ធនាគារពិភពលោកព្រមានពីហានិភ័យនៃសេដ្ឋកិច្ចដើរថយក្រោយនៅឆ្នាំ ២០២៣
នៅពេលធនាគារកណ្តាលនៅតាមបណ្តាប្រទេសជាច្រើនដំឡើងអត្រាការប្រាក់ ដើម្បីទប់ទល់វិបត្តិអតិផរណា ធនាគារពិភពលោកព្រួយបារម្ភថា នយោបាយបង្កើនអត្រាការប្រាក់ក្នុងពេលដំណាលៗគ្នាយ៉ាងដូច្នេះនឹងអាចបង្កើនហានិភ័យនៃវិបត្តិសេដ្ឋកិច្ចនៅឆ្នាំក្រោយ ឆ្នាំ ២០២៣។ យ៉ាងណាក៏ដោយ នៅក្នុងសេចក្តីប្រកាសព័ត៌មាន ចុះផ្សាយកាលពីថ្ងៃព្រហស្បតិ៍ ធនាគារពិភពលោកនៅតែបញ្ជាក់ពីសារៈសំខាន់នៃចំណាត់ការរបស់រដ្ឋាភិបាលដើម្បីទប់ស្កាត់ការឡើងថ្លៃទំនិញ។
ចុះផ្សាយនៅថ្ងៃ៖
ស្តាប់ - ០២:១៥
តាមការសិក្សារបស់ធនាគារពិភពលោក ធនាគារកណ្តាលរបស់ប្រទេសជាច្រើនបានដំឡើងអត្រាការប្រាក់របស់ខ្លួនជាមធ្យម ២% បើប្រៀបធៀបនឹងឆ្នាំ២០២១។ គេវាយតម្លៃថា ដើម្បី ដោះស្រាយវិបត្តិអតិផរណា ទំនិញឡើងថ្លៃ គេចាំបាច់ត្រូវដំឡើងអត្រាការប្រាក់២% បន្ថែមទៀត (ធនាគារកណ្តាលដំឡើងការប្រាក់ នឹងលើកទឹកចិត្តឲ្យមនុស្សយកប្រាក់ទៅដាក់នៅធនាគារដើម្បីបានការប្រាក់ខ្ពស់។ នៅពេលគេមិនសូវមានលុយយកទៅចាយទិញទំនិញ នោះតម្លៃទំនិញនឹងធ្លាក់ចុះ មកវិញ។ គ្មានមនុស្សទិញទំនិញ នឹងគ្មានការផលិត គ្មានការវិនិយោគដែលដើរតួសំខាន់ក្នុងកំណើនសេដ្ឋកិច្ច)។
ប៉ុន្តែ សម្រាប់ធនាគារពិភពលោក ការដំឡើងអត្រាការប្រាក់របស់ធនាគារកណ្តាលដើម្បីដោះស្រាយវិបត្តិអតិផរណា ផ្ទុយទៅវិញ នឹងទៅបង្កើនហានិភ័យនៃសេដ្ឋកិច្ចពិភពលោកដើរថយ នៅឆ្នាំ ក្រោយ។ តាមការព្យាកររបស់ធនាគារពិភពលោក កំណើនសេដ្ឋកិច្ចពិភពលោក នៅឆ្នាំ ២០២៣ នឹងមានប្រមាណ ០,៥%។
នៅក្នុងការចុះផ្សាយរបាយការណ៍ កាលពីខែមិថុនាកន្លងទៅ ធនាគារពិភពលោកធ្លាប់បានព្យាករថា កំណើនសេដ្ឋកិច្ចពិភពលោក នឹងអាចមាននៅក្រោម ៣% សម្រាប់ឆ្នាំ ២០២៣ និងឆ្នាំ ២០២៤ ដោយសារតែផលប៉ះពាល់នៃសង្រ្គាមអ៊ុយក្រែន។ ប៉ុន្តែ ការវិវឌ្ឍជុំវិញ បញ្ហាភូមិសាស្រ្តនយោបាយ ហើយនិងវិបត្តិអតិផរណាយូរត្រាំត្រែង បានជះឥទ្ធិពលដ៏អាក្រក់ទៅលើសេដ្ឋកិច្ចពិភពលោក។
ជាលទ្ធផល ធនាគារពិភពលោកបានទម្លាក់ការព្យាករកំណើនសេដ្ឋកិច្ចរបស់គ្រប់ប្រទេស នៅក្នុងពិភពលោក លើកលែងតែប្រទេសនាំចេញវត្ថុធាតុដើម។
ការបង្កើនអត្រាការប្រាក់ អាចបង្កហានិភ័យនៃវិបត្តិសេដ្ឋកិច្ច។ ប៉ុន្តែ វិទ្យាស្ថានហិរញ្ញវត្ថុអន្តរជាតិ ដូចជា ធនាគារពិភពលោក នៅតែជំរុញលើកទឹកចិត្តឲ្យធនាគារកណ្តាល នៅគ្រប់ប្រទេសបន្តកិច្ចប្រឹងប្រែងកាត់បន្ថយកម្រិតអតិផរណា ដើម្បី ជៀសវាងវិបត្តិសង្គមសេដ្ឋកិច្ច ដែលបណ្តាលមកពីទំនិញចេះតែឡើងថ្លៃ។
មួយវិញ ទៀត ដើម្បី ជៀសវាងកុំឲ្យការដំឡើងអត្រាការប្រាក់ របស់ធនាគាកណ្តាលជះឥទ្ធិពលអាក្រក់ទៅលើកំណើនសេដ្ឋកិច្ច ប្រធានធនាគារពិភពលោកបានស្នើដំណោះស្រាយ ដែលនៅក្នុងនោះ រដ្ឋាភិបាលរបស់ប្រទេសនីមួយៗគួរអនុវត្តកម្មវិធីនយោបាយដែលជំរុញ ការវិនិយោគ និងកែលម្អការផលិត។ សម្រាប់ប្រធានក្រុមសេដ្ឋកិច្ចរបស់ធនាគារពិភពលោក គេមិនចាំបាច់ត្រូវការចំណាយបន្ថែម សម្រាប់រាល់ចំណាត់ការជំរុញការវិនិយោគ ឬការផលិតនោះទេ។ គេគ្រាន់តែ កែសម្រួលច្បាប់ខ្លះ ដូចជាការដាក់បញ្ចូលស្រ្តីទៅក្នុងពិភពការងារ គឺវាគ្រប់គ្រាន់ដើម្បីកែលម្អផ្នែកផលិតកម្ម រួចជាស្រេច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ