ទ័ពជើងទឹកអាមេរិកថា អាមេរិកត្រូវត្រៀមខ្លួនដើម្បីឆ្លើយតបនឹងការចូលឈ្លានពានរបស់ចិនលើតៃវ៉ាន់
ចុះផ្សាយនៅថ្ងៃ៖
ស្តាប់ - ០៦:០៦
នៅសហរដ្ឋអាមេរិក ប្រធានប្រតិបត្តិការទ័ពជើងទឹកឧត្តមនាវី Michael Gilday បានព្រមានក្នុងថ្ងៃពុធ ទី១៩ តុលាថា ទ័ពអាមេរិកត្រូវត្រៀមខ្លួនដើម្បីឆ្លើយតបនឹងការវាយប្រហារចូលឈ្លានពានរបស់ចិនលើតៃវ៉ាន់។ តាមឧត្តមនាវីអាមេរិករូបនេះដដែល ចិនអាចនឹងប្រើកម្លាំងវាយយកតៃវ៉ាន់ពីពេលនេះទៅឆ្នាំ ២០២៧។ ការព្រមានរបស់ឧត្តមនាវី Michael Gilday បានធ្វើឡើង ខណៈដែលគណបក្សកុម្មុយនិស្តចិនកំពុងបន្តធ្វើសមាជលើកទី២០ នៅក្នុងវិមានប្រជាជនក្នុងក្រុងប៉េកាំង។
ការលើកឡើងរបស់ឧត្តមនាវីអាមេរិក Michael Gilday បានធ្វើឡើងនៅក្នុងបទសម្ភាសន៍មួយឲ្យអង្គការ Atlantic Council។ តាមពិត លោក Michael Gilday មិនបានលើកយកភស្តុតាងជាក់ស្តែងអ្វីជាសំអាងទេ តែគ្រាន់បញ្ជាក់ថា គេមិនត្រូវសំឡឹងមើលតែលើអ្វីដែលប្រធានាធិបតិចិនលោកស៊ី ជីនពីងបាននិយាយទេ តែគេត្រូវមើលពីឥរិយាបទ និងពីអ្វីដែលចិនបានធ្វើ។ អ្វីដែលឧត្តមនាវីអាមេរិក Michael Gilday ចង់បញ្ជាក់ត្រង់ចំណុចនេះ ចិនមិនបានភ្លេចអនុវត្តតាមពាក្យសន្យារបស់ខ្លួនទេ និងថែមទាំងបានអនុវត្តលឿនជាងគម្រោងការទៅទៀត។
ឧត្តមនាវី Michael Gilday បានមើលឃើញថាក្នុងរយៈពេល ២០ឆ្នាំចុងក្រោយនេះ ក្រុងប៉េកាំងបានអនុវត្តតាមពាក្យសន្យារបស់ខ្លួនម្តងមួយៗដោយគ្មានចន្លោះ និងលឿនជាងការប្រកាសទៅទៀត។ តាមឧត្តមនាវីអាមេរិករូបនេះដដែល នៅពេលដែលគេនិយាយថា ចិនវាយប្រហារចូលឈ្លានពានតៃវ៉ាន់នៅឆ្នាំ ២០២៧ មានន័យថា គឺនៅឆ្នាំ ២០២២ នេះ ឬមួយក៏នៅឆ្នាំ ២០២៣ ខាងមុខ។ តែលោក Michael Gilday បញ្ជាក់ថា អ្វីដែលលោកនិយាយនេះមិនមែនជាការទាញសញ្ញាអាសន្នទេ និងថា គេមិនអាចទាត់ចោលលើសម្មតិកម្មមួយនេះបានឡើយ។
គួរបញ្ជាក់ថា ចំណាប់អារម្មណ៍របស់ឧត្តមនាវីអាមេរិក Michael Gilday ស្រដៀងគ្នានឹងការលើកឡើងរបស់ប្រមុខការទូតអាមេរិកលោកអង់តូនី ប៊្លីងកិននាប៉ុន្មានថ្ងៃមុនដែលថា ក្រុងប៉េកាំងចង់ក្រសោបយកតៃវ៉ាន់ឲ្យបានលឿនជាងការរំពឹងទុក។
ចិនក្នុងសម័យលោកស៊ីខុសគ្នាពីចិនក្នុងសម័យប្រធានាធិបតីចិនមុនៗ
ប្រមុខការទូតអាមេរិកលោកអង់តូនី ប៊្លីនកិនបានអះអាង ចិនក្នុងសម័យប្រធានាធិបតីលោកស៊ី ជីនពីងបានក្លាយជាចិនដែលប្រកាន់យកនូវនយោបាយបង្រ្កាបខ្លាំងនៅក្នុងស្រុក និងនយោបាយឈ្លានពានខ្លាំងនៅបរទេស។ ទោះបីជាលោកប៊្លីនកិនមិនបានលើកចំៗក៏គេដឹងថា លោកចង់ផ្តោតលើជំហររបស់ចិនចំពោះដែនដីហុងកុង តំបន់ទីបេ ជនជាតិភាគតិចអ៊ុយហ្គួរអ្នកកាន់សាសនាអ៊ីស្លាមក្នុងខេត្តស៊ីនជាំង និងរឿងតៃវ៉ាន់។ ក្រៅពីនេះ នៅមានការតាមបង្ក្រាបកំចាត់ក្រុមប្រឆាំងតាមគ្រប់រូបភាព។ ទាក់ទងនឹងនយោបាយឈ្លានពានខ្លាំងរបស់ចិននៅបរទេសអាចមានជាប់ពាក់ព័ន្ធជាពិសេសនឹងបញ្ហាសមុទ្រចិនដែលចិនកំពុងមានជម្លោះជាមួយប្រទេសផ្សេង។
តាមលោកប៊្លីនកិនមានករណីជាច្រើនដែលចិនបានធ្វើកំពុងប៉ះពាល់ដល់ផលប្រយោជន៍ និងតម្លៃរបស់អាមេរិក។ តែប្រមុខការទូតអាមេរិករូបនេះដដែលមិនភ្លេចបញ្ជាក់ថា ទំនាក់ទំនងរវាងមហាអំណាចទាំងពីរចិន អាមេរិកកំពុងរក្សានូវស្មារតីនៃកិច្ចហប្រតិបត្តិការ។ លោកប៊្លីនកិនយល់ថា គេមិនអាចដោះស្រាយបញ្ហាធំៗមួយចំនួនក្នុងលោកដែលពិបាកដោះស្រាយដោយគ្មានកិច្ចសហប្រតិបត្តិការរវាងអាមេរិក និងចិនបានឡើយ ពិសេសក្នុងរឿងអាកាសធាតុ សុខភាពពិភពលោក និងការប្រយុទ្ធប្រឆាំងនឹងការរត់ពន្ធគ្រឿងញៀន។
សរុបមក អាមេរិកហាក់កំពុងបន្តប្រកាន់ជំហរជាមួយចិនជាគូប្រជែង និងជាគូសត្រូវដោយមិនភ្លេចរក្សាទុកនូវស្មារតីនៃកិច្ចសហប្រតិបត្តិការរវាងគ្នាដែលចិនបន្តស្ថិតជាដៃគូពាណិជ្ជកម្មដ៏ធំរបស់អាមេរិក។
ដល់ពេលវេលាដែលចិនត្រូវក្រសោបយកតៃវ៉ាន់?
បើតាមអាមេរិក ចិនហ៊ានឈ្លានពានតៃវ៉ាន់ និងប្រហែលជាអាចក្រសោបយកតៃវ៉ាន់លឿនជាងការរំពឹងទុកទៀតផង។ ហេតុអ្វីបានជាព័ត៌មានស្តីពីរឿងចិនចង់ក្រសោបតៃវ៉ាន់ហាក់កំពុងមានផុសផុលខ្លាំងម្ល៉េះនៅពេលនេះ?។ គេអាចផ្តល់ចម្លើយចំពោះសំណួរនេះតាមរយៈសុន្ទរកថារបស់ប្រធានាធិបតីចិនលោកស៊ី ជីនពីងថ្លែងនាឱកាសបើកសមាជបក្សកម្មុនិស្តលើកទី២០ កាលពីថ្ងៃអាទិត្យ ទី១៦ តុលាកន្លងទៅថ្មីៗនេះ។ លោកស៊ីបានបញ្ជាក់ច្បាស់ៗនៅក្នុងសុន្ទរកថាថា ចិននឹងប្រឹងប្រែងគ្រប់យ៉ាងដើម្បីបង្រួបបង្រួមតៃវ៉ាន់ដោយសន្តិវិធី។
តែបុរសខ្លាំងចិនរូបនេះមិនភ្លេចព្រមានប្រើកម្លាំងបាយ និងប្រើវិធានការផ្សេងៗទេ ប្រសិនបើចាំបាច់។ អ្វីដែលថ្មីនៅក្នុងការថ្លែងរបស់លោកស៊ីនេះ គឺលោកមិនបានប្រើឃ្លា « បើតៃវ៉ាន់ហ៊ានប្រកាសឯករាជ្យ »។ ចូរកុំភ្លេចថាកន្លងមក ចិនតែងព្រមានវាយប្រហារតៃវ៉ាន់ បើកោះមួយនេះថ្លើមធំហ៊ានប្រកាសឯករាជ្យ។ តាមរយៈសុន្ទរកថារបស់លោកស៊ីពេលនេះនាំឲ្យគេអាចយល់បានថា ចិនត្រូវទាញតៃវ៉ាន់ឲ្យចូលក្នុងចិនតែមួយដោយខានមិនបាន ទោះជាតៃវ៉ាន់ប្រកាសឯករាជ្យ ឬមិនប្រកាសឯករាជ្យ។
ចុះបើចិនឈ្លានពានតៃវ៉ាន់មែន តើអាមេរិកហ៊ានប្រើកម្លាំងជួយតៃវ៉ាន់ឬទេ?។ គេពិបាកផ្តល់ចម្លើយច្បាស់លាស់ ទោះបីជាប្រធានាធិបតីលោកបៃដិនធ្លាប់បានប្រកាសពីការជួយតៃវ៉ាន់ បើមានការឈ្លានពានពីចិន។ ចូរកុំភ្លេចថាសព្វថ្ងៃ អាមេរិកបន្តប្រកាន់គោលនយោបាយចិនតែមួយ និងមិនជំទាស់ចំពោះការបង្រួបបង្រួមចិន និងតៃវ៉ាន់ដោយសន្តិវិធីទេទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ