អាមេរិកដឹកនាំសមយុទ្ធយោធាដ៏ធំប្រចាំឆ្នាំ នៅឥណ្ឌូណេស៊ី តែអះអាងថាគ្មានបំណងគំរាមនរណាទេ
កាលពីថ្ងៃសុក្រ ទី១២សីហា ទាហានអាមេរិក និងឥណ្ឌូណេស៊ីជាច្រើនពាន់នាក់ បានធ្វើសមយុទ្ធយោធារួមគ្នា នៅលើកោះស៊ូម៉ាត្រា ដោយបានប្រើគ្រាប់ពិត។ គួរកត់សំគាល់ថា សមយុទ្ធយោធាដឹកនាំដោយអាមេរិកនេះ គឺវាស្ថិតនៅក្នុងបរិបទដ៏តានតឹង បន្ទាប់ពីសំណុំរឿងកោះតៃវ៉ាន់ បានផ្ទុះឆេះឡើងយ៉ាងក្តៅគគុក។ កាលពីសប្តាហ៍កន្លងទៅ ចិនបានធ្វើសមយុទ្ធយោធា ព័ទ្ធជុំវិញតៃវ៉ាន់ ដែលសមយុទ្ធនេះ ត្រូវបានភាគីអាមេរិកចាត់ទុកថា ជាអំពើបង្កអស្ថិរភាព។
ចុះផ្សាយនៅថ្ងៃ៖
ស្តាប់ - ០២:០៥
សមយុទ្ធប្រចាំឆ្នាំដ៏ធំនេះ ត្រូវបានគេដាក់ឈ្មោះថា Super Garuda Shield។ ក្នុងពេលធ្វើសមយុទ្ធ កងទ័ពដែលចូលរួម បានប្រើប្រាស់គ្រាប់ពិត ដូចជាបានបាញ់គ្រាប់មីស៊ីលប្រឆាំងរថក្រោះ ប្រភេទ Javelin និងបានប្រើឧត្ថម្ភាគចក្រ Apach ព្រមទាំងបានប្រើកាំភ្លើងយន្ត និងបាញ់រ៉ូកែតជាច្រើនគ្រាប់។
លោក John Aquilino អគ្គបញ្ជាកងទ័ពអាមេរិក ប្រចាំតំបន់ឥណ្ឌូប៉ាស៊ីហ្វិក បានអះអាងថា សមយុទ្ធយោធាប្រចាំឆ្នាំ ដែលអាមេរិកបានដឹកនាំធ្វើនៅឥណ្ឌូណេស៊ី តាំងតែពីថ្ងៃទី១សីហាមកនោះ គឺមិនមានកម្មវត្ថុ សំដៅគំរាមសំឡុតទៅលើប្រទេសណាមួយឡើយ។ តែយ៉ាងណា នៅក្នុងសន្និសីទកាសែត កាលពីថ្ងៃសុក្រទី១២សីហា លោកមេបញ្ជាការអាមេរិករូបនេះ បានទទួលស្គាល់ថា សកម្មភាពសមយុទ្ធយោធារបស់ចិន ដែលបានធ្វើពេញមួយសប្តាហ៍ ព័ទ្ធជុំវិញកោះតៃវ៉ាន់ គឺវាជាសកម្មភាពបង្កអស្ថិរភាព។ លោកបានអះអាងថា គឺសកម្មភាពបែបគំរាមសំឡុតរបៀបនេះហើយ ដែលយើងចង់បញ្ចៀសឲ្យបាន ហើយជារៀងរាល់ថ្ងៃ យើងបានព្យាយាមរារាំង កុំឲ្យមានសង្គ្រាមផ្ទុះឡើង។
គួររំលឹកថា ភាពតានតឹងបានផ្ទុះឡើងជាខ្លាំង នៅតំបន់អាស៊ីប៉ាស៊ីហ្វិក ជុំវិញសំណុំរឿងតៃវ៉ាន់ ក្រោយដំណើរទស្សនកិច្ចរបស់លោកស្រីប្រធានសភាអាមេរិក ណាន់ស៊ី ប៉េឡូស៊ី ទៅកាន់កោះតៃវ៉ាន់។ ចិនបានធ្វើសមយុទ្ធយោធាទ្រង់ទ្រាយធំ ព័ទ្ធជុំវិញតៃវ៉ាន់ បាញ់ម៊ីស៊ីលរំលងតៃវ៉ាន់ ធ្លាក់ចូលដែនទឹកជប៉ុនជាច្រើនគ្រាប់។
យ៉ាងណាក៏ដោយ លោក Andika Perkasa អគ្គមេបញ្ជាការកងទ័ពជាតិឥណ្ឌូណេស៊ី បានអះអាងថា សមយុទ្ធយោធារួមគ្នាជាមួយកងទ័ពអាមេរិក ដែលត្រូវបិទបញ្ចប់នៅថ្ងៃទី១៤សីហាខាងមុខនេះ ត្រូវបានគេគ្រោងរៀបចំធ្វើ តាំងតែពីយូរហើយ មុនពេលផ្ទុះបញ្ហាតានតឹងនៅតៃវ៉ាន់ទៅទៀត។
គួរបញ្ជាក់ដែរថា យ៉ាងហោចណាស់ មានទាហានអាមេរិក និងឥណ្ឌូណេស៊ី សរុបចំនួន៤០០០នាក់ បានធ្វើសមយុទ្ធយោធារួមគ្នា ប្រចាំឆ្នាំ នៅលើកោះស៊ូម៉ាត្រា។ ក្រៅពីនេះ ទាហានអូស្ត្រាលី និងសឹង្ហបុរីក៏បានចូលរួមដែរ។ ចំណែកជប៉ុនបានបញ្ជូនកងទ័ពឲ្យចូលរួម ជាលើកទី១។ រីឯបារាំង កាណាដា ឥណ្ឌា ម៉ាឡេស៊ី កូរ៉េខាងត្បូង និងប៉ាពូអាស៊ីនូវែលហ្គីណេ បានចូលរួមជាប្រទេសសង្កេតការណ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ