ឥណ្ឌូណេស៊ី គ្រោងបញ្ជូនទាហាន រៀននៅសាលាយោធាបារាំង នាឆ្នាំក្រោយ
ប្រទេសបារាំង ពង្រឹងចំណងកិច្ចសហប្រតិបត្តិការយុទ្ធសាស្ត្រ ជាមួយប្រទេសឥណ្ឌូណេស៊ី និងតំបន់អាស៊ាន ដើម្បីប្រយុទ្ធទប់ទល់នឹងហានិយភ័យគ្រោះថ្នាក់នៅក្នុងតំបន់អាស៊ីប៉ាស៊ីហ្វិក។ អាស៊ីប៉ាស៊ីហ្វិក ជាទីដែលភាពតានតឹងកាន់តែខ្លាំងឡើងៗ រវាង មហាយក្ស ចិន និងសហរដ្ឋអាមេរិក។ ការបង្ហាញយុទ្ធសាស្ត្របារាំងនៅក្នុងតំបន់អាស៊ីនេះ ឃើញកាន់តែបង្ហាញច្បាស់ឡើងៗ តាមរយៈដំណើរទស្សនកិច្ចរបស់ប្រធានាធិបតីបារាំងកាលពីពេលថ្មីៗ នៅកោះបាលី និងនៅបាងកក។ មិនតែប៉ុណ្ណោះ រដ្ឋមន្ត្រីការពារជាតិបារាំង ក៏បានអញ្ជើញទៅ ទីក្រុងហ្សាការតា បន្ថែមទៀត នៅថ្ងៃសុក្រ និង ថ្ងៃសៅរ៍ ។
ចុះផ្សាយនៅថ្ងៃ៖
ស្តាប់ - ០២:២៤
រដ្ឋមន្ត្រីការពារជាតិបារាំង បានគូសបង្ហាញពីការទាក់ទងគ្នាកាន់តែស្អិតរមួត និង កាន់តែមាំទាំឡើងៗ រវាង រដ្ឋបាលក្រុងប៉ារីស និង រដ្ឋធានីហ្សាការតា។ នេះគឺជាការបញ្ជាក់របស់រដ្ឋមន្ត្រី Sébastien Lecornu ទៅកាន់ទីភ្នាក់ព័ត៌មានបារាំងAFP ក្នុងដំណើរទស្សនកិច្ចផ្លូរការពីរថ្ងៃនៅឥណ្ឌូណេស៊ី។ រដ្ឋមន្ត្រីរូបនេះ បន្ថែមថា បារាំងចង់ស្តែងបង្ហាញពីតួនាទីក្នុងផ្លូវនយោបាយដ៏សំខាន់ មិនត្រឹមចំពោះតែទំនាក់ទំនងទ្វេភាគីទេ តែសម្រាប់ចំណងទូតពហុភាគីតែម្តង ដើម្បីបញ្ជៀសគ្រោះថ្នាក់ ដែលដរចេញពីភាពតានតឹងក្នុងតំបន់ អាស៊ីប៉ាស៊ីហ្វិក។ ទន្ទឹមនេះ បារាំងក៏បង្កើនកម្លាំងទ័ព និងបង្កើនកម្លាំងទូត ដែរ។
ក្នុងន័យនេះ បារាំង ក៏បានចូលរួមក្នុងវេទិកាប្រជុំថ្នាក់រដ្ឋមន្ត្រីការពារជាតិអាស៊ាន បូកនឹងប្រទេស៧ ទៀត ក្នុងឋានៈជាអ្នកសង្កេតការណ៍ ក្នុងនោះមាន ជាអាទិ៍ សហរដ្ឋអាមេរិកនិងចិន។ តួនាទីនេះ កំពុងតែបន្តដ៏សកម្មភាព ពីឆ្នាំ២០២៤ ដល់២០២៧ ដើម្បីចូលរួមចំណែកធ្វើការរួមគ្នា ទៅលើសំណុំរឿងរស៊ើបធំៗ និងបញ្ហាសន្តិសុខផ្លូវសមុទ្រ។ នេះបើតាមការប្រកាសតាមធ្វីតធ័រ ពីថ្ងៃសៅរ៍ ដែលលោករដ្ឋមន្ត្រី Sébastien Lecornu សង្កត់ធ្ងន់ពីតួនាទីរបស់អាស៊ាន ជាស្នូលនៃដំណោះស្រាយដើម្បីសន្តិភាពនិងសុវត្ថិភាពក្នុងតំបន់។
បារាំង ក៏ចាំបាច់ត្រូវរឹតបន្តឹងខ្សែចំណងទូត ជាមួយ ឥណ្ឌូណេស៊ី ដ្បិតប្រទេសនេះ នឹងត្រូវធ្វើជាប្រធានផ្លាស់វេន នៃកិច្ចប្រជុំអាស៊ាន នៅឆ្នាំថ្មី បន្តពីកម្ពុជា។ ពីថ្ងៃសុក្រ រដ្ឋមន្ត្រីការពារជាតិបារាំង បានជួបចរចាជាមួយរដ្ឋមន្ត្រីការពារជាតិឥណ្ឌូណេស៊ី Prabowo Subianto លើសំណុំរឿងជាច្រើន។ ក្នុងនោះ ភាគីទាំងពីរ បានជជែកគ្នាពីគម្រោងបណ្តុះបណ្តាលទាហានឥណ្ឌូណេស៊ី នៅសាលាយោធាបារាំង នាឆ្នាំក្រោយ។
ក្នុងឆ្នាំនេះ ឥណ្ឌូណេស៊ី បានបញ្ជាទិញយន្តហោះចម្បាំង Rafale បារាំង ចំនួន ៤២ គ្រឿង ក្នុងតម្លៃទឹកប្រាក់ ជាង ៨ ពាន់លានដុល្លារ។ រដ្ឋបាលក្រុងហ្សាការតា ចង់ទិញ នាវាមុជទឹកបារាំងចំនួន ២ គ្រឿងបន្ថែម ដែលរដ្ឋមន្ត្រីការពារជាតិបារាំង បញ្ជាក់ថា កំពុងតែចរចាគ្នាពីតម្លៃ។ បើតាមរដ្ឋមន្ត្រីបារាំង គឺ ឥណ្ឌូណេស៊ី ថែមទាំងចង់បង្កើនឫទ្ធានុភាពសមត្ថភាពយោធាផ្លូវអាកាសទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ