អតីតប្រមុខការទូតអាមេរិក ថាអាមេរិកគួរទទួលស្គាល់តៃវ៉ាន់ជារដ្ឋឯករាជ្យពេញលេញ
ក្នុងខណៈដែលពិភពលោកកំពុងខ្វល់ខ្វាយនឹងសង្គ្រាមនៅអ៊ុយក្រែន បង្កឡើងដោយការឈ្លានពានរបស់រុស្ស៊ី អតីតរដ្ឋមន្រ្តីការបរទេសអាមេរិក លោកប៉ុមពេអូ (Mike Pompeo) បានអះអាងថា សហរដ្ឋអាមេរិក គួរតែប្រកាសទទួលស្គាល់តៃវ៉ាន់ជា “រដ្ឋឯករាជ្យ មានសេរីភាពនិងអធិបតេយ្យភាព” ពេញលេញ។
ចុះផ្សាយនៅថ្ងៃ៖
ស្តាប់ - ០២:០៤
ក្នុងខណៈដែលសហរដ្ឋអាមេរិកនិងចិនកំពុងបន្តតានតឹងនឹងគ្នាខ្លាំងជុំវិញបញ្ហាតៃវ៉ាន់ ទីប្រឹក្សាដ៏ជំនិតម្នាក់របស់អតីតប្រធានាធិបតីអាមេរិក ដូណាល់ គឺលោក ប៉ុមពេអូ បានអញ្ជើញទៅបំពេញទស្សនកិច្ចនៅកោះតៃវ៉ាន់។ អតីតរដ្ឋមន្ត្រីការបរទេសអាមេរិក បានអះអាងនៅចំពោះមុខក្រុមអ្នកវិភាគតៃវ៉ាន់ថា “បើវ៉ាស៊ីនតោនត្រូវបន្តចរចាជាមួយប៉េកាំង ក្នុងនាមជារដ្ឋាភិបាលឯករាជ្យមួយ អាមេរិកក៏ត្រូវទទួលស្គាល់តាមផ្លូវទូតតៃប៉ិដូចគ្នា។ អាមេរិកមិនអាចធ្វើមិនដឹងមិនឮ ហើយចៀស ឬចាត់ទុកតៃវ៉ាន់ជារដ្ឋបន្ទាប់បន្សំទេ”។ រដ្ឋបាលអាមេរិកគួរតែរួសរាន់ចាត់វិធានការចាំបាច់ និងដែលគួរធ្វើតាំងពីយូរមកហើយ ព្រោះជាទង្វើត្រឹមត្រូវនិងជាប្រត្យក្សភាព ពោលគឺគួរប្រកាសទទួលស្គាល់ តាមផ្លូវការទូត សាធារណរដ្ឋចិន (ឈ្មោះផ្លូវការរបស់តៃវ៉ាន់) ជារដ្ឋឯករាជ្យពេញលេញ។ នេះបើតាមប្រសាសន៍របស់លោកប៉ុមពេអូដដែល។
នេះ មិនមែនជាជំរុញឱ្យតៃវ៉ាន់ទាមទារឯករាជ្យ នាពេលអនាគតទេ តែជាការទទួលការពិត ដែលមិនអាចប្រកែកបាន និងដែលកើតមានរួចទៅហើយ។ សម្រាប់លោកប៉ុមពេអូ តៃវ៉ាន់ជាជាតិមួយមានឯករាជ្យស្រាប់ ! ប្រជាពលរដ្ឋអាមេរិកនិងរដ្ឋាភិបាលអាមេរិក គួរតែព្រមទទួលនូវអ្វីដែលជាការពិត និងត្រឹមត្រូវតាមផ្លូវសីលធម៌។ ពលរដ្ឋតៃវ៉ាន់គួរតែទទួលបាននូវការគោរពពីពិភពលោក ចំពោះភាពស្វិតស្វាញដើម្បីសេរីភាព ប្រជាធិបតេយ្យនិងអធិបតេយ្យភាព។
ជាការអបអរ លោកស្រីប្រធានាធិបតីតៃវ៉ាន់ សៃ អ៊ីនវេន ដែលបានប្រកាសថាមិនចាំបាច់ប្រកាសឯករាជ្យ ព្រោះតៃវ៉ាន់ជារដ្ឋមានអធិបតេយ្យភាពរួចទៅហើយ បានបំពាក់មេដាយកិត្តិយសជូនលោកប៉ុមពេអូ និងលើកសរសើរលោកអតីតរដ្ឋមន្ត្រីការបរទេសអាមេរិក ដែលបានសម្រួលឱ្យទំនាក់ទំនងអាមេរិក-តៃវ៉ាន់បានកាន់តែប្រសើរឡើងច្រើន។
ប៉ុន្តែសម្រាប់ប៉េកាំង តៃវ៉ាន់ជាដែនដីមួយចំណែករបស់ចិន ដែលអាជ្ញាធរអាចនឹងប្រើកម្លាំងយកមកវិញប្រសិនបើចាំបាច់។ ចិនធ្លាប់បានព្រមានដោយចំៗថាសង្គ្រាមនឹងផ្ទុះឡើង បើតៃវ៉ាន់ហ៊ានទាមទារឯករាជ្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ