សេដ្ឋកិច្ចបារាំងចាប់រួញក្រញាញ់ជាលើកទីមួយ
នៅចំពោះមុខវិបត្តិពិភពលោកធំៗ ផ្តើមដោយវិបត្តិកូវីដ និងបន្តដោយសង្គ្រាមនៅអ៊ុយក្រែន បារាំងស្ថិតក្នុងចង្កោមប្រទេសដែលមានសេដ្ឋកិច្ចធន់និងស៊ូខ្លាំងជាងគេមួយ។ គិតចាប់តាំងពីខែកុម្ភៈ២០២១មក សន្ទទស្សន៍នៃសេដ្ឋកិច្ចបារាំងទើបចាប់ធ្លាក់អន់ ជាលើកទីមួយ នៅខែវិច្ឆិកា២០២២នេះ។ នេះបើតាមទិន្នន័យចេញផ្សាយនៅថ្ងៃពុធទី ២៣វិច្ឆិកា ដោយទីភ្នាក់ងារវាយតម្លៃហានិភ័យបំណុល Standard & Poor's Global។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
សកម្មភាពសេដ្ឋកិច្ចឯកជនបានធ្លាក់ចុះអស់១,៤ ពិន្ទុ នៅក្នុងខែវិច្ឆិកា មកនៅត្រឹម៤៨,៨ បើប្រៀបទៅនឹងខែតុលា។ នេះបើតាមការសន្និដ្ឋានបឋម របស់ទីភ្នាក់ងារវាយតម្លៃហានិភ័យបំណុលS&P Global ដែលពន្យល់ថាការបានទទួលពិន្ទុក្រោម៥០ត្រូវចាត់ទុកថាសកម្មភាពសេដ្ឋកិច្ចចាប់រួញថយ។
តាមការពិតវិស័យផលិតកម្មបារាំងចាប់រួញក្រញ៉ាញ់តាំងពីដើមឆមាសទីពីរឆ្នាំ២០២២មក ប៉ុន្តែវិស័យសេវាកម្មមានសន្ទុះសកម្មភាពខ្លាំង បានអូសយោងសេដ្ឋកិច្ចបារាំងឱ្យមានកំណើនជារហូតមក។ ឥលូវបើតាមសេចក្តីថ្លែងការណ៍របស់អ្នកជំនាញS&P¨ Global វិស័យដែលទ្រទ្រង់សេដ្ឋកិច្ចខ្លាំងហាក់ចាប់អស់កម្លាំងដែរ ទើបបានជាវិស័យសេដ្ឋកិច្ចឯកជនចាប់ធ្លាក់ចុះ ដល់(៤៩,៤)កំរិតទាបបំផុត មិនធ្លាប់មានក្នុងរយៈពេលជិតពីរឆ្នាំកន្លងមកនេះ។
នៅក្នុងការវិភាគរបស់ទីភ្នាក់ងារ ក្រុមហ៊ុនឧស្សាហកម្មនិងសេវាកម្មបារាំងចំនួន ៧៥០ក្រុមហ៊ុន មានសកម្មភាពធ្លាក់ចុះដោយហេតុតែសេចក្តីត្រូវការរបស់អតិថិជនចាប់ថយ ព្រោះតែមិនសូវទុកចិត្តនិងមិនសូវមានទស្សនៈវិស័យសេដ្ឋកិច្ច។ ចំណែកខាងទីផ្សារការងារវិញ បន្ទាប់មានភាពស្វាហាប់ខ្លាំងអស់រយៈពេល២៣ខែជាប់គ្នាមក កំណើននៅតែបន្តមានដដែល ប៉ុន្តែក្នុងល្បឿនយឺតជាងមុន ដោយក្រុមហ៊ុនខ្លះចាប់ផ្តើមប្រុងប្រយ័ត្នលែងជ្រើសរើសបុគ្គលិកថ្មីហើយនៅខែវិច្ឆិកានេះ។
គេនៅមិនទាន់ដឹងថា តើសេដ្ឋកិច្ចបារាំងនឹងបន្តចុះអន់នៅខែវិច្ឆិការហូតដល់ដំណាច់ឆ្នាំតែម្តងឬយ៉ាងណាទេ។ តែវិទ្យាស្ថានជាតិផ្នែកស្ថិតិបានព្យាករជាស្រេច អំពីដំណើរអសកម្មនៃសេដ្ឋកិច្ចបារាំង។ ឯធនាគារកណ្តាលបារាំងវិញ សំលឹងឃើញប្រទេសមានកំណើនសេដ្ឋកិច្ចវិជ្ជមាន តែស្តួចស្តើងមែនទែន។ កំណើនសេដ្ឋកិច្ចបារាំងច្បាស់ជាចាប់បន្ថយល្បឿន ៖ ០,៥%នៃផលិតផលសរុបក្នុងស្រុក កាលពីត្រីមាសទីពីរ និងអាចត្រឹម០,២%នៅត្រីមាសទីបី (ស្ថាប័នជាតិនឹងចេញផ្សាយតួលេខពិតនៅថ្ងៃទី ៣០វិច្ឆិកាខាងមុខ)៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ