សហរដ្ឋអាមេរិក៖លោកចូ បៃដិនបានធានាសម្ព័ន្ធមិត្តអាស៊ីពីកិច្ចសន្យារបស់សហរដ្ឋអាមេរិកក្នុងវិស័យការពារ
នៅសហរដ្ឋអាមេរិក ប្រធានាធិបតីជាប់ឆ្នោតលោកចូ បៃដិនបន្តហៅទូរស័ព្ទទៅកាន់ថ្នាក់ដឹកនាំប្រទេសមួយចំនួនក្នុងលោក។ បន្ទាប់ពីថ្នាក់ដឹកនាំអឺរ៉ុបក្នុងថ្ងៃពុធ ទី១១ វិច្ឆិកា លោកបៃដិនបានទូរស័ព្ទជជែកជាមួយថ្នាក់ដឹកនាំអាស៊ីចំនួន ៣ប្រទេស គឺប្រធានាធិបតីកូរ៉េខាងត្បូងលោកមូន ចៃអ៊ីន នាយករដ្ឋមន្រ្តីអូស្រ្តាលីលោកស្កុត ម៉ូរីសុន និងនាយករដ្ឋមន្រ្តីជប៉ុនលោកយ៉ូស្ហ៊ីហ៊ីដេ ស៊ូហ្គា។ នៅក្នុងកិច្ចសន្ទនា លោកបៃដិនបានថ្លែងធានាថ្នាក់ដឹកនាំអាស៊ីទាំង ៣រូបពីការសន្យារបស់សហរដ្ឋអាមេរិកក្នុងការរក្សាកតិកាសញ្ញាការពារទៅវិញ ទៅមក និងស្តារឡើងវិញនូវទំនាក់ទំនងដែលបានចុះខ្សោយនៅក្រោមប្រធានាធិបតីលោកដូណាល់ ត្រាំ។
ចុះផ្សាយនៅថ្ងៃ៖
ស្តាប់ - ០២:៣០
ការហៅទូរស័ព្ទទៅកាន់ថ្នាក់ដឹកនាំអាស៊ីទាំង ៣ប្រទេស គឺជប៉ុន កូរ៉េខាងត្បូង និងអូស្រា្តលីរបស់លោកចូ បៃដិនមិនមែនជាជម្រើសចៃដន្យទេ មិនចៃដន្យ ព្រោះទី១ ប្រទេសអាស៊ីទាំង ៣ ជាសម្ព័ន្ធមិត្តរបស់សហរដ្ឋអាមេរិក និងទី២ ប្រធានាធិបតីកូរ៉េខាងត្បូងលោកមូន ចៃអ៊ីន នាយករដ្ឋមន្រ្តីអូស្រ្តាលីលោកស្កុត ម៉ូរីសុន និងនាយករដ្ឋមន្រ្តីជប៉ុនលោកយ៉ូស្ហ៊ីហ៊ីដេ ស៊ូហ្គាបានថ្លែងសាទរការជាប់ឆ្នោតរបស់លោកបៃដិនពេញមាត់ ទោះជាលោកដូណាល់ ត្រាំបន្តមិនទទួលស្គាល់បរាជ័យក៏ដោយ។ នៅកិច្ចសន្ទនាជាមួយលោកបៃដិន នាយករដ្ឋមន្រ្តីជប៉ុនលោកស៊ូហ្គាបានព្រមានពីស្ថានការណ៍សន្តិសុខធ្លាក់ចុះខ្លាំងនៅក្នុងតំបន់។ តែលោកបៃដិនបានឆ្លើយធានាលោកស៊ូហ្គាពីការប្តេជ្ញាចិត្តរបស់សហរដ្ឋអាមេរិកក្នុងការការពារជប៉ុន និងពីកាតព្វកិច្ចដែលប្រទេសទាំងពីរត្រូវបានចងភ្ជាប់ដោយសន្ធិសញ្ញាមួយចំនួន។
តាមការឲ្យដឹងពីក្រុមការងាររបស់លោកបៃដិន ការសន្យាការពារជប៉ុនរបស់លោកបៃដិនក៏មានជាប់ពាក់ព័ន្ធនឹងទីប្រជុំកោះសេនកាគុដែលជប៉ុនកំពុងមានជម្លោះជាមួយចិនដែរ។ ចំណែកនៅក្នុងកិច្ចសន្ទនាជាមួយប្រធានាធិបតីកូរ៉េខាងត្បូងលោកមូន ចៃអ៊ីន លោកបៃដិនបានហៅសម្ព័ន្ធភាពសហរដ្ឋអាមេរិក និងកូរ៉េខាងត្បូងជាសសរនៃសន្តិសុខ និងវិបុលភាពនៅក្នុងតំបន់។ បន្ទាប់មក លោកបៃដិនក៏បានសន្យាសហការជាមួយកូរ៉េខាងត្បូងនៅលើបញ្ហារួម ដូចជាបញ្ហាកូរ៉េខាងជើង និងបម្រែបម្រួលអាកាសធាតុ។ គួរបញ្ជាក់ថាបច្ចុប្បន្ន មានទាហានអាមេរិកជាច្រើនម៉ឺននាក់កំពុងឈរជើងនៅជប៉ុន និងនៅកូរ៉េខាងត្បូង។
នៅកូរ៉េខាងត្បូង មានវត្តមានទាហានអាមេរិកចំនួន ២៨ ៥០០នាក់ដើម្បីជួយការពារកូរ៉េខាងត្បូងពីការគំរាមរបស់កូរ៉េខាងជើង។ តែលោកត្រាំធ្លាប់បានសន្យាដកទាហានអាមេរិកទាំងអស់ចេញពីជប៉ុន និងកូរ៉េខាងត្បូង។ នៅក្នុងកិច្ចសន្ទនាជាមួយនាយករដ្ឋមន្រ្តីអូស្រ្តាលីលោកស្កុត ម៉ូរីសុន លោកបៃដិនបានគូសបញ្ជាក់ពីសារៈសំខាន់ក្នុងការប្រយុទ្ធប្រឆាំងនឹងបម្រែបម្រួលអាកាសធាតុ។ ការលើកឡើងរបស់លោកបៃដិនដូចនេះបានធ្វើឡើង ខណៈដែលរដ្ឋាភិបាលអភិរក្សនិយមរបស់លោកម៉ូរីសុនជាប់ចោទពីបទយឺតយ៉ាវក្នុងការចាត់វិធានការប្រឆាំងនឹងបម្រែបម្រួលអាកាសធាតុ។ ជាការឆ្លើយតបវិញ លោកម៉ូរីសុនបានចាត់ទុកកិច្ចសន្ទនាតាមទូរស័ព្ទជាមួយលោកបៃដិនប្រកបដោយភាពកក់ក្តៅ និងថា លោកបៃដិនមិនបានលើកឡើងពីអព្យាក្រឹតកាបោនទេ តែលើកឡើងពីបច្ចេកវិទ្យាដែលអនុញ្ញាតឲ្យមានការបញ្ចុះឧស្ម័នផ្ទះកញ្ជក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ