ប៉ាគីស្ថាន៖នាយករដ្ឋមន្រ្តីលោកអ៊ីមរ៉ាន់ ខាន់កំពុងប្រឈមនឹងញត្តិដកសេចក្តីទុកចិត្តពីសភា
នៅក្នុងប្រទេសប៉ាគីស្ថាន តុលាការកំពូលបានលុបចោលសេចក្តីសម្រេចរំលាយសភារបស់ប្រធានាធិបតី និងបញ្ជាឲ្យយកញត្តិដកសេចក្តីទុកចិត្តពីនាយករដ្ឋមន្រ្តីលោកអ៊ីមរ៉ាន់ ខាន់ទៅដាក់ឲ្យសភាបោះឆ្នោត។ ការសម្រេចរបស់តុលាការកំពូលដ៏គួរឲ្យភ្ញាក់ផ្អើលនាថ្ងៃព្រហស្បតិ៍ ទី៧ មេសានេះកំពុងធ្វើឲ្យលោកអ៊ីមរ៉ាន់ ខាន់ប្រឈមនឹងការធ្លាក់ពីអំណាចជាងពេលណាៗទាំងអស់។ មានអាយុ ៦៩ឆ្នាំ លោកអ៊ីមរ៉ាន់ ខាន់បានកាន់តំណែងនាយករដ្ឋមន្រ្តីតាំងពីឆ្នាំ ២០១៨។
ចុះផ្សាយនៅថ្ងៃ៖
ស្តាប់ - ០២:១០
បន្តកាន់តំណែងរហូតដល់ចប់អាណត្តិ ឬធ្លាក់មុនអាណត្តិ លោកអ៊ីមរ៉ាន់ ខាន់នឹងដឹងនៅថ្ងៃសៅរ៍ ទី៩ មេសាដែលសភាត្រូវបោះឆ្នោតទទួលយក ឬច្រានចោលញត្តិដកសេចក្តីទុកចិត្តរៀបចំឡើងដោយក្រុមគណបក្សប្រឆាំង។ តែមួយថ្ងៃមុនការបោះឆ្នោតនៅសភា លោកអ៊ីមរ៉ាន់ ខាន់ថ្លែងទៅកាន់ប្រជាជាតិនាយប់ថ្ងៃសុក្រ ទី៨មេសា និងកោះប្រជុំសមាជិកក្នុងរដ្ឋាភិបាលរបស់លោក រួមទាំងថ្នាក់ដឹកនាំសំខាន់ៗរបស់គណបក្សលោក គឺចលនាប៉ាគីស្ថានដើម្បីយុត្តិធម៌។ គួររម្លឹកថា ញត្តិដកសេចក្តីទុកចិត្តពីលោកអ៊ីមរ៉ាន់ ខាន់ដែលគ្រោងដាក់ឲ្យសភាបោះឆ្នោតតាំងពីសប្តាហ៍មុនត្រូវបានអនុប្រធានរដ្ឋសភាមិនដាក់ឲ្យសភាបោះឆ្នោតទេ។
ក្រោយពីការសម្រេចរបស់អនុប្រធានរដ្ឋសភាដែលជាមនុស្សជំនិតម្នាក់របស់លោកអ៊ីមរ៉ាន់ ខាន់ ប្រធានាធិបតីក៏បានប្រកាសរំលាយសភា និងកោះឲ្យមានការបោះឆ្នោតមុនអាណត្តិតាមសំណើរបស់លោកអ៊ីមរ៉ាន់ ខាន់។ តែទីបំផុតនាថ្ងៃព្រហស្បតិ៍ ទី៧ មេសា តុលាការកំពូលបានសម្រេចលុបចោលការរំលាយសភារបស់ប្រធានាធិបតី និងតម្រូវឲ្យយកញត្តិដកសេចក្តីទុកចិត្តពីលោកអ៊ីមរ៉ាន់ ខាន់ទៅដាក់ឲ្យសភាបោះឆ្នោត។ ដូច្នេះចង់ ឬមិនចង់ សេចក្តីសម្រេចរបស់តុលាការកំពូលអាចជារឿងដែលលោកអ៊ីមរ៉ាន់ ខាន់មិនបានរង់ចាំ។ តែក្រុមគណបក្សប្រឆាំងបានសាទរចំពោះការសម្រេចរបស់តុលាការកំពូលពេលនេះ។
« ការសម្រេចនេះបានស្រោចស្រង់ប៉ាគីស្ថាន និងរដ្ឋធម្មនុញ » នេះជាប្រតិកម្មរបស់លោកស្ហេបា ស្ហារីហ្វ ប្រធានគណបក្សសម្ព័ន្ធអ៊ីស្លាមប៉ាគីស្ថានដែលបក្សប្រឆាំងនៅសភា។ លោកស្ហេបា ស្ហារីហ្វត្រូវបានគេមើលឃើញថា អាចក្លាយជានាយករដ្ឋមន្រ្តី បើញត្តិដកសេចក្តីទុកចិត្តពីលោកអ៊ីមរ៉ាន់ ខាន់ត្រូវបានសភាបោះឆ្នោតគាំទ្រ។ គួរបញ្ជាក់ថាមានអាយុ ៦៩ឆ្នាំ លោកអ៊ីមរ៉ាន់ ខាន់ដែលបានកាន់តំណែងតាំងពីឆ្នាំ ២០១៨ ត្រូវបានក្រុមគណបក្សប្រឆាំងចោទប្រកាន់ពីបទគ្រប់គ្រងសេដ្ឋកិច្ចមិនបានល្អ និងមានភាពឆ្គាំឆ្គងនៅក្នុងនយោបាយការបរទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ