ជប៉ុនបង្កើនខ្ទង់ចំណាយសម្រាប់មូលដ្ឋានទ័ពអាមេរិកនៅអូគីណាវ៉ា
ជប៉ុន និងអាមេរិកបានចុះកិច្ចព្រមព្រៀងមួយ នៅថ្ងៃសុក្រទី៧ មករានេះ ដើម្បីបន្តពន្យារ ការរ៉ាប់រងចំណាយរបស់ជប៉ុនសម្រាប់កងទ័ពអាមេរិក នៅទឹកដីជប៉ុន។ ទៅតាមកិច្ចព្រមព្រៀង ដែលចុះហត្ថលេខាដោយរដ្ឋមន្រ្តីការបរទេស និងរដ្ឋមន្រ្តីការពារជាតិរបស់ប្រទេសទាំងពីរ ជប៉ុនបានយល់ព្រមបង្កើនកញ្ចប់ថវិកាសម្រាប់ ការតាំងទ័ពអាមេរិក នៅទឹកដី ជប៉ុន។ កិច្ចព្រមព្រៀងលើវិស័យកងទ័ពអាមេរិក-ជប៉ុនធ្វើឡើងក្នុងបរិបទដែលកំពុងកើតមានភាពតានតឹងជាមួយចិន និងការបាញ់សាកល្បងមីស៊ីល បែបគំរាមរបស់កូរ៉េខាងជើង។
ចុះផ្សាយនៅថ្ងៃ៖
ស្តាប់ - ០១:៥៤
កិច្ចព្រមព្រៀងស្តីពីការទទួលបន្ទុកចំណាយរបស់ជប៉ុនសម្រាប់កងទ័ពអាមេរិក នៅទឹកដីជប៉ុន ធ្វើឡើងនៅក្នុងកិច្ចប្រជុំ វីដេអូ ថ្នាក់រដ្ឋមន្រ្តីការបរទេស និងការពារជាតិរបស់ប្រទេសទាំងពីរ។
ទៅតាមកិច្ចព្រមព្រៀង រដ្ឋាភិបាលជប៉ុននឹងចំណាយថវិកាប្រមាណ ៨ពាន់លានដុល្លារ ក្នុងរយៈ ៥ឆ្នាំ សម្រាប់កងទ័ពអាមេរិក ដែលឈរជើងប្រចាំការ នៅប្រទេសជប៉ុន។ ដោយចំណាយ ១៨០០លានដុល្លារ ក្នុងមួយឆ្នាំៗ រដ្ឋាភិបាលជប៉ុនបានបង្កើនកញ្ចប់ថវិកាសម្រាប់រ៉ាប់រងការចំណាយ លើការរក្សាវត្តមានទ័ពអាមេរិកនៅទឹកដីជប៉ុនប្រមាណ ៥%។
កិច្ចព្រមព្រៀងត្រូវបិទបញ្ចប់នៅខែ មីនា ឆ្នាំ ២០២១ ប៉ុន្តែ ត្រូវបានពន្យារបន្ថែម រយៈពេល១ឆ្នាំ ក្នុងអំឡុងពេលរង់ចាំការផ្លាស់ប្តូររដ្ឋបាលអាមេរិក នៅក្រោយការបោះឆ្នោត។
នៅក្នុងកិច្ចប្រជុំវីដេអូ នៅថ្ងៃសុក្រទី ៧មករា រដ្ឋមន្រ្តីការបរទេសអាមេរិក លោកអង់តូនី ប្លីងកិន បានវាយតម្លៃថា កិច្ចព្រមព្រៀងថ្មីនឹងជួយពង្រឹងធនធាន សមត្ថភាព អន្តរប្រតិបត្តិការរបស់កងទ័ពអាមេរិក។ នៅចំពោះមុខសមភាគីជប៉ុន ប្រមុខការបរទេសអាមេរិក បានលើកឡើង ពីសកម្មភាពញុះញង់របស់ចិន ដែលបានបង្កើនភាពតានតឹងនៅច្រកសមុទ្រតៃវ៉ាន់ នៅសមុទ្រចិន ខាងកើត។ លោកប្លីងកិនបានសង្កត់ធ្ងន់ផងដែរ ពីការគំរាមកំហែង របស់កូរ៉េខាងជើង ដែលទើបបាញ់សាកល្បង មីស៊ីលបាលីស្ទីក អ៊ីពែរសូនិក នៅសប្តាហ៍នេះ ដែលបានបង្កឲ្យមានការព្រួយបារម្ភខ្លាំងរបស់អាមេរិក និងជប៉ុន។
គួររំលឹកថា នៅក្រោយ សង្រ្គាមលោកទី២ ជប៉ុន ដែលមានកងទ័ពមានតួនាទីត្រឹមតែការពារខ្លួន និងអាចធ្វើបេសកម្មក្នុងដែនកំណត់មួយ បានពង្រឹងសម្ព័ន្ធភាពជាមួយអាមេរិក។
ទៅតាមសន្ធិសញ្ញាស្តីពីសន្តិសុខ ជប៉ុន អាមេរិក ធ្វើឡើង នៅទសវត្សរ៍ឆ្នាំ ១៩៦០ កងទ័ពអាមេរិកធានាការពារជប៉ុន ប៉ុន្តែ រដ្ឋាភិបាលជប៉ុនត្រូវបង់ថ្លៃរ៉ាប់រងលើការចំណាយរបស់កងទ័ពអាមេរិក ជាង ៥ម៉ឺននាក់ ដែលឈរជើងប្រចាំការប្រទេសជប៉ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ