ចិន-តៃវ៉ាន់ ៖ នាវាចម្បាំងអាមេរិកចូលល្បាតក្នុងច្រកសមុទ្ទតៃវ៉ាន់
នៅថ្ងៃសៅរ៍ទី ២៦កុម្ភៈនេះ នាវាចម្បាំងអាមេរិកបានបើកល្បាតចូលក្នុងច្រកសមុទ្ទតៃវ៉ាន់ ដែលខណ្ឌចែកកោះតៃវ៉ាន់ពីដែនដីចិនលើកទ្វីប។ គិតចាប់តាំងពីឆ្នាំ២០២២មក នេះជាលើកទីពីរហើយដែលកងម៉ារីនអាមេរិកបើកចូលក្នុងដៃសមុទ្ទដែលចិនចាត់ទុកជាដែនអធិបតេយ្យរបស់ខ្លួន។
ចុះផ្សាយនៅថ្ងៃ៖
ស្តាប់ - ០២:០៧
“នាវាចម្បាំងUSS Ralph Johnson បានធ្វើល្បាតជាធម្មតាក្នុងដៃសមុទ្ទដែលជាដែនទឹកអន្តរជាតិ និងស្របតាមច្បាប់អន្តរជាតិ” នេះជាសេចក្តីថ្លែងការណ៍របស់កងនាវាជើងទឹកអាមេរិក។ ជាមួយនឹងការបញ្ជាក់ព័ត៌មានថា នាវាអាមេរិក ពិតជាបានធ្វើចរាចរណ៍ក្នុងតំបន់ច្រកសមុទ្ទ ក្រសួងការពារជាតិតៃវ៉ាន់លម្អិតបន្ថែមថាយោធាតៃវ៉ាន់បានតាមដាននិងត្រួតពិនិត្យរាល់គ្រប់សកម្មភាព ក្នុងផ្ទៃទឹក លើផ្ទៃអាកាសតៃវ៉ាន់ ហើយអ្វីៗមានស្ថានភាពធម្មតាទាំងអស់។
នាវាយោធាអាមេរិកមានទម្លាប់បើកល្បាតក្នុងច្រកសមុទ្ទតៃវ៉ាន់។ ហើយវត្តមានរបស់នាវា ជាសារបញ្ជាក់អំពីការគិតគូរការពារតំបន់ឥណ្ឌូប៉ាស៊ីហ្វិក ឱ្យនៅតែជាតំបន់មានសេរីភាពនិងបើកទូលាយ។ ប៉ុន្តែសម្រាប់ចិន ចិនក្តៅក្រហាយខ្លាំងណាស់ ព្រោះ ប៉េកាំង តែងចាត់ទុកតំបន់ច្រកសមុទ្ទតៃវ៉ាន់ ឬអ័រមូស នេះជាផ្នែកមួយនៃដែនដីរបស់ចិន។ រាល់គ្រប់នាវាបរទេសដែលធ្វើចរាចរណ៍ឆ្លងកាត់ច្រកនេះ ត្រូវបានរបបសាធារណរដ្ឋប្រជាមានិតចិន ចាត់ទុកជាការរំលោភអធិបតេយ្យភាពចិន។
ហេតុដូច្នេះហើយបានជាដោយគ្មានបង្អង់ យោធាចិនបានចេញថ្លែងការណ៍ ចោទវត្តមាននាវាអាមេរិកក្នុងដៃសមុទ្ទតៃវ៉ាន់ ថាជាទង្វើបង្កហេតុ ដែលធ្វើឡើងដើម្បីគាំទ្រកងកម្លាំងឯករាជ្យនិយមតៃវ៉ាន់។ “កងកម្លាំងយោធាចិន ស្ថិតក្នុងស្ថានភាពត្រៀមប្រយុទ្ធខ្ពស់ណាស់ ដើម្បីការពារអធិបតេយ្យភាព និងសន្តិសុខជាតិ”។ នេះជាសេចក្តីថ្លែងការណ៍ព្រមានរបស់កងនាវាយោធាជើងទឹកចិនប្រចាំតំបន់ប្រតិបត្តិការខាងកើត។
តាំងពី ២០១៦ ឆ្នាំដែលគណបក្សប្រឆាំងចិនប៉េកាំងខ្លាំងរបស់លោកស្រីសៃអ៊ីងវេន ឡើងកាន់អំណាចនៅតៃវ៉ាន់មក ចិនបានបង្កើនសម្ពាធសេដ្ឋកិច្ច យោធានិងការទូត លើកោះតៃវ៉ាន់យ៉ាងខ្លាំង។ ប៉េកាំងបានថែមទាំងគំរាមជាញឹកញយថានឹងប្រើកម្លាំងយោធាក្រសោបយកតៃវ៉ាន់មកវិញ ប្រសិនបើកោះហ៊ានប្រកាសទាមទារឯករាជ្យជាផ្លូវការ ឬមានអន្តរាគមន៍មកពីក្រៅប្រទេស។ ហើយការវាយយកតៃវ៉ាន់មិនអាចប្រៀបប្រដូច ទៅនឹងការឈ្លានពានរបស់រុស្ស៊ីលើអ៊ុយក្រែនទេ។ នេះបើតាមសំដីរបស់រដ្ឋាភិបាលចិន កាលពីពីរ-បីថ្ងៃមុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ