មន្ត្រីអភិរក្សព្រៃឈើថៃ៤នាក់ ជាប់ចោទពីបទសម្លាប់សកម្មជនបរិស្ថានការ៉េនម្នាក់ នៅឆ្នាំ២០១៤
មន្ត្រីអភិរក្សព្រៃឈើថៃចំនួន៤នាក់ ត្រូវព្រះរាជអាជ្ញាថៃ ចោទជាផ្លូវការ សង្ស័យថាបានសម្លាប់សកម្មជនបរិស្ថាន ជនជាតិភាគតិចការ៉េនម្នាក់ ឈ្មោះ Billy កាលពីឆ្នាំ២០១៤។ ករណីបាត់ខ្លួនសកម្មជនបរិស្ថានរូបនេះ បានធ្វើឲ្យកក្រើករញ្ជួយប្រទេសថៃ ហើយដែលបំណែកឆ្អឹងសាកសព របស់ជនរងគ្រោះ ត្រូវបានគេរកឃើញកាលពីឆ្នាំ២០២០។ ការបើកសំណុំរឿងឡើងវិញ និងឈានដល់ការចោទប្រកាន់នេះ នឹងបើកវាំងននបង្ហាញអំពីសកម្មភាពបំពានអំណាចរបស់មន្ត្រីរាជការថៃ ទៅលើសហគមន៍ជនជាតិភាគតិច។
ចុះផ្សាយនៅថ្ងៃ៖
ស្តាប់ - ០២:៥៤
Por Cha Lee Rakchongcharoen ឈ្មោះក្រៅហៅថា Billy គឺជាសកម្មជនបរិស្ថាន ការពារសិទ្ធិជនជាតិភាគតិចការ៉េន។ ថ្ងៃទី១៧ មេសា ២០១៤ Billyបានបាត់ខ្លួន បន្ទាប់ពីត្រូវបានមន្ត្រីអភិរក្សឧទ្យានជាតិ កេងក្រៈចាន ដែលស្ថិតក្នុងខេត្តភេតឆាប៊ូរី ឃាត់ខ្លួនពីបទចូលទៅលួចប្រមូលផលទឹកឃ្មុំដោយខុសច្បាប់។ ការពិតនៅថ្ងៃកើតហេតុ Billy ត្រូវទៅជួបសហគមន៍ជនជាតិភាគតិចការ៉េន ដើម្បីជួយពួកគេ រៀបចំពាក្យបណ្តឹង ទាក់ទិននឹងសកម្មភាពរបស់អាជ្ញាធរតំបន់ ដែលបានដុតបំផ្លាញផ្ទះប្រជាជនចំនួន២០គ្រួសារ នៅក្នុងឧទ្យាជាតិនេះ កាលពីឆ្នាំ២០១១។
៥ឆ្នាំក្រោយមក សមត្ថកិច្ចថៃ បានរកឃើញបំណែកលលាដ៍ក្បាល ដែលមានស្នាមឆេះខ្លោច នៅក្នុងទឹកបឹងមួយកន្លែងក្នុងឧទ្យានជាតិ។ ឆ្លងកាត់ការពិនិត្យ ADN សមត្ថកិច្ចថៃអះអាងថា បំណែកលលាដ៍ក្បាលនេះ គឺជារបស់សកម្មជនបរិស្ថានឈ្មោះ Billy។ ការស៊ើបអង្កេតបានចាប់ផ្តើម ដោយឈានទៅដល់ការឃាត់ខ្លួន ជនសង្ស័យចំនួន៤នាក់ ក្នុងនោះមានអតីតប្រធានអភិរក្សឧទ្យាជាតិកេងក្រៈចានផ្ទាល់តែម្តង។ តែជននេះ តែងតែបានឆ្លើយអះអាងជានិច្ច ថាខ្លួនបានឃាត់ខ្លួន Billy នៅថ្ងៃកើតហេតុមែន តែបានដោះលែងទៅវិញទេ។
ដោយគ្មានភស្តុតាង និងគ្មានសាក្សីអះអាង សមត្ថកិច្ចថៃបានសម្រេចបោះបង់ចោលការស៊ើបអង្កេត និងការចោទប្រកាន់ទាំងស្រុង កាលពីខែមករាឆ្នាំ២០២០ ។ ក៏ប៉ុន្តែដោយមានការតវ៉ារិះគន់ ទីបំផុតនាយកដ្ឋានស៊ើបអង្កេតពិសេសនៃក្រសួងយុត្តិធម៌ថៃ បានសម្រេចបើកសំណុំរឿងនេះឡើងវិញ។ ថ្ងៃចន្ទទី១៥សីហាម្សិលមិញ លោក Prayut Petchkhun អ្នកនាំពាក្យព្រះរាជាថៃ បានបញ្ជាក់ឲ្យដឹងថា មន្ត្រីអភិរក្សឧទ្យានជាតិចំនួន៤នាក់ ក្នុងនោះមាន ឈ្មោះ Chaiwat Limlikitaksor អតីតប្រធានឧទ្យានជាតិកេងក្រៈចាន នឹងត្រូវរងការចោទប្រកាន់ជាផ្លូវការ ពី បទមនុស្សឃាតដោយចេតនា បង្ឃាំងមនុស្សដោយខុសច្បាប់ និងពីបទបំផ្លាញសាកសព។
គួរកត់សំគាល់ថា ការបើកសំណុំរឿងសាឡើងវិញ ហើយឈានទៅដល់ការចោទប្រកាន់នេះ គឺជាដំណឹងល្អមួយ ដែលក្រុមគ្រួសាររបស់ជនរងគ្រោះ ក៏ដូចជាអង្គការការពារបរិស្ថាននៅថៃ បានរំពឹងរងចាំជាយូរមកហើយ។ គេសង្ឃឹមថា វានឹងឈានទៅដល់ការជំនំជំរះក្តីស្វែងរកយុត្តិធម៌ ជាគម្រូប្រឆាំងនឹងអំពើពុករលួយ និងការបំពានសិទ្ធិសហគមន៍ជនជាតិភាគតិចនៅថៃ។
យោងតាមអង្គការសហប្រជាជាតិ យ៉ាងហោចមានករណីបាត់ខ្លួនដោយបង្ខំនៅថៃ ចំនួន៨២ករណី រាប់ពីឆ្នាំ១៩៨០មក។ តែតួលេខនេះត្រូវបានអង្គការសិទ្ធិមនុស្សនានា ជឿថាទាបជាងការពិតជាក់ស្តែង។ ទាក់ទិននឹងករណីធ្វើទារុណកម្ម និងការបាត់ខ្លួនដោយបង្ខំ នៅថៃ គឺគ្មានច្បាប់ចែងកំណត់ឲ្យច្បាស់លាស់ទេ។ ទើបតែកាលពីខែកុម្ភៈឆ្នាំ២០២២នេះ ដែលសភាជាន់ទាបថៃ បានបោះឆ្នោតអនុម័តច្បាប់មួយ ចាត់ទុកអំពើទាំង២នេះ ថាជាអំពើឧក្រិដ្ឋ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ