នាវាមុជទឹកបារាំង៖អូស្រា្តលីព្រមសងជំងឺចិត្តចំនួន ៥៥៥លានអឺរ៉ូឲ្យក្រុមហ៊ុនបារាំង Naval Group
នៅក្នុងប្រទេសអូស្រា្តលី រដ្ឋាភិបាលបានបង្ហាញនាថ្ងៃសៅរ៍ ទី១១ មិថុនានូវកិច្ចព្រមព្រៀងសងជំងឺចិត្តឲ្យក្រុមហ៊ុនផលិតនាវាមុជទឹកបារាំង Naval Group។ នៅក្នុងកិច្ចព្រមព្រៀងនោះ អូស្រា្តលីនឹងបង់លុយឲ្យក្រុមហ៊ុន Naval Group ចំនួន ៥៥៥លានអឺរ៉ូដើម្បីបិទបញ្ចប់រឿងរ៉ាវដែលអូស្រា្តលីបានបញ្ឈប់កិច្ចសន្យាទិញនាវាមុជទឹកបារាំងកាលពីខែកញ្ញា ឆ្នាំ ២០២១។ បារាំងតាមរយៈរដ្ឋមន្រ្តីការពារជាតិបានដឹងឮ ពីកិច្ចព្រមព្រៀងសងជំងឺចិត្តរបស់អូស្រា្តលីពេលនេះ។
ចុះផ្សាយនៅថ្ងៃ៖
ស្តាប់ - ០២:២៧
សម្រាប់អូស្រា្តលី ជាពេលវេលាដែលត្រូវបិទបញ្ចប់ទំព័រទំនាក់ទំនងការទូតល្អក់ កករជាមួយបារាំង។ នាយករដ្ឋមន្រ្តីថ្មីអូស្រា្តលីលោកអង់តូនី អាល់បានីស៊ីបានថ្លែងថា ក្រុមហ៊ុនផលិតនាវាមុជទឹកបារាំង Naval Group បានយល់ព្រមទទួលយកប្រាក់សងជំងឺចិត្តចំនួន ៥៥៥លានអឺរ៉ូដែលលោកយល់ថា យុត្តិធម៌ និងត្រឹមត្រូវ។ ចំណែកក្រុមហ៊ុន Naval Group បានសាទរ និងក៏បានចាត់ទុកជាកិច្ចព្រមព្រៀងយុត្តិធម៌ដូចនាយរដ្ឋមន្រ្តីអូស្រា្តលីដែរ។ តែ Naval Group មិនបានផ្តល់ព័ត៌មានលើកញ្ចប់ទឹកប្រាក់សងជំងឺចិត្តនោះទេ។
ពីខាងរដ្ឋាភិបាលបារាំងវិញ រដ្ឋមន្រ្តីការពារជាតិលោក Sébastien Lecornu បានថ្លែងពីប្រទេសសិង្ហបុរីដែលលោកបានទៅចូលរួមនៅក្នុងកិច្ចប្រជុំកំពូលសន្តិសុខ Dialogue of Shangri-la ថា កិច្ចព្រមព្រៀងសងជំងឺចិត្តរបស់អូស្រ្តាលីពេលនេះជារឿងសំខាន់។ ជារឿងសំខាន់ ព្រោះបើតាមលោក Sébastien Lecornu ការព្រមសងជំងឺចិត្តរបស់អូស្រា្តលីពេលនេះនឹងអនុញ្ញាតឲ្យបារាំងបើកទំព័រថ្មីនៅក្នុងទំនាក់ទំនងទ្វេភាគីជាមួយអូស្រា្តលី និងបែរសំឡឹងទៅមុខ។
គួររម្លឹកថា បារាំង និងអូស្រា្តលីបានផ្តើមស្គាល់ភាពរកាំរកូស និងមើលមុខគ្នាមិនចំតាំងពីខែកញ្ញា ឆ្នាំ ២០២១ ពោលក្នុងជំនាន់នាយករដ្ឋមន្រ្តីអូស្រ្តាលីលោកស្កុត ម៉ូរីសុន។ កាលណោះ លោកស្កុត ម៉ូរីសុនបានសម្រេចលុបចោលវិញនូវកុងត្រាទិញនាវាមុជទឹកបារាំងចំនួន ១២គ្រឿងក្នុងទឹកប្រាក់ចំនួន ៥៦ ០០០លានអឺរ៉ូដែលបានចុះហត្ថលេខាក្នុងខែធ្នូ ឆ្នាំ ២០១៦ និងបានងាកទៅទិញនាវាមុជទឹកអាមេរិកវិញ។
ការផ្តាច់កិច្ចសន្យាជាមួយបារាំងដោយងាកទៅទិញនាវាមុជទឹកអាមេរិករបស់លោកស្កុត ម៉ូរីសុនកាលណោះបានធ្វើឡើង ក្រោយពីលោកបានចូលរួមនៅក្នុងសម្ព័ន្ធមិត្តថ្មីត្រីភាគីជាមួយអាមេរិក និងអង់គ្លេសដែលគេហៅ AUKUS។ ជាមួយនាយករដ្ឋមន្រ្តីថ្មីអូស្រា្តលី លោកអង់តូនី អាល់បានីស៊ីមិនបានសើរើលើអ្វីដែលអតីតនាយករដ្ឋមន្រ្តីលោកស្កុត ម៉ូរីសុនបានសម្រេចទេ។ តែលោកអង់តូនី អាល់បានីស៊ីបានជ្រើសយកផ្លូវស្តារទំនាក់ទំនងជាមួយបារាំងឡើងវិញដោយយល់ព្រមបង់លុយសងជំងឺចិត្ត។
តាមលោកអង់តូនី អាល់បានីស៊ី ការលុបចោលវិញនូវកុងត្រាទិញនាវាមុជទឹកបារាំងនឹងធ្វើឲ្យរដ្ឋាភិបាលអូស្រា្តលីខាតបង់លុយអស់ ២ ៤០០លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ