កូវីដអូមីក្រុង ចាប់ផ្តើមឆ្លងរាលដាលនៅបារាំង អាមេរិក និងអូស្ត្រាលី
មេរោគកូវីដបំប្លែងខ្លួនអូមីក្រុង បានចាប់ផ្តើមឆ្លងរាលដាល កាន់តែច្រើនហើយ ដោយគិតមកទល់ពេលនេះ មានប្រទេសជាង៣០ប្រទេសហើយ ដែលកូវីដអូមីក្រុងបានទៅដល់។ នៅបារាំង អាជ្ញាធរសុខាភិបាល បានប្រកាសថាគេបានរកឃើញចំនួន ៩ករណី ចំណែកនៅសហរដ្ឋអាមេរិកវិញ មាន១០ករណី រីឯអូស្ត្រាលីមាន៩ករណី។ ជាងនេះទៀត នៅអូស្ត្រាលី និងសហរដ្ឋអាមេរិក អាជ្ញាធរបានអះអាងថា គឺមានករណីឆ្លងក្នុងសហគមន៍ ពោលគឺមិនមែនមនុស្សដែលធ្វើដំណើរមកពីបរទេសនោះទេ។
ចុះផ្សាយនៅថ្ងៃ៖
ស្តាប់ - ០២:៤៣
តួលេខចុងក្រោយរបស់អាជ្ញាធរសុខាភិបាលបារាំង គិតត្រឹមព្រឹកថ្ងៃសុក្រទី៣ធ្នូ គឺមានអ្នកវិជ្ជមានកូវីដអូមីក្រុង សរុបចំនួន៩ករណី។ ប្រភពដដែលអះអាងថា ករណីនៅបារាំងទាំងអស់ គឺសុទ្ធតែជាអ្នកដែលបានធ្វើដំណើរមកពីទ្វីបអាហ្វ្រិក។ អាជ្ញាធរបារាំង បានរិតបន្តឹង ការដាក់ឲ្យធ្វើចត្តាឡីស័ក អ្នកវិជ្ជមានទាំងនោះ យ៉ាងតឹងតែងបំផុត និងតាមដានរកករណីប៉ះពាល់ ដោយផ្ទាល់ផ្សេងទៀត។
ចំណែកនៅសហរដ្ឋអាមេរិកវិញ គិតមកត្រឹមពេលនេះ មាន១០ករណីវិជ្ជមានកូវីដអូមីក្រុង ក្នុងនោះមាន១ករណី នៅរដ្ឋមីណេសូតា ដែលជាមនុស្សមិនបានចេញទៅក្រៅសហរដ្ឋអាមេរិកទេ តែបានធ្វើដំណើរទៅទីក្រុងញូយ៉ក។ ហើយករណីមួយទៀត នៅកោះហាវ៉ៃ ក៏ដូចគ្នាដែរ គឺមិនមែនជាអ្នកដំណើរមកពីបរទេសទេ តែជាអ្នកដែលមិនបានចាក់វ៉ាក់សាំង។ ចំណែកនៅអូស្ត្រាលី ក្នុងចំណោម៩ករណីកូវីដអូមីក្រុង ដែលគេបានរកឃើញ គឺមាន១ករណីដែរ ដែលជាសិស្សសាលានៅក្រុងស៊ីដនី ហើយមិនបានធ្វើដំណើរចេញក្រៅអូស្ត្រាលីទេ។ ករណីទាំងនេះ បានបង្ហាញថា កូវីដអូមីក្រុង បាននិងកំពុងតែឆ្លង ក្នុងចំណោមសហគម ក្នុងស្រុករួចទៅហើយ។
គួរបញ្ជាក់ថា កូវីដបំប្លែងខ្លួនអូមីក្រុង កំពុងធ្វើឲ្យពិភពលោក ភ័យជ្រួលច្របល់ជាខ្លាំង។ ប្រទេស អាហ្វ្រិកខាងត្បូង បានប្រកាសពីការប្រទះវត្តមានមេរោគនេះ នៅក្នុងប្រទេសខ្លួនកាលពីថ្ងៃទី២៥វិច្ឆិកា។ ប្រទេសនានា បាននាំគ្នាបិទព្រំដែន ដាក់វិធានការរារាំងការធ្វើដំណើរជាបន្តបន្ទាប់ ជាមួយអាហ្វ្រិកខាងត្បូង និងប្រទេសជាប់ក្បែរខាងប្រមាណ១០ប្រទេសទៀត។
បើទោះបីជាមកទល់ពេលនេះ គេមិនទាន់អាចដឹងបានថា កូវីដអូមីក្រុង អាចមានគ្រោះថ្នាក់បង្កបញ្ហាសុខភាពខ្លាំងកម្រិតណា តែមានការព្រួយបារម្ភកាន់តែខ្លាំងឡើង ពីកម្លាំងឆ្លងរាលដាលរបស់វា។ យោងតាមការស្រាវជ្រាវមួយ របស់អាហ្វ្រិកខាងត្បូង បានបង្ហាញថា ជាមួយនឹងកូវីដអូមីក្រុង អ្នកដែលធ្លាប់ឆ្លងកូវីដរួចហើយ គឺអាចធ្លាក់ខ្លួនឆ្លងម្តងទៀត ក្នុងកម្រិតលើសដល់ទៅ៣ដង បើប្រៀបធៀបទៅកូវីដបេតា និងដែលតា។ នៅអាហ្វ្រិកខាងត្បូង គេបានសង្កេតឃើញថា ក្នុងរវាងពីថ្ងៃទី១ ដល់ថ្ងៃទី២៧វិច្ឆិកា ក្នុងចំណោមអ្នកដែលធ្លាប់ឆ្លងកូវីដរួចហើយចំនួន ២.៨លាននាក់ គឺមាន ប្រមាណ ៣៥៦៧០នាក់ បានធ្លាក់ខ្លួនឆ្លងកូវីដម្តងទៀត។
អ្នកជំនាញអាហ្វ្រិកខាងត្បូងសន្និដ្ឋានថា លទ្ធភាពធំដែលអាចឆ្លងកូវីដម្តងទៀត ទៅលើអ្នកដែលធ្លាប់ឆ្លងហើយនេះ គឺវាហាក់មានន័យថា កូវីដអូមីក្រុង មានកម្លាំងអាចគេចផុតពីប្រព័ន្ធអង់ទីក័ររបស់មនុស្ស។ តែយ៉ាងណា លោកស្រី Juliet Pulliam អ្នកជំនាញនៅសកលវិទ្យាល័យStellenbosch ដែលបានធ្វើរបាយការណ៍នេះ បានលើកឡើងថា ក្នុងការស្រាវជ្រាវនេះ គេមិនបានពិនិត្យថាអ្នកឆ្លងនីមួយៗ បានចាក់វ៉ាក់សាំងឬអត់នោះទេ។ ដូច្នេះ គ្មានការសន្និដ្ឋានណាមួយ ទាក់ទិននឹងប្រសិទ្ធភាពរបស់វ៉ាក់សាំង ប្រឈមជាមួយថាកូវីដអូមីក្រុងឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ