តៃវ៉ាន់ចោទចិនសាជាថ្មីពីរឿងបញ្ជូនយន្តហោះចម្បាំងទៅហោះរំលោភចូលដែនអាកាសតៃវ៉ាន់
ចិនបានបញ្ជូនយន្តហោះចម្បាំងដ៏ច្រើនទៅហោះរំលោភចូលតំបន់ការពារដែនអាកាសរបស់តៃវ៉ាន់។ តាមក្រសួងការពារជាតិតៃវ៉ាន់ នៅយប់ថ្ងៃចន្ទម្សិលមិញ យន្តហោះរបស់ចិនចំនួន៣០គ្រឿង ដែលក្នុងនោះ ២០គ្រឿងជាយន្តហោះចម្បាំង បានហោះចូលទៅក្នុងតំបន់ការពារដែនអាកាស នាភាគនិរតីរបស់កោះតៃវ៉ាន់។ កោះតៃវ៉ាន់រស់នៅក្រោមសម្ពាធ និងការគំរាមកំហែងជាអចិន្ត្រៃយ៍ពីសំណាក់មហាយក្សចិន ដែលបានសន្យាហើយថា នឹងយកតៃវ៉ាន់មកគ្រប់គ្រង វិញ តាមផ្លូវយោធា បើសិនចាំបាច់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
គិតចាប់តាំងពីដើមឆ្នាំ នេះជាលើកទី២ ដែលចិន បញ្ជូនយន្តហោះ ក្នុងចំនួនដ៏ច្រើនឲ្យទៅហោះរំលោភចូលក្នុងតំបន់ការពារដែនអាកាសរបស់តៃវ៉ាន់។ កាលពីថ្ងៃទី២៣មករាកន្លងទៅ យន្តហោះចិនដល់ទៅ ៣៩គ្រឿងបានហោះចូលក្នុងតំបន់ការពារដែនអាកាសតៃវ៉ាន់។
តាមផែនទីហោះហើរ ដែលក្រសួងការពារជាតិតៃវ៉ាន់បានបង្ហាញ ដល់អ្នកកាសែត យន្តហោះចម្បាំងរបស់ចិនបានហោះរំលោភចូលផ្នែកនិរតីនៃតំបន់ការពារដែនអាកាសរបស់តៃវ៉ាន់។ គួរបញ្ជាក់ថា តំបន់ការពារដែនអាកាសតៃវ៉ាន់ មានទំហំធំជាងដែនអាកាសរបស់តៃវ៉ាន់ និងលាតសន្ធឹងទៅគ្របជាន់ពីលើតំបន់ការពារដែនអាកាសរបស់ចិន និងតំបន់ដែនអាកាសពីលើទឹកដីចិន។
នៅយប់ថ្ងៃចន្ទ រដ្ឋមន្រ្តីការពារជាតិតៃវ៉ាន់បានប្រកាសបញ្ជូន យន្តហោះចម្បាំង និងដាក់ឲ្យដំណើរការប្រព័ន្ធមីស៊ីលការពារដែនអាកាស ដើម្បីតាមឃ្លាំមើលសកម្មភាពរបស់យន្តហោះចម្បាំងចិន។
ករណីយន្តហោះរបស់ចិន ទៅហោះរំលោភចូលដែនអាកាសរបស់តៃវ៉ាន់ បានកើនឡើង មិនឈប់ និងច្រើន ខ្លាំង បើប្រៀបធៀបនឹងរយៈពេលដូចគ្នានេះ កាលពីឆ្នាំ មុន។ នៅ ឆ្នាំ២០២១ តៃវ៉ាន់បានរាប់ឃើញយន្តហោះចិន ជាង ៩០០គ្រឿង ក្នុងដែនអាកាសតៃវ៉ាន់ ពោលជាចំនួនទ្វេដង បើធៀបនឹងឆ្នាំ ២០២០។
ចិនបានបញ្ជូនយន្តហោះចម្បាំងរបស់ខ្លួនឲ្យទៅហោះក្នុងតំបន់ការពារដែនអាកាសរបស់តៃវ៉ាន់ ដើម្បីបង្ហាញពីការមិនសប្បាយចិត្តរបស់ខ្លួន ដែលឃើញតៃវ៉ាន់រត់ទៅពឹង ទិញ សព្វាវុធពីអាមេរិក។ នៅខែឧសភានេះ ចិនបានប្រតិកម្មខឹងខ្លាំង នៅក្រោយ ប្រធានាធិបតី អាមេរិក លោកចូ បៃដិន បានប្រកាសនៅក្នុងអំឡុងទស្សនកិច្ចរបស់លោកនៅប្រទេសជប៉ុនថា អាមេរិកនឹងការពារតៃវ៉ាន់ ក្នុងករណីចិនចូលឈ្លានពានតៃវ៉ាន់។
ដោយបញ្ជូនយន្តហោះ កាន់តែច្រើន កាន់តែញឹកញយ ទៅក្នុងតំបន់ការពារដែនអាកាសរបស់តៃវ៉ាន់ ចិនចង់រក្សាការដាក់សម្ពាធខ្លាំងលើប្រព័ន្ធការពារដែនអាកាសរបស់តៃវ៉ាន់ ដែលចាស់ មិនសូវសំបូរបែប។
ជាមួយមធ្យោបាយមានកម្រិត និងយន្តហោះចាស់ៗ កងទ័ពជើងអាកាសតៃវ៉ាន់ ឧស្សាហ៍ជួបឧប្បត្តិហេតុ គ្រោះថ្នាក់ផ្ទុះធ្លាក់យន្តហោះ។ កាសែតក្នុងស្រុកតៃវ៉ាន់ទើបបានចុះផ្សាយនៅថ្ងៃអង្គារនេះថា អ្នកបើកយន្តហោះម្នាក់បានស្លាប់ក្នុងគ្រោះថ្នាក់ធ្លាក់យន្តហោះចម្បាំងមួយគ្រឿងនៅភាគខាងត្បូងតៃវ៉ាន់ កាលពីពេលថ្មីៗនេះ។ នៅខែមីនាឆ្នាំមុន តៃវ៉ាន់ ធ្លាប់បានប្រកាសបញ្ឈរជើង ផ្អាកការហោះហើរយន្តហោះចម្បាំងរបស់ខ្លួនទាំងអស់ បន្ទាប់ពីយន្តហោះចម្បាំងតៃវ៉ាន់២គ្រឿង ហោះបុកគ្នា នៅក្នុងពេលហាត់សម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ