ជប៉ុនស្វែងរកការគាំទ្ររបស់អាស៊ីអាគ្នេយ៍ប្រឈមនឹងចិននិងរុស្ស៊ី
នាឱកាស Golden week ដែលជាវេលាបុណ្យឈប់សម្រាកមួយសប្តាហ៍នៅជប៉ុន លោកនាយករដ្ឋមន្ត្រី ហ្វូមីអូ គីស្ហ៊ីដា បានឆ្លៀតអញ្ជើញទៅបំពេញទស្សនកិច្ចមួយជុំនៅអាស៊ីអាគ្នេយ៍។ កម្មវត្ថុនៃទស្សនកិច្ចគឺ ជប៉ុនចង់បញ្ចុះបញ្ចូលបណ្តាប្រទេសក្នុងតំបន់នេះ ឱ្យប្រកាន់ជំហររួម ប្រឆាំងនឹងប្រតិបត្តិការរុស្ស៊ី ដែលបានចូលឈ្លានពានអ៊ុយក្រែនផង និងដើម្បីទប់ទល់ឥទ្ធិពលរបស់ចិនដែលកំពុងរីកដុះដាលខ្លាំងក្នុងតំបន់ផង។
ចុះផ្សាយនៅថ្ងៃ៖
ស្តាប់ - ០១:៥២
បន្ទាប់ពីឥណ្ឌូណេស៊ី នៅថ្ងៃសុក្រ និងវៀតណាម នៅថ្ងៃសៅរ៍ លោក ហ្វូមីអូ គីស្ហីដា បានអញ្ជើញទៅដល់ប្រទេសថៃ នៅថ្ងៃទី ១ឧសភានេះ ក្នុងក្តីសង្ឃឹមតែមួយ គឺ ជំរុញឱ្យមេដឹកនាំប្រទេសក្នុងតំបន់អាស៊ីអាគ្នេយ៍ ដកខ្លួនចេញពីគោលការណ៍ “អព្យាក្រិត្យភាព”មិនចូលបក្សសម្ព័ន្ធ។ ប៉ុន្តែលោកនាយករដ្ឋមន្ត្រីជប៉ុនគ្មានចេតនាស្វែងរកការបង្កើតសមរភូមិរួម នៅអាស៊ីអាគ្នេយ៍ប្រឆាំងនឹងរុស្ស៊ីនិងចិនទេ។ ជប៉ុនប្រាថ្នាចង់បានត្រឹមឱ្យប្រទេសទាំងអស់នេះ មានទស្សនវិស័យ ព្រមគាំទ្រជំហរនយោបាយសន្តិសុខរួម ដើម្បីធ្វើយ៉ាងណាឱ្យតំបន់ឥណ្ឌូប៉ាស៊ីហ្វិក បើកចំហ មានសេរីភាពនិងអាចទៅចេញចូលទៅមកបានដោយសេរី។
ក្នុងន័យនេះ ពេលបំពេញទស្សនកិច្ច លោកនាយករដ្ឋមន្ត្រី បានរំលឹកប្រាប់គ្រប់ប្រទេសក្នុងតំបន់អាស៊ីអាគ្នេយ៍ ដែលលោកបានទៅដល់ ម្តងម្នាក់ៗនិងដដែលៗថា ការឈ្លានពានអ៊ុយក្រែនពីសំណាក់រុស្ស៊ី ជាការរំលោភច្បាប់អន្តរជាតិដែលតែងការពារអធិបតេយ្យភាពរបស់ប្រទេសនីមួយៗ។ សម្រាប់លោកនាយករដ្ឋមន្ត្រី សង្គ្រាមរុស្ស៊ីនៅអ៊ុយក្រែន បានធ្វើឱ្យខូចសណ្តាប់ធ្នាប់អន្តរជាតិ និងមិនអាចទទួលយកបានឡើយ។ ចំណែកចិនវិញ ក៏បានប្រព្រឹត្តរួចហើយនូវសកម្មភាពបែបដាក់សម្ពាធ ដោយបានអះអាងថា ច្រកតៃវ៉ាន់ ជាដែនអធិបតេយ្យរបស់ខ្លួន ហើយតំបន់ដែនសមុទ្ទខ្លះទៀត ក៏ជារបស់ខ្លួនដែរ បើទោះបីប្រទេសជិតខាងមិនព្រមយ៉ាងណាក៏ដោយ។
ហេតុដូច្នេះហើយបានជាជប៉ុន ចង់កំណត់យុទ្ធសាស្ត្ររួមជាមួយក្រុមប្រទេសនៅអាស៊ីអាគ្នេយ៍នេះ ដោយមិនមើលរំលងការពិតជាក់ស្តែងឡើយ។ ការពិត ដែលថាអាស៊ីអាគ្នេយ៍រស់រំពឹងយ៉ាងខ្លាំងលើចិនដើម្បីភាពចម្រើនលូតលាស់ផ្នែកសេដ្ឋកិច្ច និងដែលមិនចាត់ទុករុស្ស៊ី ជាតំណាងនៃការគំរាមកំហែងយោធាដោយផ្ទាល់មកលើតំបន់ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ