អាហ្វហ្កានីស្ថាន និងប៉ាគីស្ថានប្តេជ្ញាកៀកស្មាប្រយុទ្ធប្រឆាំងនឹងក្រុមភេរវនិយម
ប្រធានាធិបតី អាហ្វហ្កានីស្ថាន និងនាយករដ្ឋមន្រ្តីប៉ាគីស្ថាន កាលពីថ្ងៃអង្គារទី ១២ឧសភាបានបង្ហាញជំហររួមគ្នាជាធ្លុងមួយ ដើម្បី ប្រយុទ្ធប្រឆាំងនឹងក្រុមភេរវនិយម។ ដំណើរទស្សនកិច្ច កាលពីថ្ងៃអង្គារ របស់នាយករដ្ឋមន្រ្តីប៉ាគីស្ថាន លោកណាវ៉ា ស្ហារីហ្វ ទៅប្រទេសអាហ្វហ្កានីស្ថានបញ្ជាក់ឲ្យឃើញកាន់តែច្បាស់ពីការខិតចូលជិតគ្នា រវាងប្រទេសជិតខាងទាំងពីរ។
ចុះផ្សាយនៅថ្ងៃ៖ កែប្រែថ្ងៃទី៖
ដំណើរទស្សនកិច្ចរបស់នាយករដ្ឋមន្រ្តីប៉ាគីស្ថានទៅទីក្រុងកាប៊ូលបានជួយកាត់បន្ថយច្រើន ភាពមិនចុះសម្រុងរវាងប៉ាគីស្ថាន និងអាហ្វហ្កានីស្ថាន។ នៅក្នុងសន្និសីទកាសែតរួមគ្នា កាលពីថ្ងៃអង្គារ ទាំងប្រធានាធិបតីអាហ្វហ្កានីស្ថាន និងនាយករដ្ឋមន្រ្តីប៉ាគីស្ថានបានបញ្ជាក់ឆន្ទៈចង់ប្រយុទ្ធរួមគ្នា ប្រឆាំងនឹងក្រុមបង្កអំពើភេរវកម្ម។ សត្រូវរបស់អាហ្វាហ្កានីស្ថាន មិនអាចជាមិត្តរបស់ប៉ាគីស្ថាន។ នេះជាការនិយាយធានារបស់នាយករដ្ឋមន្រ្តីប៉ាគីស្ថានទៅកាន់លោកអាស្រាហ្វ ហ្កានី ប្រធានាធិបតីអាហ្វហ្កានីស្ថាន។ តាមលោកនាយករដ្ឋមន្រ្តីណាវ៉ា ស្ហារីហ្វ ប្រទេសទាំងពីរនឹងទាក់ទងធ្វើការជាមួយគ្នា ដើម្បីបំផ្លាញសំបុកក្រុមភេរវនិយម ដែលស្ថិតនៅតាមបណ្តោយព្រំដែនប្រទេសទាំងពីរ។
ប៉ាគីស្ថាន និងអាហ្វហ្កានីស្ថានបច្ចុប្បន្ន កំពុងរងគ្រោះដូចគ្នា ដោយអំពើភេរវកម្មបំផ្ទុះគ្រាប់បែករបស់ពួកតាលីបង់។ អាហ្វហ្កានីស្ថានកំពុងរងការវាយប្រហារ របស់ពួកតាលីបង់ ដែលចាប់ធ្វើភេរវកម្ម ប្រឆាំងរដ្ឋាភិបាលអាហ្វហ្កានីស្ថាន តាំងពីរដូវផ្ការីក។ ចំណែកប៉ាគីស្ថានក៏កំពុងប្រឈមនឹងពួកឧទ្ទាមតាលីបង់ប៉ាគីស្ថាន ដែលលាក់ខ្លួន នៅក្នុងជួរភ្នំ ក្បែរព្រំដែនអាហ្វហ្កានីស្ថាន។
ដំណើរទស្សនកិច្ចរបស់លោកនាយករដ្ឋមន្រ្តីប៉ាគីស្ថាន ធ្វើឡើងជាលើកទីមួយ តាំងពីលោកអាស្រាហ្វ ហ្កានី ចូលកាន់តំណែងជាប្រធានាធិបតីថ្មីរបស់អាហ្វហ្កានីស្ថាន។ លោកអាស្រាហ្វ ហ្កានីធ្លាប់ធ្វើដំណើរទស្សនកិច្ច ទៅអ៊ីស្លាម៉ាបាត ម្តង កាលពីខែវិច្ឆិកាកន្លងទៅ នៅក្រោយលោកជាប់ឆ្នោតជាប្រធានាធិបតី។
ទំនាក់ទំនងប៉ាគីស្ថាន និងអាហ្វហ្កានីស្ថានបានល្អប្រសើរមួយកម្រិត ចាប់តាំងពីអាហ្វហ្កានីស្ថានមានប្រធានាធិបតីថ្មី។ ខុសពី ប្រធានាធិបតីមុន គឺលោកអាមីដ កាហ្សៃ លោកអាស្រាហ្វ ហ្កានីបានប្រកាសជ្រើសរើសផ្លូវសន្តិភាពជាមួយ ប៉ាគីស្ថាន។ អាហ្វហ្កានីស្ថាន និងប៉ាគីស្ថាន គឺជាសម្ព័ន្ធមិត្តរបស់អាមេរិក។ ប៉ុន្តែ ប្រទេសទាំងពីរតែងតែចោទគ្នាទៅវិញ ទៅមក ថាជាអ្នកគាំទ្រក្រុមអ៊ីស្លាមជ្រុលនិយម ដើម្បីបង្កអំពើភេរវកម្ម។ អតីតប្រធានាធិបតីអាហ្វហ្កានីស្ថានធ្លាប់ចោទប្រកាន់ទីក្រុងអ៊ីស្លាម៉ាបាតថា បានឧបត្ថម្ភគាំទ្រក្រុមតាលីបង់ ដើម្បីបង្កភេរវកម្មក្នុងទឹកដីអាហ្វហ្កានីស្ថាន។ ប៉ុន្តែ ប្រធានាធិបតីថ្មីរបស់អាហ្វហ្កានីស្ថាន លោកហ្កានី វិញចង់ឆ្លៀតយកទំនាក់ទំនងល្អប្រសើរឡើងវិញ ជាមួយរដ្ឋាភិបាលប៉ាគីស្ថាន ដើម្បីទៅចរចាសន្តិភាពជាមួយក្រុមតាលីបង់ អាហ្វហ្កានីស្ថាន។ កាប៊ូលជឿថា កងទ័ពប៉ាគីស្ថានដែលស្និទ្ធនឹងក្រុមតាលីបង់អាចបញ្ចុះបញ្ចូលក្រុមនេះឲ្យចូលចរចា បញ្ចប់ការវាយប្រហារហិង្សា សម្លាប់មនុស្សតទៅទៀត នៅអាហ្វហ្កានីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ