ប៉ាគីស្ថាន និងអាហ្វហ្កានីស្ថានដំឡើងសំឡេងដាក់គ្នា ក្រោយផ្ទុះភាពតានតឹងនៅតាមព្រំដែន
នៅថ្ងៃអាទិត្យ ទី១៧ មេសា ប្រទេសប៉ាគីស្ថានបានអំពាវនាវឲ្យប្រទេសអាហ្វហ្កានីស្ថានចាត់វិធានការចាស់ដៃប្រឆាំងនឹងក្រុមសកម្មជនដែលបានប្រើទឹកដីអាហ្វហ្កានីស្ថានដើម្បីវាយប្រហារប៉ាគីស្ថាន។ ការអំពាវនាវនេះបានធ្វើឡើងក្រោយពីអាហ្វហ្កានីស្ថានចោទប៉ាគីស្ថានពីបទវាយប្រហារដោយទម្លាក់គ្រាប់បែកនៅប៉ែកខាងកើតអាហ្វហ្កានីស្ថានក្នុងថ្ងៃសៅរ៍ ទី១៦ មេសា។ ការវាយប្រហារនេះបានបណ្តាលឲ្យស្លាប់មនុស្សចំនួន ៤៧នាក់ ក្នុងនោះមានកូនក្មេង និងស្រី្ត។ តែកងទ័ពប៉ាគីស្ថានមិនបានបញ្ជាក់លើការវាយប្រហារនេះទេ។
ចុះផ្សាយនៅថ្ងៃ៖
ស្តាប់ - ០២:១២
ការអំពាវនាវរបស់ប៉ាគីស្ថានត្រូវបានធ្វើឡើងដោយក្រសួងការបរទេសនៅក្នុងសេចក្តីប្រកាសព័ត៌មានមួយដែលមានខ្លឹមសារជាអាទិ៍ថា « ប៉ាគីស្ថានស្នើឱ្យរដ្ឋាភិបាលអាហ្វហ្កានីស្ថានធានាសន្តិសុខនៅតំបន់ព្រំដែនប៉ាគីស្ថាន-អាហ្វហ្កានីស្ថាន និងចាត់វិធានការតឹងរ៉ឹងប្រឆាំងនឹងក្រុមមនុស្សដែលពាក់ព័ន្ធនៅក្នុងសកម្មភាពភេរវកម្មនៅប៉ាគីស្ថាន។ ជាថ្មីម្តងទៀត ប៉ាគីស្ថានថ្កោលទោសចាស់ដៃលើក្រុមភេរវជនដែលបានប្រើទឹកដីអាហ្វហ្កានីស្ថានដើម្បីបង្កសកម្មភាពនៅក្នុងទឹកដីប៉ាគីស្ថាន »។
សូមបញ្ជាក់ថា អ្វីៗបានចាប់ផ្តើមដំបូងក្នុងថ្ងៃព្រហស្បតិ៍ ទី១៤ មេសាដោយមានទាហានប៉ាគីស្ថានចំនួន ៧នាក់ត្រូវបានសម្លាប់នៅក្នុងតំបន់ខាងជើងវ៉ាហ្ស៊ីរីស្ថានដោយក្រុមភេរវជនមកពីប្រទេសអាហ្វហ្កានីស្ថាន។ បន្ទាប់មកក្នុងថ្ងៃសៅរ៍ ទី១៦ មេសា និងបើតាមរដ្ឋអំណាចអាហ្វហ្កានីស្ថាន កងទ័ពប៉ាគីស្ថានបានវាយប្រហារដោយទម្លាក់គ្រាប់បែកនៅប៉ែកខាងកើតអាហ្វហ្កានីស្ថានដែលបណ្តាលឲ្យមានមនុស្សស្លាប់ ៤៧នាក់ ក្នុងនោះមានស្រ្តី និងកូនក្មេង រួមទាំងអ្នករបួសចំនួន ២២នាក់។ តែកងទ័ពប៉ាគីស្ថានមិនបានបញ្ជាក់លើការវាយប្រហារនេះទេ។
ទោះជាយ៉ាងនេះក្តី រដ្ឋាភិបាលក្រុងកាប៊ូលមិនញញើតព្រមានរដ្ឋាភិបាលក្រុងអ៊ីស្លាម៉ាបាតត្រង់ទេ។ « ជាទង្វើឃោរឃៅ និងជាការបើកផ្លូវឆ្ពោះទៅរកភាពសត្រូវរវាងអាហ្វហ្កានីស្ថាន និងប៉ាគីស្ថាន » នេះជាការថ្លែងរបស់លោកហ្សាប៊ីហ៊ូឡា មូយ៉ាហ៊ីដ អ្នកនាំពាក្យរដ្ឋាភិបាលអាហ្វហ្កានីស្ថាន។ លោកហ្សាប៊ីហ៊ូឡា មូយ៉ាហ៊ីដបានបន្ថែមដោយព្រមានប៉ាគីស្ថានថា បើសង្រ្គាមមួយចាប់ផ្តើម សង្រ្គាមនោះនឹងមិនផ្តល់ប្រយោជន៍ឲ្យភាគីណាមួយទេ។
មែនទែនទៅ ភាពតានតឹងនៅតាមព្រំដែនរវាងប៉ាគីស្ថាន និងអាហ្វហ្កានីស្ថានហាក់បានឡើងកាន់តែខ្លាំងតាំងពីពួកតាលីបង់ឡើងកាន់អំណាចនៅអាហ្វហ្កានីស្ថាន។ គួររម្លឹកថា នៅប៉ាគីស្ថានក៏មានពួកតាលីបង់ដែរ តែជាក្រុមមួយដាច់ដោយឡែកពីតាលីបង់អាហ្វហ្កានីស្ថាន។ តាលីបង់ប៉ាគីស្ថានបានជ្រកកោណនៅតាមបណ្តោយព្រំដែនរវាងប្រទេសទាំងពីរ និងកំពុងតស៊ូប្រឆាំងនឹងរដ្ឋាភិបាលប៉ាគីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ