បារាំងស៊ូតែឯងប្រឈមនឹងអាមេរិករឿងអូស្ត្រាលីលុបចោលកិច្ចសន្យាទិញនាវាមុជទឹក
ចុះផ្សាយនៅថ្ងៃ៖
ស្តាប់ - ០៦:៣៥
ក្រោយអូស្ត្រាលីប្រកាសលុបចោលកិច្ចសន្យាជាមួយបារាំង និងបែរទៅទិញនាវាមុជទឹករបស់អាមេរិកវិញ ប្រទេសបារាំងបានចាត់វិធានការដ៏កម្រដោយកោះហៅអគ្គរដ្ឋទូតខ្លួនប្រចាំវ៉ាស៊ីនតោន និងកង់បេរ៉ាឲ្យចូលស្រុកវិញ។ ការជ្រើសរើសប្រឈមមុខយ៉ាងពេញទំហឹងជាមួយសម្ព័ន្ធមិត្តអាមេរិកគឺជារឿងប្រថុយប្រថានមួយសម្រាប់បារាំង ហើយមកទល់ពេលនេះ នៅមិនទាន់មានប្រទេសណាចេញមុខគាំទ្រជំហររបស់បារាំងឡើយ។
បារាំងតស៊ូប្រឈមមុខនឹងអាមេរិកតែឯង
ប៉ុន្មានថ្ងៃមកនេះ បារាំងហួសចិត្តនិងខឹងសម្បាយ៉ាងខ្លាំងទៅនឹងទង្វើរបស់សម្ព័ន្ធមិត្តខ្លួនគឺសហរដ្ឋអាមេរិកនិងអូស្ត្រាលី ជុំវិញរឿងដែលអូស្រា្តលីសម្រេចលុបចោលកិច្ចសន្យាទិញនាវាមុជទឹកពីបារាំង ១២គ្រឿង ដែលមានតម្លៃ ៣១ពាន់លានអឺរ៉ូ។
បារាំងបានបញ្ចេញកំហឹងនិងជ្រើសរើសប្រកាន់យកជំហរប្រឈមមុខចំពោះអូស្រ្តាលី និងអាមេរិកតាមរយៈការកោះហៅឯកអគ្គរដ្ឋទូតខ្លួនប្រចាំនៅក្រុងវ៉ាស៊ីនតោន និងប្រចាំនៅកង់បេរ៉ាឲ្យវិលត្រលប់ចូលស្រុកវិញ។ ចំណាត់ការនេះគឺជារឿងដែលបារាំងមិនធ្លាប់ធ្វើពីមុនទាល់តែសោះ ហើយបារាំងបានតស៊ូធ្វើវាដោយឯកឯង ដោយគ្មានការជួយគាំទ្រពីប្រទេសផ្សេង រួមទាំងប្រទេសនៅក្នុងសហភាពអឺរ៉ុបនោះទេ។
ជាក់ស្តែង សម្ព័ន្ធមិត្តសហភាពអឺរ៉ុបដ៏ធំរបស់បារាំងគឺប្រទេសអាល្លឺម៉ង់ដែលនឹងត្រូវរៀបចំការបោះឆ្នោតនៅថ្ងៃអាទិត្យចុងសប្តាហ៍នេះ ហាក់បីដូចជាបានបង្ហាញចេតនាហើយថាមិនចង់លូកដៃក្នុងបញ្ហានេះនោះទេ។ ក្រោយផ្ទុះរឿងរកាំរកូសរវាងបារាំង អាមេរិក និងអូស្ត្រាលី ទីក្រុងប៊ែរឡាំង គ្រាន់តែនិយាយដោយសាមញ្ញថាខ្លួនបានកត់សម្គាល់ពីជម្លោះនេះ។
ទាក់ទងរឿងនេះដែរ លោក Bertrand Badie សាស្រ្តាចារ្យផ្នែកទំនាក់ទំនងអន្តរជាតិនៅវិទ្យាស្ថានវិទ្យាសាស្ត្រប៉ូនៅទីក្រុងប៉ារីសបាននិយាយប្រទេសបារាំងជ្រើសរើសបញ្ចេញកំហឹងតាមរយៈការហៅឯកអគ្គរដ្ឋទូតខ្លួនប្រចាំនៅក្រុងវ៉ាស៊ីនតោនឲ្យវិលចូលស្រុកវិញដើម្បីពិភាក្សាពិគ្រោះយោបល់គ្នាជុំវិញបញ្ហាដែលកំពុងកើតមាន។
ប៉ុន្តែសហរដ្ឋអាមេរិកទំនងជាមិនងាយបោះបង់ចោលកិច្ចសន្យាលក់នាវាមុជទឹកទៅឲ្យអូស្ត្រាលីក្នុងតម្លៃដ៏ច្រើនសន្ធាប់សន្ធាប់ដើម្បីតែលួងចិត្តបារាំងកុំឲ្យខឹងនោះទេ។ នៅទីបំផុតទៅ ប្រសិនបើអាមេរិកនៅបន្តរក្សាកិច្ចសន្យាលក់នាវាមុជទឹកដើរដោយថាមពលនុយក្លេអ៊ែរ ហើយបារាំងបែរជាបញ្ជូនមន្ត្រីទូតរបស់ខ្លួនត្រលប់ទៅសហរដ្ឋអាមេរិកវិញនោះ បារាំងទំនងជានឹងត្រូវបាក់មុខជាមិនខាន។
លោក ចូ បៃដិនស្នើជួបនិយាយចរចាគ្នាជាមួយប្រធានាធិបតីបារាំងតាមទូរសព្ទ
ប្រធានាធិបតីអាមេរិកលោកចូ បៃដិន កាលពីថ្ងៃអាទិត្យ ទី១៩ កញ្ញា ឆ្នាំ២០២១ម្សិលមិញ បានស្នើជួបនិយាយទូរសព្ទជាមួយលោកប្រមុខរដ្ឋបារាំងអេម៉ានុយអែល ម៉ាក្រុង ដើម្បីបន្សាបកំហឹងរបស់បារាំងជុំវិញរឿងដែលអូស្រ្តាលីហែកចោលកិច្ចសន្យាទិញនាវាមុជទឹកបារាំង ដើម្បីតែទៅទិញនាវាមុជទឹកអាមេរិកវិញ។ សំណុំរឿងនេះ បង្កឲ្យមានភាពតានតឹងដ៏ខ្លាំងនិងដ៏កម្ររវាងប្រទេសសម្ព័ន្ធមិត្តបារាំង អាមេរិក និងអូស្ត្រាលី។
ការប្រកាសរបស់លោកបៃដិនកាលពីថ្ងៃអាទិត្យ ធ្វើឡើងបន្ទាប់ពីនាយករដ្ឋមន្រ្តីអូស្រ្តាលីលោកស្កុត ម៉ូរីសុនបានច្រានចោលនូវការចោទប្រកាន់របស់បារាំងដែលថាទីក្រុងកង់បេរ៉ា បាននិយាយភូតភរកុហកអំពីគម្រោងលុបចោលកិច្ចសន្យាទិញនាវាមុជទឹកបារាំង។ លោក ម៉ូរីសុន បានលើកឡើងថាលោកបានបញ្ជាក់ពីកង្វល់របស់អូស្ត្រាលីប្រាប់បារាំងជុំវិញកិច្ចព្រមព្រៀងនេះកាលពីប៉ុន្មានខែមុនរួចហើយ។
ដោយឡែកបើទោះបីជាក្តៅស្លឹកត្រចៀកខ្លាំងក្តៅក្តី លោកម៉ាក្រុងនៅតែបើកទ្វារទទួលជួបសន្ទនាជាមួយលោកចៃដិនដើម្បីស្វែងរកដំណោះស្រាយពាក់ព័ន្ធបញ្ហាកម្រមាននឹងគ្នានេះ។
អ្នកនាំពាក្យរដ្ឋាភិបាលបារាំងលោក Gabriel Attal បាននិយាយកាលពីថ្ងៃអាទិត្យថានឹងមានកិច្ចសន្ទនាតាមទូរសព្ទរវាងលោក បៃដិន និងលោក ម៉ាក្រុង នៅប៉ុន្មានថ្ងៃខាងមុខនេះទៅតាមសំណើរបស់ប្រធានាធិបតីអាមេរិក។
តើភាពតានតឹងរវាងបារាំង-អាមេរិក មានសង្ឃឹមអាចដោះស្រាយបានក្នុងពេលឆាប់ៗដែរទេ?
អ្វីដែលលោកម៉ាក្រុងទំនងជានឹងនិយាយជាមួយប្រធានាធិបតីអាមេរិកមុនគេគឺគ្មានអ្វីក្រៅពីតែសុំឲ្យអាមេរិកបកស្រាយបំភ្លឺអំពីមូលហេតុដែលជំរុញឲ្យក្រុងកង់បេរ៉ាសម្រេចលុបចោលកិច្ចសន្យាដ៏ធំឈប់ទិញនាវាមុជទឹកបារាំង ក្រោយអាមេរិក អូស្ត្រាលី និងអង់គ្លេស ចុះកិច្ចព្រមព្រៀងថ្មីសន្តិសុខថ្មីជាមួយគ្នា (AUKUS) កាលពីថ្ងៃពុធ ១៥ ខែកញ្ញា ឆ្នាំ២០២១រួចមក។
ក្រុងប៉ារីសចង់បានការពន្យល់ឲ្យច្បាស់ ហើយថាអាមេរិកត្រូវតែឆ្លើយនឹងសំណួរនេះ ពីព្រោះថាទង្វើរបស់អាមេរិកមើលទៅវាប្រៀបបីដូចជាការរំលោភលើទំនុកចិត្ត និងមាក់ងាយជាខ្លាំងលើបារាំងដែលជាសម្ព័ន្ធមិត្ត។
ភ្លាមៗក្រោយការលើកឡើងរបស់បារាំងខាងលើនេះ នាយករដ្ឋមន្ត្រីអូស្ត្រាលីលោក ស្កុត ម៉ូរីសុន បានបញ្ជាក់ដោយសង្កត់ធ្ងន់ថារូបលោក ហើយនិងមន្ត្រីរដ្ឋាភិបាលអូស្ត្រាលីមិនបានលាក់បាំងអ្វីឡើយពាក់ព័ន្ធសំណុំរឿងនាវាមុជទឹក។
ចំណែកលោកនាយករដ្ឋមន្ត្រីអង់គ្លេសបូរីស ចនសុន វិញបានព្យាយាមនិយាយកុំឲ្យបារាំងព្រួយបារម្ភពីកិច្ចព្រមព្រៀងថ្មីរវាងអូស្រា្តលី អង់គ្លេស និងអាមេរិក។ លោកចនសុន បានគូសបញ្ជាក់ថាកិច្ចព្រមព្រៀងខាងលើ មិនមានបំណងទាត់បារាំងចេញពីតំបន់ឥណ្ឌូប៉ាស៊ីហ្វិកនោះទេ និងថាកិច្ចព្រមព្រៀងសន្តិសុខរវាងអូស្ត្រាលី អង់គ្លេស និងអាមេរិកនេះមិនមែនជារឿងដែលគេគួរព្រួយបារម្ភនោះទេ ជាពិសេសសម្រាប់ប្រទេសសម្ព័ន្ធមិត្តដូចជាបារាំង។
យ៉ាងណាក៏ដោយ លោកប្រមុខរដ្ឋបារាំង និងលោកចូ បៃដិន ប្រធានាធិបតីអាមេរិកនឹងនិយាយគ្នាតាមទូរសព្ទនៅប៉ុន្មានថ្ងៃទៀត ដូច្នោះចម្លើយថាតើអាមេរិកអាចដោះស្រាយទំនាក់ទំនងតានតឹងដែលកំពុងមានជាមួយបារាំងបានឬក៏អត់ គេនឹងអាចដឹងក្នុងពេលឆាប់ៗខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ