លោកស្រីសៃ អ៊ីងវេន៖ការគំរាមកំហែងបង្កដោយរបបផ្តាច់ការជាសញ្ញាអាសន្នចំពោះអ្នកប្រជាធិបតេយ្យនៅទូទាំងពិភពលោក
នៅថ្ងៃអង្គារ ទី២៥ តុលា កោះតៃវ៉ាន់រៀបចំកិច្ចប្រជុំក្រុមសកម្មជនគាំទ្រប្រជាធិបតេយ្យមកពី ៧០ប្រទេស។ ប្រធានាធិបតីតៃវ៉ាន់លោកស្រីសៃ អ៊ីងវេនបានថ្លែងនាឱកាសនោះដោយព្រមានថា ការគំរាមកំហែងបង្កឡើងដោយរបបផ្តាច់ការជាសញ្ញាអាសន្នចំពោះអ្នកប្រជាធិបតេយ្យនៅទូទាំងពិភពលោក។ ការថ្លែងព្រមានរបស់លោកស្រីសៃ អ៊ីងវេនបានធ្វើឡើង ២ថ្ងៃក្រោយពីលោកស៊ី ជីនពីងត្រូវបានគណៈកម្មាធិការកណ្តាលមជ្ឈិមបក្សជ្រើសតាំងឲ្យធ្វើជាអគ្គលេខាធិការបក្សសម្រាប់៥ឆ្នាំបន្ថែមទៀត។
ចុះផ្សាយនៅថ្ងៃ៖
ស្តាប់ - ០២:០៥
របបផ្តាច់ការដែលប្រធានាធិបតីតៃវ៉ាន់លោកស្រីសៃ អ៊ីងវេនចង់និយាយសំដៅគ្មាននរណាក្រៅពីចិនទេ នោះបើទោះបីជាលោកស្រីមិនបាននិយាយចំៗក៏ដោយ។ « ប្រជាជនតៃវ៉ាន់មិនដែលថយក្រោយនៅចំពោះមុខបញ្ហាប្រឈមនៃការជ្រៀតជ្រែកពីរបបផ្តាច់ការ និងបានតស៊ូប្រយុទ្ធប្រឆាំងនឹងកម្លាំងដែលព្យាយាមបំផ្លិចបំផ្លាញលទ្ធិប្រជាធិបតេយ្យរបស់ប្រជាជនតៃវ៉ាន់ » នេះជាការថ្លែងរបស់លោកស្រីសៃ អ៊ីងវេននៅចំពោះមុខអ្នកទទួលខុសត្រូវ និងសកម្មជនគាំទ្រប្រជាធិបតេយ្យប្រមាណជា ២០០នាក់មកពី ៧០ប្រទេសក្នុងលោក។
លោកស្រីសៃ អ៊ីងវេនបានបន្ថែមដោយព្រមានថា ការគំរាមកំហែងបង្កឡើងដោយរបបផ្តាច់ការជាសញ្ញាអាសន្នចំពោះអ្នកប្រជាធិបតេយ្យនៅទូទាំងពិភពលោក។ នៅក្នុងន័យនេះ លោកស្រីបានលើកឡើងពីការចូលឈ្លានពានអ៊ុយក្រែនពីសំណាក់រុស្ស៊ី។ គួរបញ្ជាក់ថា នៅក្នុងចំណោមសកម្មជនគាំទ្រប្រជាធិបតេយ្យដែលបានចូលរួមនៅក្នុងកិច្ចប្រជុំរៀបចំដោយតៃវ៉ាន់ពេលនេះក៏មានអ្នកមកពីរុស្ស៊ី អ៊ុយក្រែន និងអ៊ីរ៉ង់ដែរ។ តែវត្តមានសកម្មជនប្រជាធិបតេយ្យដែលមិនអាចកំបាំងមុខអ្នកផ្សេងបាន គឺសកម្មជនប្រឆាំងនៅហុងកុងលោកណាត់តង់ ឡ។
តាំងពីបានរត់ចេញពីទឹកដីចិនក្នុងឆ្នាំ ២០២០ នេះជាលើកទី១ ដែលសកម្មជនប្រឆាំងនៅហុងកុងរូបនេះបានត្រឡប់ជាន់ទឹកដីអាស៊ី។ នៅក្នុងកិច្ចសន្ទនាជាមួយ AFP នៅក្រៅក្របខណ្ឌនៃកិច្ចប្រជុំ លោកណាត់តង់ ឡបានបញ្ជាក់ច្បាស់ៗថា ប្រធានាធិបតីចិនលោកស៊ី ជីនពីងកំពុងប្រមូលផ្តុំ និងពូនអំណាចផ្ទាល់ខ្លួនបន្ថែមទៀត។ តាមលោកណាត់តង់ ឡ លោកស៊ីក៏ដូចជាសមភាគីរុស្ស៊ីលោកពូទីនកំពុងឲ្យសារៈសំខាន់បន្ថែមទៀតលើមហិច្ឆតាផ្ទាល់ខ្លួនជាជាងស្ថិរភាពរបស់ប្រទេស។ អ្វីដែលសកម្មជនប្រឆាំងនៅហុងកុងរូបនេះចង់មានន័យ លោកស៊ី និងលោកពូទីនអាចធ្វើសកម្មភាពកាន់តែគ្រោះថ្នាក់ដោយការគំរាមកំហែងតៃវ៉ាន់ និងពិភពលោកទាំងមូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ