មជ្ឈមណ្ឌលនុយក្លេអ៊ែរហ្វូគូស្ហ៊ីម៉ា ៖ ជញ្ជាំងទឹកកកការពារទឹកពុល រលាយអស់មួយភាគ
ជាង១០ឆ្នាំ ក្រោយគ្រោះមហន្តរាយ មជ្ឈមណ្ឌលនុយក្លេអ៊ែរហ្វូគូស្ហ៊ីម៉ា កំពុងបង្កបង្កើតការព្រួយបារម្ភជាថ្មី។ ជញ្ជាំងទឹកកកដែលជារនាំងការពារកុំឱ្យទឹកពុលមានជាតិវិទ្យុសកម្មជ្រាបហូរទៅក្នុងសមុទ្ទបានរលាយអស់មួយភាគ ព្រោះសីតុណ្ហភាពក្រោមដីបានឡើងដល់១០អង្សានៅកន្លែងខ្លះ។ ក្រុមហ៊ុនអគ្គីសនីTepco អ្នកគ្រប់គ្រងការរំលាយមជ្ឈមណ្ឌលគ្រោងនឹងធ្វើការជួសជុលចាប់ពីដើមខែធ្នូទៅ។
ចុះផ្សាយនៅថ្ងៃ៖
ស្តាប់ - ០២:០៧
ដើម្បីកំរិតការហូរជ្រាបទឹកពុលមានជាតិវិទ្យុសកម្មទៅក្នុងស្រទាប់ដី ទៅក្នុងសមុទ្ទ ក្រុមហ៊ុនតិបកូ Tepco បានសាងសង់ជញ្ជាំងទឹកកកក្រោមដី កាលពីឆ្នាំ២០១៦ ព័ទ្ធជុំវិញម៉ាស៊ីនប្រតិករនុយក្លេអ៊ែរដែលរងការខូចខាតដោយគ្រោះរញ្ជួយដី និងរលកយក្សស៊ូណាមី កាលពីថ្ងៃទី ១១មីនា២០១១។ មានប្រវែង ១៥០០ម៉ែត្រ ជញ្ជាំងទឹកកកមានបំពាក់ទៅដោយទុយោប្រទាក់ខ្វាត់ខ្វែង ក្នុងជម្រៅដល់៣០ម៉ែត្រក្រោមដី និងធ្វើឱ្យទឹកនៅតំបន់ជុំវិញឡើងកកជាប្រចាំ មិនអាចហូរជ្រាបបានទេ។ បច្ចេកវិទ្យានេះបានកាត់បន្ថយមួយជាបួន មិនឱ្យទឹកមានជាតិវិទ្យុសកម្ម ហូរជ្រាបចេញមកក្រៅទៅបំពុលសមុទ្ទ។ ប៉ុន្តែតាំងពីប៉ុន្មានសប្តាហ៍ចុងក្រោយមកនេះ ប្រព័ន្ធវាស់សីតុណ្ហភាពក្រោមដី បានចង្អុលសីតុណ្ហភាពឡើងជិត១០អង្សា។ ជាមួយសីតុណ្ហភាពខ្ពស់បែបនេះ ជញ្ជាំងទឹកកកក្រោមដីពិតជាត្រូវរលាយខ្លះជាក់ជាមិនខាន។
Tepco បានសន្យាធ្វើការជួសជុល ចាប់ពីដើមខែធ្នូនេះតែម្តង ដើម្បីពង្រឹងរចនាសម្ព័ន្ធជញ្ជាំងទឹកកកក្រោមដីឡើងវិញ។ ការរលាយជញ្ជាំងទឹកកកនេះមិនមែនជាគ្រោះថ្នាក់អ្វីបន្ថែមប៉ះពាល់ដល់ម៉ាស៊ីនប្រតិករនុយក្លេអ៊ែរដែលរងការខូចខាតទៅហើយនោះទេ ប៉ុន្តែវាអាចរំខានខ្លាំងដល់ចំណាត់ការគ្រប់គ្រងទឹកពុល ក្នុងខណៈដែលក្រុមហ៊ុនតិបកូ កំពុងជួបការលំបាកលែងមានសមត្ថភាពស្តុកទឹកពុលស្រាប់ផង។ ក្រុមហ៊ុនទើបទទួលបានការអនុញ្ញាតពីរដ្ឋាភិបាលឱ្យចាក់ទឹកប្រើរួចនេះ ទៅក្នុងមហាសមុទ្ទប៉ាស៊ីហ្វិក ចាប់ពីឆ្នាំ២០២៤ទៅ។
សូមបញ្ជាក់ថា ទឹកប្រើជាប្រចាំសម្រាប់ បញ្ចុះកម្តៅម៉ាស៊ីនប្រតិករបីក្នុងចំណោមម៉ាស៊ីនប្រតិករទាំង៦នៃមជ្ឈមណ្ឌលហ្វូគូស៊្ហីម៉ា ដែលខូតខាតក្នុងអំឡុងរញ្ជួយដី ជាទឹកមានជាតិពុល និង ត្រូវបានតិបកូយកទៅស្តុកទុកនៅក្នុងអាងបំរុងចំនួនរាប់ពាន់អាង ក្រោយពីចម្រោះសម្អាតហើយ។ ចម្រោះសម្អាតជាតិវិទ្យុសកម្មមែន តែទឹកនេះ នៅមានសល់សារធាតុពុល Tritiumដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ