កូរ៉េខាងត្បូង និងអាមេរិកចង់ពង្រឹងកិច្ចសហប្រតិបត្តិការយោធា ខណៈកូរ៉េខាងជើងត្រៀមសាកល្បងនុយក្លេអ៊ែរ
ថ្ងៃសៅរ៍ ទី២១ ឧសភាជាថ្ងៃទី២ នៃទស្សនកិច្ចរបស់ប្រធានាធិបតីអាមេរិកលោកចូ បៃដិននៅកូរ៉េខាងត្បូង។ ទំនាក់ទំនងទ្វេភាគី និងបញ្ហានុយក្លេអ៊ែរកូរ៉េខាងជើងជាប្រធានរឿងសំខាន់នៃជំនួបរយៈពេលយ៉ាងយូររវាងលោកបៃដិន និងសមភាគីកូរ៉េខាងត្បូងលោកយូន ស៊ុកយោល។ នៅក្នុងសេចក្តីថ្លែងការណ៍រួមនៅក្រោយជំនួប លោកបៃដិន និងលោកយូនបានបញ្ជាក់ជាថ្មីពីឆន្ទៈចង់ពង្រឹងកិច្ចសហប្រតិបត្តិការក្នុងវិស័យយោធា និងសេដ្ឋកិច្ច។ តែទន្ទឹមគ្នានេះ លោកបៃដិន និងលោកយូនមិនភ្លេចកាយវិការអាណិតអាសូរកូរ៉េខាងជើងដែលកំពុងស្គាល់កំណើនករណីឆ្លងកូវីដ១៩។
ចុះផ្សាយនៅថ្ងៃ៖
ស្តាប់ - ០២:០៥
នៅក្នុងកិច្ចសហប្រតិបត្តិការយោធាទ្វេភាគី លោកបៃដិន និងលោកយូនចង់ពង្រីកបន្ថែមឲ្យកាន់តែធំលើការធ្វើសមយុទ្ធ និងការហ្វឹកហ្វឺនយោធានៅក្នុង និងនៅជុំវិញឧបទ្វីបកូរ៉េ។ ជំហរ និងឆន្ទៈរបៀបនេះបានកើតមានឡើង ខណៈដែលក្រសួងស៊ើបការណ៍សម្ងាត់កូរ៉េខាងត្បូងបានព្រមានថា កូរ៉េខាងជើងបានរៀបចំជើងព្រួលរួចរាល់ដើម្បីធ្វើការសាកល្បងនុយក្លេអ៊ែរជាថ្មីដែលជាលើកទី៧ និងជាលើកទី១ គិតតាំងពី ៥ឆ្នាំកន្លងទៅ។ ចំណែកនៅអាមេរិក ក្រុងវ៉ាស៊ីនតោនបានអះអាងពីការបង្ករឿងរបស់កូរ៉េខាងជើងក្នុងរយៈពេល ឬមួយក៏ក្រោយបន្តិចនៃទស្សនកិច្ចរបស់លោកបៃដិននៅកូរ៉េខាងត្បូង។
ក្រៅពីការត្រៀមសាកល្បងនុយក្លេអ៊ែររបស់កូរ៉េខាងជើង កំណត់សម្គាល់មួយទៀតនៃទស្សនកិច្ចលើកទី១ របស់លោកបៃដិននៅអាស៊ី និយាយជារួម និងនៅកូរ៉េខាងត្បូង និយាយដោយឡែកពេលនេះបានធ្វើឡើង ចំពេលដែលកូរ៉េខាងជើងកំពុងស្គាល់សន្ទុះរលកឆ្លងកូវីដ១៩។ តាមតួលេខផ្លូវការក្នុងថ្ងៃសៅរ៍ ទី២១ ឧសភា មានករណីឆ្លងជិត ២លាន ៥សែនករណី និងមានអ្នកស្លាប់ចំនួន ៦៦នាក់។ ព្រឹត្តិការណ៍មួយនេះមិនបានធ្វើឲ្យលោកបៃដិន និងលោកយូនឈរឱបដៃនៅស្ងៀមទេ។
នៅក្នុងសេចក្តីថ្លែងការណ៍រួម លោកបៃដិន និងលោកយូនបានសម្តែងក្តីបារម្ភ និងបញ្ជាក់ពីការត្រៀមខ្លួនធ្វើការជាមួយសហគមន៍អន្តរជាតិដើម្បីជួយកូរ៉េខាងជើង។ លោកបៃដិនបានបញ្ជាក់ពីការដែលអាមេរិកត្រៀមខ្លួនផ្តល់វ៉ាក់សាំងឲ្យកូរ៉េខាងជើង។ តែពេលនេះ អាមេរិកមិនបានទទួលចម្លើយណាមួយពីកូរ៉េខាងជើងទេ។ ចំណែកលោកយូនបានគូសបញ្ជាក់ថា ជំនួយជួយកូរ៉េខាងជើងក្នុងរឿងកូវីដ១៩ មានលក្ខណៈមនុស្សធម៌សុទ្ធសាធ ពោលគ្មានជាប់ពាក់ព័ន្ធនឹងរឿងនយោបាយ និងយោធាទេ។ ដោយឡែក លោកបៃដិនមិនបដិសេធដាច់ណាត់ដើម្បីជួបមេដឹកនាំកូរ៉េខាងជើងលោកគីម ជុងអ៊ុនទេ បើមេដឹកនាំកូរ៉េខាងជើងរូបនេះមានភាពស្មោះត្រង់ និងប្រាកដប្រជា។ បន្ទាប់ពីកូរ៉េខាងត្បូង លោកបៃដិនបន្តទស្សនកិច្ចនៅជប៉ុននាថ្ងៃអាទិត្យ ទី២២ ឧសភានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ