កូរ៉េខាងជើងបាញ់មីស៊ីលបាលីស្ទិក និងបង្កើនសមយុទ្ធនៅតំបន់ព្រំដែនជាប់កូរ៉េខាងត្បូង
កូរ៉េខាងជើងបានបាញ់សាកល្បងមីស៊ីល ពីរថ្ងៃជាប់គ្នា។ បន្ទាប់ពីបាញ់សាកល្បងមីស៊ីល បណ្តែត យុទ្ធសាស្រ្ត នៅក្រោមការត្រួតពិនិត្យផ្ទាល់របស់លោកគីម ជុងអ៊ុន កាលពីថ្ងៃ ពុធ កូរ៉េខាងជើង បានបាញ់សាកល្បងមីស៊ីលបាលីស្ទិកមួយដើមទៀត នៅ យប់ថ្ងៃព្រហស្បតិ៍ ឈានចូលថ្ងៃសុក្រនេះ។ នៅមុនបាញ់មីស៊ីលបាលីស្ទិក យន្តហោះចម្បាំងរបស់កូរ៉េខាងជើងបានទៅហោះចូលនៅក្នុងតំបន់ដែលស្ថិតនៅ ប្រមាណ ២៥គីឡូម៉ែត្រពីព្រំដែនកូរ៉េខាងត្បូង ដែលជាហេតុធ្វើឲ្យសេអ៊ូលឆ្លើយតបវិញ ជាមួយការបញ្ជូនយន្តហោះចម្បាំង ទៅកាន់តំបន់ព្រំដែន។
ចុះផ្សាយនៅថ្ងៃ៖
ស្តាប់ - ០២:១២
បន្ទាប់ពីបាញ់សាកល្បងដោយជោគជ័យ មីស៊ីលបណ្តែតយុទ្ធសាស្រ្ត ដែលសត្រូវមិនងាយនឹងចាប់សញ្ញាបាន កូរ៉េខាងជើងបានបើកសមយុទ្ធទ្រង់ទ្រាយធំ នៅយប់ថ្ងៃព្រហស្បតិ៍ ឈានចូលថ្ងៃសុក្រ ដោយបាញ់មីស៊ីលបាលីស្ទិក បញ្ជូនយន្តហោះចម្បាំងទៅហោះក្បែរព្រំដែនកូរ៉េខាងត្បូង និងបាញ់កាំភ្លើងធំ ជាច្រើនគ្រាប់។
អ្នកនាំពាក្យរបស់កងទ័ពកូរ៉េខាងជើង ដកស្រង់សំដីដោយទីភ្នាក់ងារព័ត៌មាន KCNA បាននិយាយថា សមយុទ្ធ បង្ហាញសាច់ដុំយោធា ជាការឆ្លើយតបនឹងលំហាត់សមបាញ់កាំភ្លើងធំរបស់កូរ៉េខាងត្បូង។
នៅក្នុងសេចក្តីប្រកាសព័ត៌មានរបស់កងទ័ព ចុះផ្សាយទីភ្នាក់ងារKCNA កូរ៉េខាងជើងចាត់ទុក សមយុទ្ធបាញ់កាំភ្លើងធំ រយៈពេល ១០ម៉ោង របស់កូរ៉េខាងត្បូង នៅក្បែរព្រំដែនជាមួយកូរ៉េខាងជើង ថា ជាសកម្មភាពញុះញង់បង្កហេតុ។ ព្យុងយ៉ាងបានព្រមាន ដាស់តឿនកងទ័ពកូរ៉េខាងត្បូង ពីផលវិបាកធ្ងន់ធ្ងរ បើសិនពួកគេនៅបន្តបង្កើតភាពតានតឹងនៅតំបន់ជួរសមរភូមិមុខយ៉ាងដូច្នេះ។
តាមសេនាធិការដ្ឋានកងទ័ពកូរ៉េខាងត្បូង នៅយប់អាធ្រាត្រថ្ងៃព្រហស្បតិ៍ ឈានចូលថ្ងៃសុក្រ ពោលគឺនៅមុនបាញ់មីស៊ីលបាលីស្ទិកបន្តិច យន្តហោះចម្បាំង១០គ្រឿងរបស់កូរ៉េខាងជើងបានបោះរំលងខ្សែបន្ទាត់ចាប់សញ្ញារបស់កូរ៉េខាងត្បូង។
កូរ៉េខាងជើងនៅបានបាញ់កាំភ្លើងធំយ៉ាងសន្ធឹកចំនួន ១៧០គ្រាប់ទៅក្នុងទឹកសមុទ្រ ដែលស្ថិតនៅក្នុងតំបន់ស រវាងប្រទេសទាំងពីរ។ សម្រាប់សេនាធិការដ្ឋានកងទ័ពកូរ៉េខាងត្បូង កូរ៉េខាងជើងបានរំលោភកិច្ចព្រមព្រៀងឆ្នាំ ២០១៨ ស្តីពីការជូនដំណឹងទុកជាមុន ដើម្បីជៀសវាងគ្រោះថ្នាក់នៅក្នុងសមុទ្រ។
តាមលោកHong Min អ្នកវិភាគមកពីវិទ្យាស្ថានសម្រាប់ការបង្រួបង្រួមជាតិ ដូចជាសមយុទ្ធដទៃទៀតដែលកូរ៉េខាងត្បូង បានធ្វើជាមួយអាមេរិកនិងជប៉ុន កូរ៉េខាងជើងយកចិត្តទុកដាក់និង តាមដានការបាញ់កាំភ្លើងធំរបស់កូរ៉េខាងត្បូង កាលពីថ្ងៃព្រហស្បតិ៍។ ការបាញ់កាំភ្លើងធំតបវិញ ដល់ទៅ ១៧០គ្រាប់របស់កូរ៉េខាងជើង ទៅក្នុងទឹកសមុទ្រដែលស្ថិតនៅក្នុងតំបន់ស អាចជាការតេស្តសាកល្បងរបស់ព្យុងយ៉ាងដើម្បីចង់ដឹងពីប្រតិកម្មតបរបស់សេអ៊ូល។
ក្រុមប្រឹក្សាសន្តិសុខជាតិកូរ៉េខាងត្បូងបានចេញសេចក្តីថ្លែងការណ៍ថ្កោលទោស សកម្មភាពអរិភាព នៅយប់ថ្ងៃ ព្រហស្បតិ៍ និងព្រមានកូរ៉េខាងជើងពីផលវិបាក។ នៅថ្ងៃសុក្រ រដ្ឋាភិបាលកូរ៉េខាងត្បូង បានសម្រេចជាអត្តនោម័ត លើកទី១ ដាក់ទណ្ឌកម្មលើជនជាតិកូរ៉េខាងជើង និងស្ថាប័នកូរ៉េខាងជើង។
នៅថ្ងៃចន្ទ ដើមសប្តាហ៍នេះ កូរ៉េខាងជើងបានអះអាងថា ខ្លួនបានធ្វើសមយុទ្ធនុយក្លេអ៊ែរតាក់ទិក ដើម្បីជាការឆ្លើយតបទៅនឹងសមយុទ្ធរួមគ្នា រវាងអាមេរិក និងកូរ៉េខាងត្បូង ដែលកូរ៉េខាងជើងចាត់ទុកជាការហាត់សម ត្រៀមចូលឈ្លានពានកូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ