ចិននឹងបញ្ជូនកងទ័ព ទៅធ្វើសមយុទ្ធរួមគ្នាជាមួយរុស្ស៊ី នៅតំបន់ភាគខាងកើតរុស្ស៊ី
ក្រសួងការពារជាតិចិនបានបញ្ជាក់ឲ្យដឹងនៅព្រឹកថ្ងៃព្រសហ្បតិ៍នេះថា នៅចុងខែសីហានេះ ខ្លួននឹងបញ្ជូនកងទ័ពឲ្យទៅចូលរួម ក្នុងការធ្វើសមយុទ្ធយោធាប្រចាំឆ្នាំ ឈ្មោះ “Vostok” ដែលដឹកនាំដោយកងទ័ពរុស្ស៊ី នៅឯតំបន់ភាគខាងកើតនៃដែនដីរុស្ស៊ី។ ចិនអះអាងថា ការចូលរួមក្នុងសមយុទ្ធយោធានេះ គឺវាស្ថិតនៅក្នុងក្របខណ្ឌរឹតចំណងសហប្រតិបត្តិការ រវាងកងទ័ពចិននិងកងទ័ពរុស្ស៊ី។ ដោយឡែកបរិបទតាមតឹងនាពេលបច្ចុប្បន្ននេះ ធ្វើឲ្យអ្នកវិភាគបារម្ភថា សម្ព័ន្ធភាពកងទ័ពចិននិងរុស្ស៊ីនេះ គឺមានកម្មវត្ថុប្រជែងកម្លាំងជាមួយអាមេរិក។
ចុះផ្សាយនៅថ្ងៃ៖
ស្តាប់ - ០១:៤៧
កម្មវិធីសមយុទ្ធយោធា Vostok ប្រចាំឆ្នាំ២០២២ របស់រុស្ស៊ី នឹងត្រូវប្រព្រឹត្តិធ្វើទៅ ចាប់ពីថ្ងៃទី ៣០សីហា ដល់ថ្ងៃទី៥កញ្ញា។ តាមរយៈលិខិតប្រកាសមួយ នៅព្រឹកថ្ងៃទី១៨សីហា ក្រសួងការពារជាតិចិនបានបញ្ជាក់ឲ្យដឹងថា ខ្លួននឹងបញ្ជូនកងទ័ព ឲ្យទៅចូលរួមនៅក្នុងសមយុទ្ធយោធានេះ។
ក្រសួងការពារជាតិចិនបញ្ជាក់បន្ថែមថា កម្មវត្ថុនៃការចូលរួមនេះ គឺដើម្បី ដកស្រង់បទពិសោធន៍ទៅវិញទៅមក ជីករណ្ដៅនៃចំណងសហប្រតិបត្តិការ រវាងកងទ័ពចិន និងរុស្ស៊ី ឲ្យកាន់តែមានជម្រៅជ្រៅឡើងថែមទៀត និងជាពិសេសនោះ គឺជាការពង្រឹងចំណងសហប្រតិបត្តិការយុទ្ធសាស្ត្រ រវាងមហាមិត្តទាំង២ ដើម្បីឆ្លើយតបទៅនឹងការគំរាមកំហែងផ្នែកសន្តិសុខ។ តែទន្ទឹមគ្នានេះ ក្រសួងការពារជាតិចិនអះអាងថា សមយុទ្ធយោធារួមគ្នាជាមួយរុស្ស៊ីនេះ គឺវាគ្មានអ្វីពាក់ព័ន្ធ នឹងបញ្ហាតានតឹងនៅក្នុងតំបន់ នាពេលបច្ចុប្បន្ននេះឡើយ។
គួរបញ្ជាក់ថា ក្រៅពីចិន សមយុទ្ធយោធាដ៏ធំ ដែលកងទ័ពរុស្ស៊ីនឹងរៀបចំធ្វើ នៅភាគខាងកើតប្រទេសខ្លួននេះ នឹងមានការចូលរួមពីកងទ័ពប្រទេសមួយចំនួនទៀត ដូចជាឥណ្ឌា ម៉ុងហ្គោលី បេឡារុស និងតាតជីគីស្ថាន ជាដើម។ កាលពីខែឧសភាឆ្នាំនេះ កងទ័ពចិនក៏បានចូលរួម ក្នុងសមយុទ្ធយោធាទ្វេភាគីជាមួយរុស្ស៊ីដែរ ដែលបានប្រព្រឹត្តិធ្វើទៅរយៈពេល១៣ម៉ោង នៅក្បែរកូរ៉េខាងត្បូង និងជប៉ុន ជួនចំពេលដែលលោក ចូ បៃដិនកំពុងមានវត្តមាននៅទីក្រុងតូក្យូ។
ឆ្លើយទៅនឹងសំណួរអ្នកកាសែត លោក ណេដ ប្រាយស៍ អ្នកនាំពាក្យក្រសួងការបរទេសអាមេរិក បានបញ្ជាក់ថា អាមេរិកមិនមានប្រតិកម្មអ្វីណាមួយ ទាកទិននឹងកម្មវិធីសមយុទ្ធយោធាប្រចាំឆ្នាំរបស់រុស្ស៊ីនេះទេ។ ជាមួយគ្នានេះ លោកបានបន្ថែមថា ប្រទេសខ្លះដែលចូលរួមក្នុងសមយុទ្ធនេះ ក៏ធ្លាប់មានវត្តមាននៅក្នុងសមយុទ្ធហាត់សម ដែលកងទ័ពអាមេរិក បានដឹកនាំដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ