្ងៃចន្ទទី ២១កុម្ភៈនេះមែន ប៉ុន្តែទេសចរបរទេសត្រូវរង់ចាំរហូតដល់ថ្ងៃទី ៣ មីនា ទើបអាចធ្វើដំណើរទៅកាន់រដ្ឋភាគខាងត្បូងនៃកោះទ្វីបអូស្ត្រាលីបាន ព្រោះតំបន់នេះស្ថិតក្រោមវិធានការកូវីដយ៉ាងតឹងតែងបំផុត ឬហៅថាវិធានហ្សេរ៉ូកូវីដ។
ការបិទព្រំដែន បានធ្វើឱ្យអូស្ត្រាលីខាតបង់ ក្នុងមួយខែៗអស់ប្រមាណ២២៧០លានអឺរ៉ូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ