អ្នកជំនាញ៖បណ្តាប្រទេសអាស៊ីអាគ្នេយ៍ និងអាស៊ីប៉ាស៊ីហ្វិកខាងត្បូងមិនចង់លូកដៃនឹងការប្រជែងគ្នារវាងចិន និងអាមេរិក
កិច្ចប្រជុំកំពូលស្តីពីការ ការពារ និងសន្តិសុខនៅអាស៊ីប៉ាស៊ីហ្វិករៀបចំក្នុងប្រទេសសិង្ហបុរីបានបិទបញ្ចប់នាថ្ងៃអាទិត្យ ទី១២ មិថុនា។ កិច្ចប្រជុំកំពូលដែលបានខកខានមិនបានធ្វើចំនួន ២ឆ្នាំជាប់គ្នាកន្លងទៅដោយសារកូវីដ១៩ ជាឱកាសដែលអនុញ្ញាតឲ្យអ្នកចូលរួមផ្តើមមានកិច្ចសន្ទនា និងលើកឡើងនូវប្រធានបទធំៗស្តីពីសន្តិសុខក្នុងតំបន់ និងលើពិភពលោក។ តែគេបានសង្កេតឃើញថា គឺបញ្ហាសន្តិសុខនៅអាស៊ីឦសាន សំណុំរឿងតៃវ៉ាន់ និងបញ្ហាកូរ៉េខាងជើងដែលបានគ្របដណ្តប់ខ្លាំងនៅក្នុងកិច្ចប្រជុំកំពូល។ លើសពីនេះ វេទិកាដដែលមួយនេះត្រូវបានអាមេរិក និងចិនប្រើដើម្បីដំឡើងសំឡេងដាក់គ្នា ពិសេសជុំវិញរឿងតៃវ៉ាន់។ លោកដាវីដ កាំរូ អ្នកស្រាវជ្រាវបានមើលឃើញថា បណ្តាប្រទេសអាស៊ីអាគ្នេយ៍ និងប៉ាស៊ីហ្វិកខាងត្បូងទើសទាល់ចិត្ត និងមិនចង់លូកដៃនៅក្នុងការប្រជែងគ្នារវាងអាមេរិក និងចិន។
ចុះផ្សាយនៅថ្ងៃ៖
ស្តាប់ - ០១:៤៦
« វាជាការខកចិត្តខ្លាំងណាស់សម្រាប់ក្រុមប្រទេសអាស៊ីអាគ្នេយ៍ រួមទាំងប្រទេសធំមួយដូចជាឥណ្ឌូណេស៊ីដែលមិនចង់ឃើញ ពិសេសមិនចង់លូកដៃនៅក្នុងការប្រជែងគ្នារវាងប្រទេសចិន និងអាមេរិកនៅក្នុងតំបន់។ សម្រាប់ក្រុមប្រទេសអាស៊ីអាគ្នេយ៍ ការដំឡើងសំឡេងដាក់គ្នារវាងអាមេរិក និងចិននៅក្នុងកិច្ចប្រជុំកំពូលទាក់ទងជាពិសេសនៅតំបន់អាស៊ីឦសាន ពោលមិនមែនអាស៊ីអាគ្នេយ៍ទេ។
ការយល់ឃើញដូចគ្នានេះក៏មានពីក្រុមប្រទេសកូនកោះនៅតំបន់ប៉ាស៊ីហ្វិកខាងត្បូងដែរ។ ក្រុមប្រទេសកូនកោះនៅតំបន់ប៉ាស៊ីហ្វិកខាងត្បូងមិនចង់ជំពាក់វាក់វិននឹងការប្រជែងកម្លាំងរវាងចិន និងអាមេរិកឡើយ។ តាមពិត វាជាកំហុសរវាងចិន និងអាមេរិកដែលចង់ជំរុញថ្នាក់ដឹកនាំនៅអាស៊ីអាគ្នេយ៍ និងប៉ាស៊ីហ្វិកខាងត្បូងឲ្យជ្រើសរើសរវាងនៅខាងចិន ឬមួយនៅខាងអាមេរិក។
តែមែនទែនទៅ និងអ្វីដែលបណ្តាប្រទេសអាស៊ីអាគ្នេយ៍ និងប៉ាស៊ីហ្វិកខាងត្បូងចង់បានប្រាកដនោះ គឺចង់ទាញបានប្រយោជន៍ទាំងសងខាងទាំងពីចិន និងពីអាមេរិកដោយមិនកាន់ជើងខាងណាទាំងអស់។ ឧទាហរណ៍ជាក់ស្តែងសម្រាប់ប្រទេសអូស្រា្តលី ដៃគូពាណិជ្ជកម្មទី១ គឺប្រទេសចិន ហើយសម្ព័ន្ធមិត្តធំ និងបងធំជាអ្នកការពារ គឺអាមេរិក។
ដូច្នេះ បណ្តាប្រទេសអាស៊ីអាគ្នេយ៍ និងប៉ាស៊ីហ្វិកខាងត្បូងចង់បន្តស្ថិតក្នុងស្ថានភាពរបៀបនេះ និងចង់បន្តប្រកាន់យកនូវជំហរមួយនេះដែលមានការពេញចិត្តទាំងអស់គ្នា។ ប្រទេសចិនបានផ្តល់ឲ្យពួកគេនូវសក្តានុពលសេដ្ឋកិច្ច ហើយអាមេរិកបានផ្តល់ឲ្យពួកគេនូវស្ថិរភាពភូមិសាស្រ្តនយោបាយ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ