ហ្វូគូស្ហ៊ីម៉ា ៖ តុលាការកាត់ទោសអតីតប្រធានក្រុមហ៊ុនតិបកូ ឱ្យបង់ពិន័យជិត១០០ពាន់លានអឺរ៉ូ
តុលាការក្រុងតូក្យូ បានចេញសាលក្រម នៅថ្ងៃពុធទី ១៣កក្កដានេះ កាត់ទោសអតីតអ្នកទទួលខុសត្រូវក្រុមហ៊ុនអគ្គីសនី តិបកូ (Tepco Daiichi)បួននាក់ ឱ្យបង់សំណងខូចខាតចំនួន ១៣៣០០ពាន់លានយេន (៩៧ពាន់លានដុល្លារ) ពីបទមិនអាចទប់ស្កាត់កុំឱ្យមានគ្រោះថ្នាក់នៅមជ្ឈមណ្ឌលនុយក្លេអ៊ែរហ្វូគូស្ហ៊ីម៉ា កាលពីឆ្នាំ២០១១។ អ្នកទទួលខុសត្រូវក្រុមហ៊ុនរងការកាត់ទោសឱ្យបង់ពិន័យជាលើកច្រើនសាហើយ។ ហើយនៅលើកនេះក៏ដូចលើកមុន ការពិន័យ មានតម្លៃជានិម្មិតរូបតែប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:១៣
គ្មានទោសនៅតុលាការសាលាដំបូង អតីតថៅកែក្រុមហ៊ុនតិបកូ- អតីតប្រធានក្រុមប្រឹក្សារដ្ឋបាល និងអតីតអនុប្រធានក្រុមហ៊ុនតិបកូពីររូប ព្រមទាំងអតីតអ្នកទទួលខុសត្រូវក្រុមហ៊ុនម្នាក់ទៀត ត្រូវបានតុលាការក្រុងតូក្យូកាត់ទោស នៅថ្ងៃទី ១៣កក្កដា២០២២នេះ ឱ្យបង់ពិន័យក្នុងតម្លៃដ៏មហាសាល ប្រមាណ ៩៧ពាន់លានអឺរ៉ូ។ នេះជាលើកទីមួយដែលតុលាការបញ្ជាក់អំពីកំហុសរបស់អតីតមេដឹកនាំក្រុមហ៊ុនអគ្គិសនី ថាមានទំនួលខុសត្រូវក្នុងគ្រោះមហន្តរាយនុយក្លេអ៊ែរក្រោយការរញ្ជួយដីនិងរលកយក្សស៊ូណាមី។
សាលក្រមនេះជាលទ្ធផលនៃដំណើរការក្តីតាំងពីឆ្នាំ២០១២ និងជាជោគជ័យសម្រាប់ក្រុមអ្នកមានភាគហ៊ុនដែលជាដើមបណ្តឹង។ រកឃើញអ្នកខុសហើយ! នេះជាសម្រែកអបអររបស់ក្រុមម្ចាស់ភាគហ៊ុន ដែលបានឈ្នះក្តី តែមិនអាចទទួលសំណងនៃការខូចខាតទេ ព្រោះនេះជាការពិន័យដ៏ធ្ងន់ធ្ងរក្រៃ ដែលមានតម្លៃជានិម្មិតរូប ឱ្យសក្តិសមទៅទំហំនៃការវិនាសកម្ម។
នៅក្នុងសាលក្រម ចៅក្រមបានគូសបញ្ជាក់ថា ក្រុមហ៊ុនមិនបានគិតដល់សុវត្ថិភាពនិងទំនួលខុសត្រូវជាមូលដ្ឋានគ្រឹះក្នុងវិស័យថាមពលនុយក្លេអ៊ែរ។ ក្រុមហ៊ុនអាចបញ្ចៀសមហន្តរាយនុយក្លេអ៊ែរបានប្រសិនបើមេដឹកនាំក្រុមហ៊ុនធ្វើតាមរបាយការណ៍ចែងពីវិធានការការពារទល់រលកយក្ស ដូចជា សង់ប្រព័ន្ធអគ្គីសនីសង្គ្រោះនៅទីខ្ពស់ តាមបណ្តោយឆ្នេរមហាសមុទ្ទប៉ាស៊ីហ្វិក ភាគឦសានជប៉ុន។ នៅពេលមានរលកយក្សស៊ូណាមីថ្ងៃទី ១១មីនា២០១១ ក្នុងចំណោមម៉ាស៊ីនប្រតិករនុយក្លេអ៊ែរ៦របស់មជ្ឈមណ្ឌល មានបី (១-២-៣)កំពុងដើរ តែប្រព័ន្ធបញ្ចុះកម្តៅបានខូចព្រោះម៉ាស៊ីនភ្លើងត្រូវលិចទឹក ទើបស្នូលប្រតិករទាំងបីរលាយចូលគ្នា ហើយបង្កឱ្យមានផ្ទះអ៊ីដ្រូហ្សែននៅម៉ាស៊ីនប្រតិករ ១ -៣ និង៤ ទើបបង្កឱ្យមានការខូចខាតយ៉ាងខ្លាំង។ ការសម្អាតជាតិវិទ្យុសកម្ម និងរំសាយមណ្ឌលនុយក្លេអ៊ែរនេះ ត្រូវការប្រើពេលជាច្រើនទសវត្សរ៍ទៀតណាស់។
សូមរំលឹកថា ការរញ្ជួយដី បន្តដោយរលកយក្សស៊ូណាមិ ថ្ងៃទី ១១មីនា២០១១ បានសម្លាប់ជិវិតមនុស្សអស់ជាង១៨៥០០នាក់នៅភាគឦសានជប៉ុន និងគ្មានអ្នកស្លាប់ដោយមហន្តរាយនុយក្លេអ៊ែរ ផ្ទាល់ភ្លាមទេ។ ប៉ុន្តែមហន្តរាយនុយក្លេអ៊ែរហ្វូគូស្ហ៊ីម៉ា បានសម្លាប់ដោយប្រយោលមនុស្សអស់រាប់ពាន់នាក់ តាមក្រោយ។ នេះបើតាមការទទួលស្គាល់របស់រដ្ឋាភិបាលជប៉ុន។
បច្ចុប្បន្ននេះ រដ្ឋាភិបាលជប៉ុនប៉ាន់ប្រមាណថាទំហំនៃមហន្តរាយនុយក្លេអ៊ែរមានតម្លៃដល់ទៅ ១៧៣ពាន់លានអឺរ៉ូ សម្រាប់រយៈពេល៤០ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ