អាហ្វហ្កានីស្ថានទាមទារប៉ាគីស្ថានឲ្យចូលរួមឲ្យសកម្មដើម្បីបំបែកក្រុមតាលីបង់
លោកប្រធានាធិបតីអាហ្វហ្កានីស្ថាន អាហ្សរ៉ាហ្វ ហ្គានី ទើបបានផ្ញើរលិខិតមួយ ទៅកាន់ថ្នាក់ដឹកនាំសំខាន់ៗរបស់ ប៉ាគីស្ថាន ដើម្បីជំរុញឲ្យប្រទេសនេះ ផ្តល់នូវការតាំងចិត្តជាក់លាក់ ក្នុងការបង្រ្កាបក្រុមឧទ្ទាមអ៊ីស្លាមជ្រុលនិយមតាលីបង់ ដែលបានបង្កភេរវកម្ម យ៉ាងញឹកញាប់ ក្នុងប្រទេសអាហ្វហ្កានីស្ថាន។ កន្លងមក អាហ្វហ្កានីស្ថាន តែងតែបានចោទប្រកាន់ប៉ាគីស្ថានថាបានបង្កភាពងាយស្រួល និងផ្តល់ជំរក ដល់ក្រុមតាលីបង់ នៅតាមបណ្តោយព្រំដែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
ទំនាក់ទំនងរវាង អហ្វហ្កានីស្ថាន និងប៉ាគីស្ថាន មិនដែលបានជួបភាពល្អប្រសើរទេ ដោយសារតែបណ្តោយព្រំដែនដ៏វែងអន្លាយ ហើយដែលជាកន្លែងសំងំលាក់ខ្លួន របស់ពួកឧទ្ទាមតាលីបង់។ ជាងមួយខែមកហើយ ដែលក្រុមតាលីបង់ បានបង្កើនការវាយលុក ធ្វើភេរវកម្មជាបន្តបន្ទាប់ នៅតាមខេត្តនានា និងនៅក្នុងទីក្រុង កាប៊ុល រដ្ឋធានីប្រទេសអហ្វហ្កានីស្ថាន។ អហ្វហ្កានីស្ថាន ដែលខិតខំប្រយុទ្ធបោសសម្អាតក្រុមតាលីបង់នេះ ហាក់កំពុងតែអស់សង្ឃឹម ដោយសារតែប៉ាគីស្ថាន ជាប្រទេសក្បែរខាង គ្មានចេតនាគាំទ្រសន្តិភាព ហើយបានចិញ្ចឹមក្រុមតាលីបង់ ក្នុងទឹកដីរបស់ខ្លួន។
នៅថ្ងៃអាទិត្យ ទី ៣១ ឧសភា លោកប្រធានាធិបតីអហ្វហ្កានីស្ថាន អាហ្សរ៉ាហ្វ ហ្គានី បានធ្វើលិខិតមួយ ផ្ញើរទៅកាន់ថា្នក់ដឹកនាំប៉ាគីស្ថាន ទាំងយោធា ទាំងស៊ីវីល ដើម្បីធ្វើការស្នើរសុំឲ្យប៉ាគីស្ថាន ចូលរួមឲ្យបានសកម្ម និងម៉ត់ចត់ ក្នុងការបោសសម្អាត ក្រុមឧទ្ទាមតាលីបង់។ ក្នុងលិខិតមានសរសេរថា សុំឲ្យប៉ាគីស្ថានចាត់វិធានការ ដើម្បីបំបែកសំបុកក្រុមតាលីបង់ ដែលទៅសំងំរស់នៅ យ៉ាងបើកចំហរ នៅតាមរូងភ្នំ និងភូមិដាច់ស្រយ៉ាល តាមបណ្តោយព្រំដែន ក្នុងទឹកដីប៉ាគីស្ថាន។ ដូចគ្នាដែរ ក្នុងលិខិតមានសរសេរស្នើសុំឲ្យប៉ាគីស្ថាន ចាប់មេក្រុមតាលីបង់ ដែលសំងំនៅក្នុងប្រទេសប៉ាគីស្ថាន ដាក់ក្នុងកន្លែងឃុំឃាំង ដែលមានសុវត្ថិភាព ដើម្បីកុំឲ្យពួកនេះ ចេញមកធ្វើសកម្មភាពបាន។
គួរបញ្ជាក់ផងដែរថា ថ្មីៗនេះ លោកប្រធានាធិបតី អហ្វហ្កានីស្ថាន អាហ្សរ៉ាហ្វ ហ្គានី ត្រូវបានមតិសាធារណៈរិៈគន់ជាច្រើន ដោយសារតែលោកបានចុះហត្ថលេខា លើការផ្លាស់ប្តូរព័ត៌មានគ្នា រវាងក្រុមស៊ើបការសម្ងាត់ប៉ាគីស្ថាន និងអហ្វហ្កានីស្ថាន។ ការធ្វើបែបនេះ ត្រូវបានគេរិះគន់ថា វាជាការចាញ់ប្រៀបប៉ាគីស្ថាន ទាំងស្រុង។
យ៉ាងណាក៏ដោយ តាមរយៈលិខិតដែលទើបតែផ្ញើរទៅកាន់ថា្នក់ដឹកនាំប៉ាគីស្ថាន នាពេលនេះ លោក ប្រធានាធិបតីអហ្វហ្កានីស្ថាន អាហ្សរ៉ាហ្វ ហ្គានី បានបង្ហាញឲ្យគេឃើញ ពីគោលជំហរម៉ឺងម៉ាត់របស់លោក ចំពោះប៉ាគីស្ថាន ថាត្រូវតែគោរពពាក្យសម្តីរបស់ខ្លួន ដែលថា ចង់ឃើញអាហ្វហ្កានីស្ថាន ជាសះស្បើយពីជំងឺតាលីបង់។ មួយវិញទៀត លិខិតនេះ ប្រៀបបីដូចជាការបរិហារកេរ្តិ៍របស់ប៉ាគីស្ថានផងដែរ ដែលមិនគោរពកាតព្វកិច្ចរបស់ខ្លួន ក្នុងការនាំក្រុមតាលីបង់ មកចូលតុចរចា ដើម្បីកសាងសន្តិភាពពេញលេញ នៅអហ្វហ្កានីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ