បារំាង៖រដ្ឋអំណាចរឹបអូសបានកញ្ឆាជាង ៧តោនក្នុងទីក្រុងប៉ារីស
នៅក្នុងប្រទេសបារំាង មានកញ្ឆាជាង ៧តោនត្រូវបានរដ្ឋអំណាចរឹបអូសក្នុងទីក្រុងប៉ារីសសង្កាត់ទី១៦ ដែលជាសង្កាត់សម្បូរដោយអ្នកមានរស់នៅ។ ប្រតិបត្តិការរឹបអូសកញ្ឆាដ៏ច្រើនសម្បើមនេះត្រូវបានធ្វើឡើងដោយកម្លំាងគយ រួមសហការជាមួយកម្លំាងប៉ូលិសកាលពីយប់ថ្ងៃសៅរ៍ ទី១៧ ឆ្លងចូលថ្ងៃអាទិត្យ ទី១៨ តុលា។ ការរឹបអូសកញ្ឆាទំាងជាង ៧តោនដែលគិតជាទឹកប្រាក់មានតម្លៃប្រមាណ ១៥លានអឺរ៉ូ តែពុំមានការចាប់ខ្លួនមនុស្សណាម្នាក់ទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
គឺនៅតាមបណ្តោយមហាវិថី Exelmans ស្ថិតក្នុងសង្កាត់ទី១៦ ក្រុងប៉ារីសដែលក្រុមកម្លំាងគយ និងប៉ូលិសបានបើកប្រតិបត្តិការរឹបអូសកញ្ឆាទំាងជាង ៧តោន។ កញ្ឆាទំាងនោះត្រូវបានគេរកឃើញនៅក្នុងរថយន្តចំនួន ៣គ្រឿងពាក់ផ្លាកលេខបារំាងដែលចតចោលនៅលើមហាវិថី Exelmans។ ប្រភពគយបានឲ្យដឹងថា កញ្ឆាទំាងជាង ៧តោនមានប្រភពដើមពីប្រទេសម៉ារ៉ុកដោយដឹកឆ្លងកាត់តាមប្រទេសអេស្បាញ និងត្រូវបានគេដាក់រុំជិតនៅក្នុងវ៉ាលីស និងស្បោងជាច្រើនដែលស្បោងនីមួយៗមានទម្ងន់ពី ២៥ ទៅ ៣០គីឡូក្រាម។ នេះជាលើកទី១ ដែលរដ្ឋអំណាចរឹបអូសបានកញ្ឆាដ៏ច្រើនសម្បើមក្នុងទីក្រុងប៉ារីសដែលគិតជាទឹកប្រាក់មានប្រមាណជា ១៥លានអឺរ៉ូ។
គួរជម្រាបជូនថា ប្រតិបត្តិការរឹបអូសកញ្ឆាទំាងជាង ៧តោនពេលនេះមិនមែនជារឿងចៃដន្យទេ តែជាលទ្ធផលនៃការស៊ើបអង្កេតដឹកនំាដោយការិយាល័យក្រសួងស៊ើបការជាតិ និងការិយាល័យគយតំាងពីក្រោយការរឹបអូសកញ្ឆាជាច្រើនរយគីឡូក្រាមកាលពីដំណាច់រដូវក្តៅកន្លងមក ពិសេសការរឹបអូសកញ្ឆាបានចំនួន ៣២០គីឡូក្រាមក្នុងខេត្ត Bayonne កាលពីខែកញ្ញា និង ១៩៣គីឡូក្រាមនៅក្នុងខែ Rouen កាលពីថ្ងៃទី៧ តុលាកន្លងទៅថ្មីៗនេះ។ អ្វីជាការកត់សម្គាល់ គឺគ្មានការចាប់ខ្លួនមនុស្សណាម្នាក់ទេនៅក្នុងប្រតិបត្តិការរឹបអូសកញ្ឆាទំាងជាង ៧តោនក្នុងក្រុងប៉ារីសកាលពីយប់ថ្ងៃសៅរ៍ ទី១៧ ឆ្លងចូលថ្ងៃអាទិត្យ ទី១៨ តុលា។
ខណៈនេះ ការស៊ើបអង្កេតត្រូវបានប្រគល់ទៅឲ្យការិយាល័យប៉ូលិសតុលាការដែលមានតួនាទីជាអ្នកប្រយុទ្ធប្រឆំាងនឹងការរត់ពន្ធគ្រឿងញាន។ នេះជាលើកទី១ បើគិតតំាងពី ២ឆ្នំាកន្លងទៅដែលមានការរឹបអូសបានកញ្ឆាដ៏ច្រើនសម្បើមក្នុងប្រទេសបារំាង ពោលតំាងពីក្រោយការរឹបអូសបានកញ្ឆាចំនួន ៧,៥តោននៅប៉ែកនីរតីប្រទេសកាលពីថ្ងៃទី២៦ មេសា ឆ្នំា ២០១៣។ គួរជម្រាបជូនថានៅក្នុងប្រទេសបារំាង ការប្រើប្រាស់គ្រឿងញានកញ្ឆាត្រូវបានគេប៉ាន់ប្រមាណមានចំនួន ៣០០តោនក្នុងមួយឆ្នំា។ ដូច្នេះ ការរឹបអូសបាន៧តោននៅជាបរិមាណដ៏តិចតួចខ្លំាងណាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ