របាយការណ៍ដ៏រន្ធត់ស្តីពីការបាត់បង់ជីវិតសត្វ និងរុក្ខជាតិនៅអូស្រ្តាលី
រដ្ឋាភិបាលអូស្ត្រាលី បានចេញរបាយការណ៍ដ៏គួរឲ្យរន្ធត់មួយដែលបង្ហាញពីការគំរាមកំហែងមិនធ្លាប់មានទៅលើជីវិតសត្វ និងរុក្ខជាតិនៅអូស្ត្រាលី។ តាមរបាយការណ៍ ចេញផ្សាយ នៅថ្ងៃអង្គារទី ១៩កក្កដា សត្វនិងរុក្ខជាតិ មិនថា នៅលើដី និងនៅក្នុងទឹករងការបំផ្លាញ គំរាមកំហែង ដោយសារ ភ្លើងឆេះព្រៃ អាកាសធាតុក្តៅស្ងួតហួតហែងខ្លាំង ការឡើងកំដៅផែនដី ហើយនិងចុងក្រោយ គឺដោយសារសកម្មភាពរបស់មនុស្ស។
ចុះផ្សាយនៅថ្ងៃ៖
ស្តាប់ - ០២:៣៦
របាយការណ៍ ៥ឆ្នាំម្តងរបស់រដ្ឋាភិបាលអូស្ត្រាលីបានបង្ហាញតារាងខូចខាត និងការបាត់បង់ជីវិតសត្វនិងរុក្ខជាតិរបស់អូស្ត្រាលី ក្នុងកម្រិតមួយ ដ៏គួរឲ្យព្រួយបារម្ភ។ ចាប់តាំងពីសតវត្សរ៍ ទី២០ កសីតុណ្ហភាពជាមធ្យមរបស់អូស្ត្រាលីបានកើនឡើង ១,៤អង្សា ដោយសារការឡើងកំដៅនៃភពផែនដី។
រលកកំដៅដែលបានបង្កឲ្យមានភ្លើងឆេះព្រៃដ៏សន្ធោសន្ធៅខ្លាំងមិនធ្លាប់មាន នៅអូស្ត្រាលី កាលពីឆ្នាំ ២០១៩ និងឆ្នាំ ២០២០ បានបំផ្លាញដំណាំរុក្ខជាតិច្រើនជាង ៨លានហិចតា និងបានសម្លាប់ ឬធ្វើឲ្យសត្វព្រៃផ្លាស់ទី ពី ១ពាន់ ទៅ ៣ពាន់លានក្បាល។ ចំណែករលកកំដៅនៅក្នុងមហាសមុទ្របានបំផ្លាញផ្កាថ្មអូស្ត្រាលី ដែលជាសម្បត្តិធម្មជាតិដ៏កម្រលើលោក។
ចាប់តាំងពីឆ្នាំ ១៩៩០ ព្រៃញឹក ឬព្រៃដែលមនុស្សមិនដែលចូលដល់ ត្រូវបំផ្លាញអស់រាប់លានហិចតា ចំណែកជំរករបស់សត្វព្រៃកម្រ ជាង ៧លានហិចតាត្រូវបំផ្លាញរិចរិល ចាប់ពីឆ្នាំ ២០០០ដល់ឆ្នាំ ២០១៧។ គេវាយតម្លៃថា ដោយសារតែបាត់បង់ជំរក និងការបំផ្លាញ ដោយសារគ្រប់ហេតុផល នៅក្នុងរយៈពេលតែ៥ឆ្នាំប៉ុណ្ណោះ រុក្ខជាតិ និងសត្វព្រៃ ជាង២០០ប្រភេទត្រូវបានគេដាក់បញ្ចូលក្នុងបញ្ជីឈ្មោះ រុក្ខជាតិ សត្វដែលត្រូវប្រឈមនឹងការរលាយផុតពូជ តាមការចែងរបស់ច្បាប់អូស្ត្រាលី។
តាមរបាយការណ៍ដ៏គួរស្លុតចិត្តសម្រាប់រដ្ឋាភិបាលអូស្ត្រាលី អូស្ត្រាលី បានបាត់បង់ថនិកសត្វច្រើនជាង ទ្វីបណាៗទាំងអស់។ ក្នុងរយៈពេល៥ឆ្នាំ ចំនួនសត្វដែលរងការគំរាមកំហែង ប្រឈមនឹងការផុតពូជបានកើនឡើង៨%។
អាកាសធាតុក្តៅខ្លាំង ភ្លើងឆេះព្រៃ និងសកម្មភាពរបស់មនុស្ស គឺជាដើមហេតុចំបងនៃការបំផ្លិចបំផ្លាញជីវិតសត្វ និងរុក្ខជាតិនៅអូស្រ្តាលី។ តាមរបាយការណ៍ ខាងលើ ទីក្រុងអូស្ត្រាលីបានអភិវឌ្ឍក្នុងល្បឿនមួយដ៏លឿន ដែលជាហេតុបង្កមានការឡើងកំដៅ ការបំពុលបរិយាកាស សំរាមទីក្រុង និងគំរាមកំហែងប្រភពទឹក និងថាមពល។ ជាក់ស្តែង ដោយសារតែការអភិវឌ្ឍ ក្រុងស៊ីដនីបានបំផ្លាញ ដីព្រៃរបស់ខ្លួនអស់ ៧០%។
សម្រាប់អង្គការការពារសត្វព្រៃ របាយការណ៍បរិស្ថានខាងលើ បានបង្ហាញពីបរាជ័យរបស់រដ្ឋាភិបាលអូស្ត្រាលី ក្នុងការអនុវត្តច្បាប់ និងការចាត់វិធានការការពាររុក្ខជាតិ សត្វព្រៃ។ ម្យ៉ាងវាក៏ជាការទាញសញ្ញាអាសន្ន ដាស់ស្មារតី របស់រដ្ឋាភិបាលអូស្ត្រាលី ឲ្យត្រូវប្រឹងប្រែង ប្រញាប់ចាត់វិធានការបន្ទាន់ឡើង ដូចជាវិនិយោគច្រើនជាងមុន និងបង្កើតច្បាប់តឹងរ៉ឹងជាងមុន បើសិនជាគេមិនចង់ឃើញ សត្វព្រៃដ៏កម្រ ដែលមានតែនៅលើទឹកដីអូស្ត្រាលី ដូចជាសត្វ កូអាឡាជាដើម ត្រូវរលាយផុតទេនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ