តៃវ៉ាន់អះអាងថាសមយុទ្ធចិនបានពង្រឹងសាមគ្គីភាពអន្តរជាតិ
សម្ព័ន្ធមិត្តអន្តរជាតិរបស់តៃវ៉ាន់ រឹតតែចង់មកបំពេញទស្សនកិច្ចនៅកោះប្រជាធិបតេយ្យ និងមានសាមគ្គីភាពជាមួយតៃវ៉ាន់ កាន់តែខ្លាំងឡើង ក្រោយពីចិនបានដឹកនាំធ្វើលំហាត់សឹកបែបឡោមព័ទ្ធកោះមក។ នេះជាប្រសាសន៍របស់លោករដ្ឋមន្ត្រីការបរទេសតៃវ៉ាន់ Joseph Wu ហ្សូសេព វ៉ូ នៅក្នុងឱកាសជួបជាមួយក្រុមអ្នកសារព័ត៌មានបរទេស នាថ្ងៃសុក្រទី ២៦សីហា២០២២។
ចុះផ្សាយនៅថ្ងៃ៖
ស្តាប់ - ០១:៥៥
សម្រាប់លោកប្រមុខការទូតតៃវ៉ាន់ ហ្សូសេព វ៉ូ សមយុទ្ធរបស់ចិនកាលពីដើមខែមិនបាននាំប្រយោជន៍ឱ្យប៉េកាំងទេ។ ផ្ទុយទៅវិញ សម្ពាធយោធារបស់ចិនមកលើតៃវ៉ាន់ បានរុញច្រានឥស្សរជននយោបាយបរទេសឱ្យចង់មកនិងគាំទ្រតៃវ៉ាន់ កាន់តែច្រើនជាងពេលណាៗទាំងអស់ ! មិត្តបរទេសចង់មកតៃវ៉ាន់ ក្នុងចំបងតែមួយគឺដើម្បីសម្តែងសាមគ្គីភាពជាមួយតៃវ៉ាន់។ នេះបើតាមលោកប្រមុខការទូតដដែល។
ក្រោយទស្សនកិច្ចរបស់លោកស្រីប្រធានសភាអាមេរិក ណាន់ស៊ី ប៉ូឡូស៊ី ដែលចិនសងសឹកដោយប្រមូលទ័ពធ្វើសមយុទ្ធដ៏សម្បើមមិនធ្លាប់មាន បែបឡោមព័ទ្ធកោះតៃវ៉ាន់មក មានអ្នកទទួលខុសត្រូវនយោបាយអាមេរិកបីរូបផ្សេងទៀត ជាសមាជិកព្រឹទ្ធសភាបក្សសាធារណរដ្ឋ លោក Ed Markey លោកអភិបាលរដ្ឋ Indiana Eric Holcomb បានអញ្ជើញមកទស្សនាកោះ។ នៅសុក្រទី ២៦សីហានេះ នៅទីក្រុងតៃប៉ិ លោកស្រីប្រធានាធិបតី សៃ អ៊ីនវេន បានទទួលជួបតំណាងព្រឹទ្ធសភាបក្សសាធារណរដ្ឋ លោកស្រី Marsha Blacburn ម្នាក់ទៀត។
កាយវិការគាំទ្ររបស់សម្ព័ន្ធមិត្តនេះ និងការដំឡើងសាច់ដុំរបស់ចិន ជាកម្លាំងជួយពង្រឹងឆន្ទៈតៃវ៉ាន់ឱ្យកាន់មុះមុតការពារខ្លួនបន្ថែមទៀត។ នេះជាប្រសាសន៍របស់លោកស្រីប្រធានាធិបតីតៃវ៉ាន់ ទៅកាន់លោកស្រីសមាជិកព្រឹទ្ធសភាអាមេរិកជាភ្ញៀវ។
ជាមួយនឹងកម្លាំងចិត្តដាច់ខាតការពារខ្លួនពីការគំរាមកំហែងឈ្លានពានរបស់ចិន តៃវ៉ាន់បានថែមទាំងប្រកាសកាលពីថ្ងៃទី ២៥សីហា បង្កើនថវិកាការពារជាតិចំនួនជិត ១៤% សម្រាប់ឆ្នាំក្រោយ។ រដ្ឋាភិបាលនិងលោកស្រីប្រធានាធិបតី គ្រោងដំឡើងថវិកាការពារជាតិឱ្យឡើងដល់ ៥៨៦,៣ពាន់លានដុល្លារតៃវ៉ាន់ ពោលគឺជាកំរិតខ្ពស់ខ្លាំងកំពូល ដោយមានភ្ជាប់ផែនការទិញយន្តហោះចម្បាំងទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ