ថៃក្លាយជាប្រទេសអាស៊ីដំបូងគេដែលអនុញ្ញាតឲ្យដាំ និងប្រើកញ្ឆា
ថៃបានក្លាយជាប្រទេសអាស៊ីដំបូងគេដែលបើកផ្លូវអនុញ្ញាតឲ្យគេអាចដាំ និងប្រើប្រាស់កញ្ឆាក្នុងចំណីអាហារ។ វិធានការដកកញ្ឆាចេញពីបញ្ជីឈ្មោះគ្រឿងញៀនខុសច្បាប់ បានចូលជាធរមាន ចាប់ថ្ងៃព្រហស្បតិ៍ទី ៩មិថុនា។ អាជ្ញាធរថៃធ្លាប់បានវាយតម្លៃថា ការអនុញ្ញាតឲ្យមានការដាំ និងប្រើប្រាស់កញ្ឆា ដោយស្របច្បាប់ គឺជាឱកាសជំរុញ សេដ្ឋកិច្ច និងវិស័យទេសចរណ៍ថៃ ដែលបានធ្លាក់ចុះខ្សោយ ដោយសារវិបត្តិកូវីដ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៥
ចាប់ពីថ្ងៃព្រហស្បតិ៍ ការដាំ និងប្រើប្រាស់កញ្ឆា ក្នុងចំណីអាហារ គឺជារឿងស្របច្បាប់ នៅប្រទេសថៃ។ បន្ទាប់ពីអនុញ្ញាតកាលពីឆ្នាំ ២០១៨ ឲ្យគេប្រើប្រាស់កញ្ឆាដោយស្របច្បាប់ សម្រាប់ការព្យាបាល និងការស្រាវជ្រាវវេជ្ជសាស្រ្ត ក្រសួងសុខាភិបាលថៃ បានប្រកាសកាលពីខែ កុម្ភៈ កន្លងទៅ នូវវិធានការដកកញ្ឆាចេញពីបញ្ជីឈ្មោះគ្រឿងញៀនខុសច្បាប់។
ទៅតាមវិធានការដែលទើបចូលជាធរមាន កាលពីថ្ងៃព្រហស្បតិ៍ ប្រជាជនថៃអាចដាក់ពាក្យសុំសិទ្ធិដាំដើមកញ្ឆាតាមផ្ទះ យ៉ាងច្រើន បំផុត ៦ដើម ចំណែកក្រុមហ៊ុនក៏អាចបើកកសិដ្ឋាន ដាំដើមកញ្ឆា នៅក្រោយការសុំអាជ្ញាប័ណ្ណពីរដ្ឋាភិបាល។ ចំណែកភោជនីយដ្ឋាន និងកន្លែងលក់ភេសជ្ជៈក៏អាចប្រើប្រាស់កញ្ឆា ក្នុងចំណីអាហារ និងភេសជ្ជៈ។
នៅក្នុងសន្និសីទកាសែត កាលពីខែ កុម្ភៈ រដ្ឋមន្រ្តីក្រសួងសុខាភិបាល ថៃធ្លាប់បានអះអាងថា វិធានការដកកញ្ឆាចេញពី បញ្ជីឈ្មោះ គ្រឿងញៀនខុសច្បាប់ គឺជាឱកាសល្អ សម្រាប់រដ្ឋាភិបាល និងប្រជាជនថៃ ដើម្បីបានប្រាក់ចំណូល ពីកញ្ឆា។
ជារួម ក្រសួងសុខាភិបាលថៃ បានអនុញ្ញាតឲ្យគេប្រើប្រាស់កញ្ឆា ក្នុងចំណីអាហារ និងគ្រឿងថែរក្សាសម្ផស្សជាង ១១៨១មុខ។ គេវាយតម្លៃថា ទីផ្សារកញ្ឆានឹងអាចប្រាក់ចំណូល ១៥ពាន់លានបាត ស្មើ៤០០លានអឺរ៉ូ ពីពេលនេះ ដល់ឆ្នាំ ២០២៦។
ក្នុងគោលដៅ លើកទឹកចិត្តកសិករថៃឲ្យដាំដើមកញ្ឆា រដ្ឋាភិបាលថៃ បានប្រកាសផ្តល់កូនដើមកញ្ឆា ១លាន ដោយឥតគិតថ្លៃ។ តាម អ្នកទទួលខុសត្រូវម្នាក់របស់ក្រសួងសុខាភិបាល មានមនុស្សជាង ១សែននាក់បានចុះឈ្មោះនៅក្នុងកម្មវិធីរបស់រដ្ឋាភិបាលដើម្បីសុំដាំដើមកញ្ឆា។
ដើម្បីគ្រប់គ្រង កុំឲ្យមានការប្រើប្រាស់កញ្ឆា ជាគ្រឿងញៀន អាជ្ញាធរថៃនៅតែ កំណត់ថា ការចម្រាញ់យកជាតិញៀនពីកញ្ឆា (ម៉ូលេគុល Tetrahydrocannabinol ហៅកាត់ THC)ចាប់ពីអត្រា០,២%ឡើងទៅ គឺជាខុសច្បាប់។ ម្យ៉ាងទោះជា ការដាំ និងមានកញ្ឆាជាប់ខ្លួនលែងជារឿងខុសច្បាប់ ប៉ុន្តែ ការជក់កញ្ឆា នៅក្រៅផ្ទះ នៅតាមផ្លូវ នៅតែជារឿងខុសច្បាប់ ដែលអាចធ្វើឲ្យអ្នកប្រព្រឹត្តអាចត្រូវពិន័យប្រាក់ ចំនួន ៧៨០ដុល្លារ និងប្រឈមមុខនឹងការចាប់ដាក់ពន្ធនាគារ ៣ខែ។ ទោសជាប់ពន្ធនាគារ៣ខែនេះ គឺតិចណាស់ ព្រោះថា ពីមុនមក នៅប្រទេសថៃ ដែលអនុវត្តតឹងរ៉ឹងច្បាប់ប្រឆាំងគ្រឿងញៀន អ្នកដែលជក់ ឬមានកញ្ឆាជាប់ខ្លួន ត្រូវតុលាការកាត់ទោសឲ្យជាប់ពន្ធនាគារ១០ឆ្នាំ និងត្រូវពិន័យប្រាក់ធ្ងន់ធ្ងរ។
គេរំពឹងដែរថា ទៅតាមច្បាប់ថ្មីចាត់ទុកកញ្ឆាជាវត្ថុស្របច្បាប់ នឹងមានការ អ្នកទោសជាង ៤០០០នាក់ ដែលជាប់ទាក់ទងនឹងការជួញដូរ ប្រើប្រាស់កញ្ឆា នឹងត្រូវគេដោះលែងឲ្យមានសេរីភាព នៅប្រទេសថៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ